一片成名 120萬點擊 專訪捱麥記女：我都會講粗口 麥記女,米曹,MF,

女主角米曹

米曹受追捧，佢在 fb中自稱「 fb adding係來者不拒，但對於 Inbox邀請交友就「唔好搞我」，佢叫大家想識朋友唔該「放低電話電腦。」

網上圖片

真面目

一片成名　 120萬點擊　專訪捱麥記女：我都會講粗口

一條知專學生功課片《一生只想尋找一個肯挨（捱）麥記的女人》，上週日（ 27日）喺 YouTube上載，一個星期就累積過 120萬點擊，比 HKTV套《警界線》仲勁。

咁多人 like全因為講中時下年輕人拍拖嘅困境，而戲中兩位男、女主角亦即成為 hit人。戲中純情男主角關公（關銘輝），現實中原來早兩個月先甩拖好陰功，而片中肯同男友捱麥記嘅女友 Mitena Cho（米曹），真人原來極抗佢被稱為女神，她說：「我真人比較粗魯，有時仲會講粗口。」

其他影片

• 《挨（捱）麥記的女人》學生導演：驚畢唔到業
• 《挨（捱）麥記的女人》靚仔男角：板長太貴啦！

上週日（ 27日） YouTube一條《一生只想尋找一個肯挨（捱）麥記的女人》講港仔苦惱搵地方同女友食飯嘅短片，估唔到一條源自一年前潮文的短片，瞬間喺網上瘋傳，唔使一星期已有過百萬點擊。呢條咁 hit嘅片，原來係由兩位香港知專設計學院電影及錄像課程嘅學生李定軒、李文輝拍攝，更係二人畢業作品。不過因為條片內容並非原創，兩位正苦惱修改對白，否則兩人隨時畢唔到業。

120萬點擊

「麥記」片上週日放上 YouTube，至週一（ 4日）已超過 120萬人睇過，連身在英國的女主角米曹都話「好多謝大家支持！」

有人話米曹似新基本法大使王菀之，她表示：「我唔識政治。」估唔到女神又幾有幽默感喎！

今年 5月，網絡作家張晨發表了一篇「麥記」潮文，估唔到事隔 6個月會再成為熱話，部分句子如「好滾動」等，都迅速成為潮語。

最愛魚柳包

條片除咗引起一眾巴打、絲打共鳴，片中女主角 Mitena Cho（米曹），因肯食「 21蚊麥樂雞餐冇加大，仲冇加 3蚊換檸檬茶」而成為女神，加上米曹外形夠 cutie，好快成為網友人肉搜尋對象。

今年 18歲嘅 Mitena Cho現喺英國設計名校 Central Saint Martins讀緊基礎課程，平時有玩開話劇嘅佢，今次因同導演係朋友，而搭膊頭演出。對於被封為女神，米曹非常抗拒。除了在 fb中說「女神係應該唔會屙屎但我會。」外，米曹上週接受本刊訪問時，她說：「我好怕人叫我女神，同埋我真人好粗魯㗎，好男仔頭，有時仲會講粗口。」

雖然自爆會講粗口，亦聲稱冇戲中女神咁溫柔，但出身小康之家嘅米曹，絕不介意同男友食麥記，她說：「我好鍾意食魚柳包、軟雪糕。我拍拖唔會睇人嘅背景，而係睇個人嘅性格，我同男朋友食過麥記，十幾蚊碗魚蛋粉都試過啦，我唔覺得捱喎。好好食喎，不過𠵱家冇拍拖。」對於《麥記女》片推旺麥記，麥當勞方面則未有回覆。

學界影後　

米曹（中）自小有玩話劇，上年仲拍咗條片叫《我的跟班同學》。該片仲喺學界比賽得獎，米曹仲攞埋「最佳女主角」。

網上圖片

有米之家

米曹自稱小康之家，不過去得倫敦 Central Saint Martins讀書，加上在 fb內有張佢屋企大門相，應該唔係一般小康咁簡單囉！

網上圖片

麥記仔拍完片即甩拖

「麥記」短片除咗女主角米曹被人關注，片中男主角亦一樣有人談論，查實人稱關公的關銘輝，現讀浸大一年級，每月得 1,500零用係正宗窮苦學生，拍完短片，仲同女友散埋。

