古天樂陳喬恩分手 霍建華陳妍希介入
古天樂咁多年嚟都係緋聞絕緣體，估唔到一爆出緋聞，就爆出對象竟然係「一箭雙鵰」——曾有「偶像劇女王」之稱嘅陳喬恩，同《那些年》嘅陳妍希BB﹗宅男心碎了﹗係真唔係0架﹗
據最新一期台灣報道，轉展內地市場嘅陳喬恩，同古天樂喺2010年經友人介紹認識，2011年先開始交往。兩人雖然各有各忙，但感情都keep到，仲好甜蜜。
點知去年12月底，吳君如上節目時透露，曾介紹陳妍希給古天樂認識，仲話古仔當時對陳妍希「相當有好感」，仲顯得「緊張又害羞」，但古仔席上又唔敢表達，只係識飲酒，唔講嘢。君如話呢個三角組合出咗幾次街之後，就再冇下文喇。
雖然冇事發生過，但一向感情有潔癖嘅陳喬恩聽到君如咁講，大怒，即刻打電話質問古仔。古仔都多次解釋同陳妍希只係「朋友」，但陳喬恩依舊認為自己不被尊重，雙方因此冷戰。
而就喺陳喬恩同古仔冷戰期間，舊愛霍建華趁機邀陳喬恩散心，希望有機會破鏡重圓。對此陳喬恩經紀人表示，古仔同霍建華都只是朋友。古仔就冇回應。
今期台灣：霍建華趁虛而入，陳喬恩賭氣甩古天樂，話陳妍希無厘頭介入古天樂同陳喬恩之戀，令二人分手。 
報道指陳喬恩同古仔冷戰期間，舊愛霍建華(右)趁機箍煲求復合。(資料圖片)
妍希BB認鍾意古仔
憑《那些年，我們一起追的女孩》而走紅、仲被封為「宅男女神」嘅陳妍希，今次真係好無辜。查實成件事只係吳君如年初喺台灣節目《康熙來了》中踢爆曾為妍希BB同古天樂牽紅綫，安排三次飯局，其中一次係君如生日，另一次係妍希生日。但君如指古仔性格似宅男，見到妍希BB竟然緊張到唔識講嘢，只顧飲酒自隊「鼓足勇氣」，結果食咗三次飯就冇下文。
其後妍希BB來港，受訪時都有講過﹕「大家一起吃飯很正常，朋友吃飯我不抗拒，是你們想太多了，他只是我很喜歡的演員，我很想與他合作。（會接受皮膚黝黑的人做男友嗎？）愛情不分膚色、國籍與距離。」
妍希BB今年一月上《康熙來了》大談同古天樂「飯聚」經過。(電視截圖)
情迷33D陳喬恩？網民難接受
早於2010年12月，內地討論區「天涯」已有人貼post，指古天樂同台灣偶像劇天後陳喬恩撻著，仲有指兩人嘅common friend——楊千嬅係中間人。內地網民紛紛話唔信，仲話冇圖冇真相，亦有指陳喬恩根本唔係古仔喜歡嘅類型，但更多fans原來都唔鍾意陳喬恩、直指佢配唔係古仔。其實古仔咁多年都零緋聞零戀聞，大家又點知古仔鍾意邊種口味呢。
當時亦傳媒追問應，古仔例牌封嘴，陳喬恩就擘大對眼做咗個好驚訝嘅表情，狠狠用目光「秒殺」記者一眼就撇，未有回應。網民討論一餐都係冇結果，但未幾喺「天涯」爆料嘅樓主再寫道﹕「之所以沒繼續八下去，是因為兩位中其中一位的經紀公司拜託不要八卦下去，兩位還愛得不夠深，怕受影響，哈﹗」似乎又講到好逼真咁喎﹗
至於被指愛情方面有「潔癖」嘅陳喬恩，佢本人亦冇喺微博透露啲乜嘢風聲，但就曾於去年8月寫道﹕「愛上一個人的時候，多多少少是有點怕他的。怕他累怕他辛苦，怕自己不夠體貼，怕漏接了任何一個電話，怕他想太多，怕他不想太多，怕接起電話時忽然才想到﹕『完了，忘了報備….』既甜又怕……愛你才會怕你，要是有一天他（她）不怕了，看你怕不怕。」
資料圖片 
資料圖片 
資料圖片
睇嚇啲反應……
.古天樂陳喬恩分手 霍建華陳妍希介入
http://veryy8.blogspot.com/2013/03/blog-post_3959.html
