八卦嘢(八卦野) [八卦o野][日日818] : 港女鬥 cute Fiona 薛凱琪馬張紋嘉鄭融

2013年9月13日星期五

港男影相要 chok，一班性感唔起嘅港女，惟有靠 cute突圍。藝人各出奇謀，發揮港女本色，引人注意。

Fiona對港女十式應該非常熟悉，唔係點會一影相就高舉勝利手勢。本來運動 look小背心都幾吸引，弊在素顏樣同黑眼圈，失色唔少。雖然佢話拍戲忙，但都要保養下，個樣咁殘，識港女廿式都無用。

港姐出身嘅馬賽一向斯斯文文，以為佢有別於一般女生，會以優雅姿態出現。點知佢居然出奇招，將手指夾面珠突圍，原來佢想話俾大家知佢塊面肥咗。為令件事更有說服力，佢仲放埋用美圖 apps整嘅瘦臉效果做對比，真係勇氣可嘉。

現實

美圖後

自從女子組合 HotCha三人分開發展，成員張紋嘉（ Crystal）又出碟又做舞台劇。可能佢嫌人氣始終唔夠，於是夜媽媽整張單眼發電加嘟嘴樣吸納粉絲，果然吸引過百人讚好。

平時屬於好動派嘅鄭融，間中都要使出性感招數博收視。除低口罩，扮咬手指，營造誘惑效果。可惜佢眼神同表情就唔多配合，搞到似被發現食手指，嚇至花容失色咁款。佢用意志打贏病魔，但呢張相，媽咪姐真係不敢恭維。