始終都係……彭丹！

曾志偉同彭丹好 friend，特登喺節目中，頒個「最佳動作」獎俾佢，送埋金公仔！啱嘅，咁多年，咁多次「一字馬」，無功都有勞吖。

媽咪姐

始終都係……彭丹！

喺娛樂圈中，有啲藝人可能一世都做唔到大明星，我哋難以用言詞評價佢哋嘅演技或者歌藝（事實你都諗唔起佢哋查實做過啲乜？）。但你就一定記得佢哋個大名！夏蕙 BB？全中。不過今次唔係講佢，因為我哋仲有彭丹！

就呢個周二（ 14日）媽咪姐去咗電視城睇最新一輯《獎門人》錄影，然後見到一個有啲熟悉又帶點陌生嘅身影，定一定神，望多五秒，嘩！原來係彭丹呀！呢位現年 40歲嘅「元老級《獎門人》逢請必到嘉賓」，近年長留北京做導演拍主流片（呢，歌功頌德嗰啲呀！），仲做埋甘肅省政協委員㖭！估唔到嘅係，丹丹嘅五官同仕途一樣「可持續發展」，眼闊咗鼻高咗鼻翼窄咗塊面仲尖埋。三個字，撞鬼咯！好在佢嘅廣東話依然半鹹淡、胸前嘅事業仲好震撼，引到見慣世面嘅林敏驄都要一𥄫再𥄫。

係呀，講起彭丹，其實大家都係記得一字馬、拱橋同波神呢七隻字咋嘛。唔講嘞，睇相啦，重溫丹丹未變臉、香港未淪陷嘅那些年經典！

04年一字丹

學舞出身嘅彭丹，喺《繼續無敵獎門人》表演一字馬吹蠟燭。對番依家個樣，嘩，科技發達呀！《蘋果日報》圖片

97年丹橋慶回歸

《蘋果日報》圖片

02年噴血丹心

講丹丹，點可以唔提呢條心心露罅裙，佢可謂娛樂圈時裝史上嘅一大「驚典」！喺紅地毡上俾人影足十分鐘，都未走得呀。

媽咪姐探班時，只見到丹丹挺胸擘髀接波咋。唔知出街時，會唔會有其他驚喜呢？

錄影時，有妹妹仔記者奇怪得閒無事嚟搞事嘅林敏驄，點解喪𥄫彭丹，兩個人又咬曬耳仔？嗱，男人嘛，喪𥄫就梗嘅。再望吓 97年呢張相，丹丹喺林生個 talk show度，表演過招牌拱橋呀！大大話話，識咗十幾年咯。

唔係志偉講都唔記得，《獎門人》呢個節目原來做足成 18年，今次就搵曬歷任「長老」返嚟敍舊。

嗯……係咁意睇番二千年嘅《宇宙無敵獎門人》，發現林曉峰瘦咗嘉樂仔肥咗阿夢（右一）已經「唔見」咗！反而「獎門人」曾志偉真係 keep得唔錯。《蘋果日報》圖片

. 始終都係……彭丹！
http://hot104.blogspot.com/2013/05/blog-post_3928.html. 始終都係……彭丹！
http://hittt.blogspot.com/2013/05/blog-post_5152.html