八卦嘢(八卦野) [八卦o野][日日818] : 留戀忘年前度　黄子華盛男剖白：我哋有聯絡 MF,

2013年11月27日星期三

留戀忘年前度　黄子華盛男剖白：我哋有聯絡 MF,

一支公嘅黃子華上週六（ 23日）離開何文田恒信園寓所後，見有大批傳媒追訪，立即一支箭咁喪跑避記者，點知撇唔甩，惟有坐喺樓梯無奈地表示：「我只係想飲杯咖啡啫，咁都唔得？」左臂仍見他的潑墨紋身，範圍至背的潑墨紋身，有說是不堪情傷打擊而紋。

封面

留戀忘年前度　黃子華盛男剖白：我哋有聯絡

由黃子華孭飛嘅《 My盛 Lady》本週首播，劇中嘅佢女人緣暢旺溝女易過食菜。但現實中子華其實相當長情，自去年 9月喺 facebook交代與拍拖 10年女友溫安妮和平分手後，子華年多以來冇女埋到身，只因佢對舊愛念念不忘，直言：「同佢仲有聯絡。」

才子求愛未急，買樓卻相當進取，之前買樓屢有斬獲的子華，今年 6月靜靜雞一擲 2,400萬買入天後廟道雲峰大廈。貴為高登神級偶像，大手入市信心盡現，不過子華卻溫馨提示：「唔好跟我買樓呀，我買咩跌咩，正一明燈。」定係驚人搭沉船呀？

子華近年體重備受關注，他表示只係鍾意跑步啫，身形紙咁薄的他說：「我身體好 fit，你見運動員好多個身形都好似我咁。」

4年冇拍無綫劇嘅 53歲黃子華，本週有新劇《 My盛 Lady》上映，劇中飾演形象花弗嘅盛女教主，專幫盛女解決愛情問題，但現實中才子一向專一唔亂換畫，其中跟細他 16年的化妝師前度溫安妮拍拖，戀足 10年可惜最終在去年分手。

唔信婚姻

今年 37歲的化妝師溫安妮，同子華拍拖一向低調。有傳因當年女方迫婚不遂最後分手收場。自細父母離異的子華，母親改嫁後跟繼父亦關係麻麻，故子華曾自言一向不相信婚姻。知情者說：「其實安妮知子華唔鍾意公開，所以佢都刻意保持低調，佢又乖女又慳家，但佢嗰時年紀都唔細，女仔始終想結婚，可惜子華唔肯，結果兩個咪分手囉！子華都覺得對個女仔唔住。」

難怪去年 9月子華喺 facebook交代分手一事，之後更將名下何文田文星樓單位送畀女友溫安妮作補償。

宣布單身嘅子華至今都未有著落，最大嗜好就係跑步。上週三（ 20日）子華一支公到何文田山跑步，跑足 45分鐘，據知分手後每日跑步已經成為佢習慣。

對於仍未忘舊愛，週日（ 24日）子華出席《 My盛 Lady》記者會時亦承認二人仍保持友好關係，子華說：「我一向都唔講感情嘢，同佢間唔中有聯絡，我哋係好朋友！（當年因安妮想結婚所以分手？） Hey！呢啲唔再講喇！」

20/11 5:43pm

由屋企跑上何文田再返家，跑咗接近 1個鐘，據知子華幾乎日日跑不過兩支光管腳卻超級幼，回程見到記者，仲識揮手示好。

6:00pm

跑落山時子華喺旁邊拉筋兼回氣，始終子華成 53歲，氣力係有點不繼。

6:30pm

幾乎 2年搞一次棟篤笑的子華，近年開始北上掘金，最近的《洗燥》內地騷，已經自動將內容河蟹。

才子長情

黃子華經常喺楝篤笑講男女愛情觀，金句多之餘，態度亦比較輕佻，但現實中嘅佢相當長情。除咗模特兒女友劉婉君外，近十年的女伴只有任職化妝師嘅溫安妮，可惜去年 9月子華喺 facebook交代已同劉和平分手。

講犧牲　 95年《棟篤笑雙打之玩無可玩》

男人嘅犧牲，就為咗追求美麗；而女人嘅犧牲，就只係得到一個麻甩佬！而最偉大嘅係佢哋根本唔覺得係犧牲。

夠新鮮　 07年《越大鑊越快樂》

𠵱家啲人溝女，對條女最大嘅要求係乜啊？

唔係靚，最緊要，係夠新鮮！

一夜情　 07年《越大鑊越快樂》

男仔對愛就好隨便，愛同鍾意都冇分別，只要佢知道你鍾意佢，即刻可以帶你返屋企，或者去你屋企。

子華同任職化妝師嘅溫安妮，拍拖超過 10年，可惜最後分手收場。《忽然 1周》圖片

黃子華憑《男親女愛》彈起， 01年當時子華同任職 model嘅劉婉君拍拖；及後有指劉同一消防員有曖昧，其後劉更懷疑為情自殺。《蘋果日報》圖片

過海買舊樓

今年 6月子華以 2,480萬買入嘅港島天後廟道雲峰大廈外，一改佢多年來都鍾情何文田區物業嘅習慣。其實佢現居恒信園、送畀舊愛溫安妮嘅文星樓及 97年以 236萬買入、 07年 280萬賣出嘅自由道物業，全部都喺何文田。不過就好少炒樓賺大錢，反而投資股票多，之前亦有指佢買雷曼損手，難怪佢自稱明燈。

恒信園

文星樓

摸頂

自認明燈

劇中蝦頭除咗同子華激吻，更會做徐子珊情敵，一齊爭子華。

冇愛情除咗工作外，子華一向有鋪買樓投資癮。雖然佢喺 09年《嘩眾取寵》楝篤笑都講過：「 4次嘅金融風暴，我 4次都瀨嘢（中招）， 10年裏面瀨過 4次嘢，人生有幾多個 10年啊？我一個都頂唔順……」不過今年 6月原來子華靜靜雞以 2,480萬一炮過買入天後廟道雲峰大廈單位。

本刊連日來依然拍得子華在何文田恒信園出入，明顯新居以作投資居多。他說：「關於財務嘅嘢，大家真係唔好跟我買，我買咩跌咩，正一明燈嚟！（即係天後單位買嚟炒？）都話咗係明燈咯。」其實子華多年來買樓有賺冇蝕，現住的恒信園單位，當年以 633萬買入，現市值 931萬，明冚身家就真。

欽點蝦頭拍《 My盛》

《 My盛 Lady》除咗睇黃子華個人騷外，劇中幾位女角如徐子珊、陳敏之、高海寧都有唔少露肉場面。據知最搶卻係最尾 3集嘅詹瑞文徒弟蝦頭（楊詩敏）。佢飾演子華前度，更要同徐子珊爭子華。有傳蝦頭係黃子華欽點入劇，而楊思敏亦表示同子華相識多年，她說：「同子華識咗超過 10年，今次係監製文偉鴻話想用我先，咁子華有幫手聯絡我，我同佢有激吻戲㗎！」