[忽然1周 951 ENTERTAINMENT] 發牌獨冇 裁 320員工 王維基感觸：我忍唔住（喊） 熱門,王維基,MW,

由 CTI到香港寬頻，「魔童」王維基一直創造奇蹟。今次申請免費電視牌照失敗，令久經風浪嘅佢忍唔住落下男兒淚。

媽咪姐

發牌獨冇　裁 320員工　王維基感觸：我忍唔住（喊）

周二（ 15日）商務及經濟發展局局長蘇錦樑宣布行政會議原則上同意發新免費電視牌照俾有線及電訊盈科，但就唔接納「魔童」王維基旗下香港電視網絡嘅申請！苦等三年，已經拍咗 200小時劇集、 150小時綜藝節目嘅王維基，翌日（周三）中午喺公司召開記者會，表明對政府決定非常失望，並宣布裁減 320名員工（約佔 4/6製作人員）：「我哋同所有香港人一樣，唔知點解政府會有呢個決定！究竟香港仲有冇公義？點解我哋會死得不明不白？你將學生留班、踢出校，你都應該俾個成績表佢睇㗎！

其他影片

「呢個決定係同民意相對嘅。由尋日下晝開始，只係 18個鐘，已經有 30萬人喺 fb撐我哋，民意係非常清楚！你問我有冇喊？我頭先係忍唔住嘅。兩年幾前，好多同事喺我未有牌照之下，放低一份工作，走過嚟幫手，我係覺得我欠咗佢哋！」

其實唔止王生，等睇「香港電視」劇集等咗好耐嘅媽咪姐，聽到政府呢個決定都好想喊，但心裏面嗰把火呢，更加係燒到叭叭聲！當我哋班港媽為仔女撲幼稚園報名表，慘到好似戰時輪救濟米咁款，教育局局長吳克儉可以話係「一般正常行為」；當菲律賓人質事件三年無人理，阿特首仲可以對住阿基諾三世笑騎騎；到依家，我哋只係想舒舒服服返屋企轉下台睇多啲唔同嘅節目，唔使同大班雙非、自由行喺街度逼啫，但原來都係奢求？

我哋受夠嘞！唔該蘇局長唔好再話咩發牌要「循序漸進」，乜嘢「一籃子因素」去考慮。各位一路向北嘅高官們應該聽過毛主席名句「一萬年太久，只爭朝夕」㗎呵，係呀！毛主席嘅話點可以唔聽？星期日（ 20日）上街，還我們香港人的公義！

周三（ 16日）中午十二點，王維基喺葵湧辦公室開記招，過百傳媒蜂擁而至。

王維基話知道發牌結果後，通宵開會，決定裁員。但記招上，思路仍然清晰，聲言唔會收購亞視，並尋求法律意見，下半生都會繼續做創意工業。

王維基坦言依家話員工士氣高昂，大家都唔會信。不過呢日香港電視員工仍高舉名牌，笑住面對鏡頭。

上年 12月，王維基帶同夏雨、廖啟智等於洲際酒店舉行「曬冷記者會」，展示新勢力。

今年 2月，王維基仲率領旗下嘅梁小冰（左三），唐寧(右二）及周俊偉（右一），參加「灣仔馬拉松 2013十公里賽」。如今只剩失望。

港視藝人力撐「魔童」

黃日華﹕

我諗所有「港視」員工都為自己前途擔憂，係一盆冷水淋落嚟！政府為何唔發牌俾「港視」，應該講出原因囉﹗不過都好多謝全港網民撐「港視」。對一個藝人嚟講，喺任何一個地方都冇問題，不過依家都係睇定啲。

廖啟智：

係香港人同華人嘅損失。

艾威：

我哋製作咗咁多高質素節目，咪搵新出路囉，賣番俾 TVB都得！

鮑起靜：

聽到政府嘅宣布好驚訝，雖然只拍咗「港視」一個劇，但發覺王生係想做好電視台，佢旗下應該有 5百幾名員工，會係好大嘅打擊。其實佢哋（有線及 now）要條免費頻道係多餘嘅，政府亦無公布原因，好無奈，要睇王生點面對。

元華﹕

公司（港視）原本通知 11月開工，依家都唔知點。其實依家做嚟做去都係得兩個台，政府呢個動作好奇怪，官字兩個口！

石修﹕

依家仲拍緊「港視」新劇《天網》，暫時嚟講無影響進度。老實講，王先生嘅前期工作，對比其他電視台係做得更好，竟然不獲發牌，覺得好唔公平。

全城怒吼　網民狂插政府

由周二（ 15日） 5點 15分宣布王維基嘅香港電視落選開始，唔少網民隨即喺 facebook怒吼「無天理」，香港政府漠視民意，直至周三（ 16日）黃昏為止，已有 37萬人喺 fb like「萬人齊撐!!!快發牌俾香港電視!!!」專頁！有部分網友要求將亞視嘅牌照轉俾香港電視，仲幫特首梁振英同商務及經濟發展局局長蘇錦樑改圖，狂插佢哋操控發牌！

改圖洩憤

4台有搞作　羅鈞滿盲插王維基

周二（ 15日）政府宣布發兩新牌俾有線同 now， TVB即日發聲明話政府未交代發新牌準則同香港適合幾多間電視台存在，反應審慎；亞視就話王征向董事會提議，再向亞視貸款 2千 2百萬喎。慘，即係仲有排睇《 ATV焦點》以及不停重播啲近乎垃圾嘅節目。而有線嘅梁思浩同 now嘅製作高層梅小青梗係最開心，仲話大把新搞作。不過，《星夢》羅鈞滿唔知係咪輸獎失喪，竟然喺 fb插爆王維基，即刻引嚟公憤！後生仔，擦鞋冇錢途㗎。

周三（ 16日）羅鈞滿無啦啦喺 fb喪踩王維基，結果當然係無乜人 like，但引來大班網友狂插佢。

幫有線主持節目嘅梁思浩，一知道有線獲發牌，即時喺微博曬命話自己簽曬有線同 now，隨即被網民話佢幸災樂禍。

梅小青﹕

我哋好開心 now可以攞到牌，依家做緊第一套劇《大漢賢後衞子夫》嘅後期，已經整裝待發。未來好多大計，遲啲會有公布，亦需要好多人才，歡迎更多「港視」員工接觸我哋。

周三（ 16日）亞視發聲明話王征會再揼錢，仲話黃金時段嘅自製節目多咗 1倍。

其他影片

.[忽然1周 951 ENTERTAINMENT] 發牌獨冇　裁 320員工　王維基感觸：我忍唔住（喊） 熱門,王維基,MW,
http://hittt.blogspot.com/2013/10/1-951-entertainment-320-mw.html.[忽然1周 951 ENTERTAINMENT] 發牌獨冇　裁 320員工　王維基感觸：我忍唔住（喊） 熱門,王維基,MW,
http://hittt.blogspot.com/2013/10/1-951-entertainment-320-mw.html