正印直斥馬賽不擇手段：「佢係披住兔皮嘅狐狸。」 馬賽,熱門,M1,

探熱針

正印直斥馬賽不擇手段：「佢係披住兔皮嘅狐狸。」

小三馬賽早前被拍到與 TB富婆汪子琦上海火辣啜爆，擘大眼否認攣情的大話隨即被踢爆。形象插水，無綫第一時間將她收埋洗底；至於三角關係的另一主角，連日來都保持沉默，不過大話精馬賽日前又出招，在微博明寸正印 Laura Lee。

忍無可忍， Laura終於發聲，大爆被指純如白兔的馬賽如何不擇手段，部署埋身搶她的另一半：「佢係披住兔皮嘅狐狸。」

其他影片

極速解凍風騷

攣情被踢爆而被無綫勒令放假兩個月的馬賽，上週搞掂高層樂易玲極速獲解凍，可以繼續接拍汪子琦投資的電影外，又安排出席活動。風騷翻生，馬賽先在微博開腔，以張愛玲金句：「因為懂得，所以慈悲。」並貼上一對情侶熊仔，暗認攣情。粉飾做小三惡行，用慈悲兩字為自己解脫，唔認錯死撐到底。

歪理變真理！遭搶走「男友」的正印 Laura Lee，決定打破沉默，於本週一在微信貼上一張諷刺三人歐遊的圖畫，回贈十二箴言：「白兔外表，慈悲糖衣，內裡藏刀。」

馬賽小三身份呼之欲出。 Laura Lee透過電話向本刊親證外形柔弱的馬賽，實質是「悍匪」一名，為搵機會上位，不擇手段橫刀奪愛。

馬賽暗認

本週日（ 11月 10日），匿埋多日的馬賽終在微博，以張愛玲金句及放一對熊啤啤情侶暗認攣情。而熊啤啤正是汪子琦的收藏物。

本月初，馬賽再飛上海與汪子琦癡纏。二人由餐廳嘴到黃浦外灘，甜蜜到爆。返港後她講大話回應攣聞：「傳媒斷章取義，時間證明一切。」結果攣情曝光，時間證明她變攣兼係小三。

放聲氣愛女人

壹：馬賽係你同汪子琦之間嘅第三者？

李：係！難為佢仲可以厚面皮以慈悲形容自己。似乎佢只係對自己慈悲，唔明做人第三者，點解仲講呢啲說話，逼我飲呢杯苦酒，傷害人一啲慚愧都冇。

壹：歐洲三人行之旅，變成引狐入室？

李：呢個旅程令我上咗一課，體會什麼是「披着兔皮的狐狸」。佢處心積慮咁破壞一段關係。喺歐洲之旅中段，我開始發現有啲怪，因為食食吓飯佢忽然講：「我媽咪好擔心我有一日會鍾意女人。」但我見佢仲有男朋友（傳聞中的東莞富家子簡建鋒），佢又俾我睇佢手機入面男友 send俾佢嘅短訊，兩個互稱老公老婆，佢仲話買咗個 Chanel手袋，返去 claim男友錢，所以我無防範。依家當然明白，佢咁講係向汪子琦放聲氣。去到最後羅馬一站，佢忽然打扮得好靚好性感，又趁我行到留喺房休息，就把握時機捉住汪子琦去行街。

打破沉默

在法國，汪子琦把外套給正印 Laura取暖，仍然甜蜜。但馬賽乘歐洲之旅介入後，此情不再。

正印還擊

馬賽一句慈悲開腔，刺激正印 Laura即在微信甫上一張諷刺歐洲行變引狐入室的啜核圖畫，並以十二箴言「白兔外表，慈悲糖衣，內裡藏刀。」還擊。

正印 Laura指馬賽歐遊，連買一杯雪糕都唔會俾錢。相中發現馬賽五官似有執過之嫌。

個半月飛上海五次

原來歐遊時，馬賽仍跟內地有「東莞李嘉誠」之子，「鼎峰集團」太子爺簡建峰拍拖，但攣情爆出後，她即被對方狠飛。

壹：你幾時發現佢哋背住你搭上？

李：係八月尾歐遊完。之後我要即刻飛去美國一星期處理私人事，當時馬賽仲呃我話返重慶探阿媽，但原來佢留喺上海搵汪子琦。之後我返到上海，發現汪子琦手機轉曬密碼，每日 WeChat收成百條訊息不停響，每晚不停有電話打俾佢，我仲發現不停打嚟嗰個原來係馬賽，但當時我仲諗：「唔通佢哋有好多公事要傾！」

以往長假期，汪子琦一定陪我過，但今年十•一國慶，佢話要去香港做嘢，我就開始懷疑。後來我 check到，馬賽喺短短個半月裡面，飛嚟上海五次，一個月有二十日留喺上海。嗰刻我終於 sense到咩事！

香港攤牌

壹：據聞你係飛嚟香港攤牌！

李：我 sense到之後，有質問汪子琦係咪有外遇，個女人係咪馬賽？佢當時死撐話我諗多咗，大家仲嘈交。之後我搵到好多佢哋偷情證據，但呢刻我唔想講係乜嘢。汪子琦之後再去香港搵馬賽，仲喺微信寫咗：「此情只待成追憶。」暗示我哋分手。但其實我同佢未正式分手，於是我去香港同佢哋攤牌。

