八卦嘢(八卦野) [八卦o野][日日818] : 劉愷威楊冪結婚　廖碧兒大方祝福廖碧兒,MW,

2013年11月15日星期五

39歲劉愷威同 27歲楊冪， 2011年拍《如意》撻着，直至 2012年初，兩人先公開關係，正式成為情侶。

劉愷威同楊冪呢對圈中情侶，自 2012年初公開戀情後，一直愛得黐纏，仲經常傳出婚訊。好囉好囉，有情人今次真係拉埋天窗。周三（ 13日），劉愷威、楊冪各自喺微博公布婚訊，大曬甜蜜婚戒之餘，並宣布於 2014年 1月 8日舉行婚禮。

榮升老爺嘅劉丹笑曬口同媽咪姐講：「我知佢哋註咗冊，依家安排緊邊度擺酒。我俾新抱 110分，我老婆話 200分㖭。」至於舊愛廖碧兒亦好大方，喺新人公布喜訊後幾個鐘，即喺微博留言恭喜。媽咪姐記得陳豪結婚嗰陣，碧兒反應慢兩拍。同人唔同命，同為舊愛唔同待遇，碧兒都幾均真喎。

劉愷威感性爆喜訊

劉愷威周三（ 13日）公布婚訊，並留咗一大段感性說話，骨痹！

楊冪曬婚戒

老公留言冧爆，榮升劉太嘅楊冪就好實際，上載結婚戒指相，同大家分享喜悅。

廖碧兒快速恭賀

同劉愷威拍過 3年拖嘅廖碧兒，喺婚訊公布幾個鐘後留言恭喜。比起陳豪結婚時嗰種愛理不理、要傳媒追問先開口祝賀嘅態度，真係截然不同。

老爺劉丹等通知

丹爺話一早知阿仔同楊冪結婚：「不過佢哋朋友多，應該要幾個地方擺酒。我都係等通知。」粗重嘢留俾後生做，你專心飲杯新抱茶咪得囉！