縮骨數 二打六貼錢攞台慶車 M1,

探熱針

縮骨數　二打六貼錢攞台慶車

無綫 46週年台慶，收視跌破新低，平均只得 29點，為挽救插水形象，無綫兌現承諾，捐出三百萬做善事。捐錢唔敢手軟，但為重新整頓公司士氣、台慶夜獎金獎品加碼鼓勵員工，無綫就施展一招彈弓手。

據了解，當晚抽中價值 33萬歐洲房車的二打六黃得生，事後發現原來公司唔包十多萬汽車首次登記稅，他要抬錢倒貼，才可以揸走獎品。此外，無綫見香港電視發牌無望，於是又再向員工開刀，計劃改動計騷方式，由半個鐘一騷改為一個鐘一騷，變相減薪。

抽到喊三聲

上週無綫台慶，為對抗熄機行動，破天荒下令四百藝人出席撐場，人人有份抽獎。其中一份價值三十三萬 Audi房車，最後由四線藝人、曾經在電視劇《點解阿 sir係阿 sir》中演壞學生的 Ocean仔黃得生抽中。以為天降財神，原來開心得太早。

「 Ocean仔（黃得生）初時都好開心，後來先知公司唔會幫佢俾汽車首次登記稅，即係要自己倒貼十幾萬出嚟，先可以揸部車出街，實質架車價係廿萬左右，但就講到值三十三萬，大家都估唔到公司縮骨到咁。至於啲鑽石鏈、手錶嘅獎品價錢，原來都係報大數。」知情者說。

黃得生（左一）跟吳卓羲、楊怡及陳豪在《點解阿 sir係阿 sir》合作過。

阿叻曾豪氣表示，做港姐有十五萬騷錢，本刊之後再求證他是否一騷一千蚊，他又承認：「係，我有兩個騷價。」究竟邊個價至真？

變相減薪

一不離二！據知年前大幅加薪力抗王維基銀彈搶人的無綫，近日見對手發牌無望，於是又度出「辣招」，諗縮數慳錢。

「好多同事都收到風，公司打算改計騷方法，以往我哋出鏡半個鐘計一個騷，日後變為一個鐘一個騷。之前肯留低冇走班藝人，雖然有大幅度加薪，但如果改一鐘一騷，就變相減薪。最唔抵係幫公司拍廣告雜誌，例如康業信貸同 OSIM，出鏡一兩分鐘，只係計 0.1個騷或者 0.2個騷錢，但廣告費就公司全部袋曬，秦沛因為咁曾經同公司嘈過，不過都冇用。而家香港電視冇牌，公司更加有恃無恐，睇死我哋走唔鬱。」無綫員工透露。

台慶唔係人人有騷計，不過無論阿姐定曾志偉，都係得 0.2個騷錢。

阿佘同鄭嘉穎「復合」行節目巡禮，原來又係白做無騷計。

如果阿叻騷錢十五萬一個，其他藝人如只得幾千蚊一騷的 Do姐，點解又咁唔值錢呢？

以資訊形式出現的一分鐘廣告，一線藝人唔使拍，其餘都無一倖免。

台慶冇騷計

計騷方法無準則，台慶夜奉命撐場的藝人，原來亦非人人有騷計，甚至要貼錢開工。

「台慶嗰晚唔係所有藝人都有騷錢袋，公司講明，有份上台或者有表演節目，先有 0.2個騷，至於點解會咁計法，冇人知亦唔會有人解釋。嗰晚好多藝人都係收 order返公司，坐足成晚冇錢落袋。三四線嗰班仲要出錢買衫搵人化妝整頭，貼錢開工呀。」知情者說。

廖啟智公開指責無綫冇珍惜藝人，梁乃鵬即答應四大改革，薪酬工作時間合理等，不過至今未有一項達標。

縮骨事件簿

無綫縮數辣招層出不窮，多得有「大內總管」之稱的李寶安嚴密把關，唔單只揸乾藝人騷錢，就連玩遊戲節目，獎金同樣收唔足。

一折收獎金

藝人參與公司遊戲節目，天文數字獎金價碼原來得個樣。佘詩曼試過在《一擲千金》贏到五十萬獎金，但結果只有一折落袋，五萬蚊連請人食飯都唔夠，要自掏腰包使凸。

碌主持卡

過往有不少清談節目為慳錢，公司會要求主持搭膊頭搵相熟圈內朋友接受訪問，嘉賓只有一百蚊車馬費落袋，後來更演變到送 TV Buddy膠公仔答謝。

. 縮骨數　二打六貼錢攞台慶車 M1,
http://hittt.blogspot.com/2013/11/m1_1576.html. 縮骨數　二打六貼錢攞台慶車 M1,
http://hittt.blogspot.com/2013/11/m1_1576.html