關銘輝自言《一》片演出得 50分，他說：「片入面我木口木面，講對白有懶音，其實做得好差。」外形算靚仔的關公，每逢同學仔要幫手拍嘢，關銘輝一定唔托手踭。

現時單身嘅關銘輝，表示冇時間拍拖。除咗上堂，做兼職，仲忙緊做 project。訪問當日就忙緊剪輯一條自製喪屍片。

18歲關銘輝現喺浸大讀電影系一年班，又跟《葉問》攝影師柯星沛（小圖）學師，佢話做幕後嘅夢想不變，最希望有日做導演。

《葉問》攝影師柯星沛

關銘輝身高 5呎 10，加上濃眉大眼，讀中學時已相當受同學仔歡迎。

公屋出身的關銘輝（關公）現於浸大電影系一年級，原來對幕前演出，關公不感興趣，只愛做幕後工作，他說：「今次第一次做戲，自己覺得幾生硬，好彩啲網友都客氣。幫朋友玩吓就得，同埋暫時都冇人搵我做戲，但我始終鍾意幕後多啲。」片中為拍拖搵地方食飯而煩惱，他說：「我其實唔鍾意食麥記，太熱氣喇，我未試過為搵地方食飯而煩惱。」

每月$1,500零用

一片成名，但關公冇諗過做幕前，現時每月只得$1,500零用錢嘅關公，亦要靠兼職搵錢，上星期仲跟《葉問》攝影師柯星沛開工，邊做邊學。對於板長等「高級」餐廳，關公更加唔敢帶女友去，他說：「就算板長、一壽司呢啲日本菜，真係諗都唔敢諗。」

最憎拜金女

戲中他為女友而煩，現實中關公原來啱啱甩拖，更加最怕拜金女。他說：「最怕就係啲貪錢港女，要男仔帶佢食貴嘢又要送名牌先出街，我最憎。」 6月甩拖，事隔 5個月依然未溝到女，他說：「返學、做 project，又要出去兼職，瞓都冇時間，拍乜鬼拖！基本上見到個女仔成身名牌，都一定知自己冇行啦！唔會諗，所以未試過為搵地方食飯而煩。」

想搵鄭子誠配音

《一》片過百萬點擊，就連潮人卓韻芝都 facebook私信佢哋讚好， 18歲導演李定軒表示：「我哋呢套係畢業功課嚟，冇諗過會有咁多人睇。芝 see菇 bi叫我哋參加 IFVA（獨立短片錄像比賽）比賽，可惜我哋截止當日先擺上網，所以冇得參加。」條片咁 hit，連佢哋阿 sir都讚，可惜作品並非原創，二人隨時畢唔到業，他說：「阿 sir話要改過啲對白，仲要喺 11月前搞掂，否則我哋兩個就畢唔到業，我哋仲想搵鄭子誠配音。因為佢把聲實在太正！」

獨家蝦碌片

成班友拍短片，自然勁多蝦碌嘢， 2位導演就提供咗條 NG片，畀《 FACE》讀者率先睇。

兩位導演表示拍《一》片最麻煩搵場地，最後行咗 3日，先搵到青衣美膳坊茶餐廳幫手，唔收分毫先拍得成：「之前有餐廳 3個鐘收 500蚊，我哋邊畀得起。」而條片喺荃灣大河道麥記拍攝，就當然冇申請偷雞拍啦！

兩位導演想搵音樂情人鄭子誠聲音導航，但子誠暫時未表示興趣。

鄭子誠

戲中飾演「歷史塵埃女友」叫區思晴（ Jessie），係導演李定軒朋友。雖然做乞人憎港女，但據米曹稱 Jessie其實好愛食麥記。

區思晴 18歲

片中所有演員全部係導演啲朋友，第一個唔肯食譚仔女叫周巧柔（ Kathy），為導演李定軒同學。

周巧柔 18歲

抽水片近 30萬

《麥記女》有過百萬點擊，一向愛抽水嘅 YouTuber伍仔，亦極速拍咗條片《不願再遇上一個與我一起吃 M記的女人》，雖然跟人口水尾，但都有近 30萬點擊。

而本地短片始祖司徒夾帶對《麥記女》亦讚口不絕，他說：「全部都係素人演出，真實感好強。拍攝技巧唔算好專業，但佢哋勝在簡單，冇多餘嘢。」

我對篇潮文內容有啲唔同意，嚟緊都會拍條片講吓。

真實對白

伍仔新片

. 一片成名　 120萬點擊　專訪捱麥記女：我都會講粗口 麥記女,米曹,MF,
http://hittt.blogspot.com/2013/11/120-mf.html. 一片成名　 120萬點擊　專訪捱麥記女：我都會講粗口 麥記女,米曹,MF,
http://hittt.blogspot.com/2013/11/120-mf.html