Eason騷加場冇飛賣 Fans鬧爆
陳奕迅（Eason）將於7月在紅館舉行「Eason's Life」演唱會，由於門票爆完又爆，所以昨日他在尖沙嘴舉行記者會時宣佈再加開兩場，合共25場。昨日公開發售首23場門票，於兩小時內迅速售罄，而兩場加場的門票，會在今日發售，不過網民卻鬧爆主辦單位留了九成飛，搞到昨日門票公開發售時，粉絲即使一早排隊都未必成功買到，而昨日於尖沙嘴通利琴行排隊買票的人龍，排最前的都是印巴籍人士，並直言門票將用來炒賣。
Eason昨日在記者會上表示知道門票難撲，他說：「我阿爸話上個星期已經有姨姨排隊，每排一日五百，佢幫人買好蝕喎，我同佢講你去排囉，香港一向流行炒嘢。」Eason為避飛債要學人「潛水」，不但要轉電話，就連曾志偉生日會都不敢去，不過他就不了解公開發售門票佔多少成，據行內人透露，紅館演出規定要有兩成門票作公開發售之用，但Eason的工作人員卻否認有此規定。
■陳奕迅無懼當年爆蛋之痛，昨日大膽在蝴蝶模型上行走。
要破學友紀錄
Eason自誇要做足巡迴147場，多過張學友的146場紀錄：「學友用咗17個月去完成，我打算用17年，攤開嚟做。」今次演唱會Eason訂下不安歌、不請嘉賓及不說話的規矩，他表示想由開始到完結也保持完美：「3年前演唱會爛聲，今次想收復失地，我都有同千嬅講過爛聲問題，捐一大筆錢後好番，我上年尾捐咗，心安理得。」
採訪：文國駿、張俊銘
攝影：黃偉雄
■昨早十時多已有數十人在尖沙嘴通利琴行門外排隊撲飛。
■從現場的座位表顯示有近九成門票已被內部認購，僅得一成門票公開發售。
.Eason騷加場冇飛賣 Fans鬧爆
http://hittt.blogspot.com/2013/04/easonfans.html