三個人喺酒店 coffee shop一間包房見面，馬賽一見我，竟然第一句：「我想攬吓你！」當刻我好 shocking！馬賽唔單只好戲，機心仲好重。佢咁做無非想刺激我，等我忍唔住喺汪子琦面前失控，好彩我喺公眾地方可以忍得住。唉……（ Laura不禁嘆了口氣）佢知道我有證據，紙包唔住火，就好得戚咁向我承認佢同汪子琦九月已經喺埋一齊。

富家女 Laura，唔單只用情專一，連身上所穿的，都只鍾情 LV。

馬賽介入前，汪子琦跟 Laura經常騷甜蜜照。七月 Laura生日，汪子琦送上祝福並叮囑女友要每天愛她多一點。

馬賽曾跟巨星大孖周志文傳緋聞，當時其正印 CoCo跟 Laura企出嚟鬧爆馬賽係小三。

上海富婆毛玉萍雖是汪子琦表姐，但對表妹與馬賽暗撻一事表示事前全不知情。

四十萬請歐遊

被正印當面踢爆偷情後，馬賽索性脫下一直假裝的純真面具，囂張講數。

李：佢嗰張嘴臉跟歐遊時純真表現完全兩個人。佢好得戚咁同我講：「汪子琦同我一齊好開心，你退出啦。」我反問佢，我點解要放手？佢就話：「佢都唔愛你，仲同佢一齊做咩呀！」嗰刻汪子琦好尷尬，一直冇出聲。

馬賽變臉表現令我好心寒。當日我當佢係朋友，歐洲出發前佢飛嚟上海 join我哋，我仲親自去接機。喺車上佢話覺得我好本事，當我偶像。我見佢有理想，戲又演得幾好，都打算幫佢；點知佢真係戲如人生，先贏取我嘅信任，背後搶我嘅嘢，不擇手段撬走我嘅另一半，為咗令汪子琦俾更多機會佢上位，毀我哋關係。

攤牌只求一個真相。得知一切，包括馬賽真面目後，重創的 Laura Lee翌日便飛返上海。

李：由發現到證實，短短幾日嘅劇變，一時間好難接受，汪子琦擔心我情緒，所以第二日佢陪住我飛返上海。點知馬賽即刻搭一下班機追嚟拑實汪子琦，太恐怖。我做生意見人都唔少，但癲到咁嘅人我真係第一次見，好得人驚，我唯有分手。

壹：有傳歐遊係你出錢，花四十萬請埋馬賽去玩？

李：我可以講，汪子琦同我一齊冇使過我一分一毫。過時過節佢亦有送禮物俾我。（咁馬賽歐遊有冇出過錢？）哈哈，（冷笑兩聲）佢連一杯雪糕都唔會出錢買。

原本樂易玲嬲爆馬賽隱瞞她的攣情，聲言勒令她放假兩個月。但日前她改口風，指馬賽將出席活動，火速解凍。

出埠玩

雖遭公司雪藏，但據知近日馬賽向樂易玲請假一個月出埠玩。

收名牌禮物

壹：汪子琦有喺馬賽身上使錢？

李：我知有。我記番起佢哋撻着初期，佢喺微信 post咗一首歌叫《我不要 Tiffany》，好似話俾人聽佢唔愛物質；但佢梗係唔要 Tiffany啦，因為佢要嘅係卡地亞、 Hermes。（上海啜爆汪子琦的馬賽的確富貴用新 Hermes，回港出席活動時，手上亦戴住卡地亞戒指。）喺歐洲時，佢放聲氣話 Chanel嘅 J12係佢 dream watch，但唔捨得買，之後佢終於 dream comes true。因為早排佢喺微博放咗張戴住呢隻錶，攬住熊公仔影嘅相。

壹：汪子琦同馬賽喺上海啜爆相見光後，你有咩感受？

李：傷心一定有。雖然早知道佢哋關係，但知同睇到係兩回事。睇完條片，感受就係馬賽將自己快樂建築喺別人痛苦身上。由始至終我知佢主動，睇完條片更肯定。馬賽咁狼，汪子琦抵唔住誘惑係人之常情。

壹：點解分手仲可以做朋友？

李：無咗愛情，都有親情。汪子琦有才華，亦係一個大細路。我承認我係脾氣大，嗌交一定有。我同汪子琦一起多年，經歷咗好多嘢，共過患難。我永遠希望佢好，生意上仲可以合作。

壹：你會原諒馬賽嗎？

李：可以咁講，佢冇資格留喺我腦海中，但傷痛係需要時間平復。我今次交代曬一切就夠，我從商，馬賽介入已經打擾我嘅生活，希望之後可以過番平靜生活。

卡地亞情侶戒

跟汪子琦拍拖後，馬賽變得富貴。回港發現手戴卡地亞戒指。

Hermes袋

上海會「情郎」第二日，即收到 Hermes新手袋。

Chanel J12名錶

戴住汪子琦贈送，約值五萬的 Chanel手錶，即拍照放上微博曬。

低調富豪

汪子琦富婆前度 Laura Lee，家族是香港低調富豪，擁有私人飛機、遊艇，在美國出生兼長大的她，一直過着富貴生活，十年前移居上海後，以玩票性質跟汪子琦夾份投資開設娛樂工作室，不過全權交由另一半打理。工作以外，二人經常遊山玩水買名牌，拍住拖歎世界。

. 正印直斥馬賽不擇手段：「佢係披住兔皮嘅狐狸。」 馬賽,熱門,M1,
http://hittt.blogspot.com/2013/11/m1_6091.html. 正印直斥馬賽不擇手段：「佢係披住兔皮嘅狐狸。」 馬賽,熱門,M1,
http://hittt.blogspot.com/2013/11/m1_6091.html