綠葉王：麥子樂跳槽 孤注一博

翻查資料，讀無綫藝員訓練班出身的麥子樂已入行10年，演出過數十齣電視劇，可惜觀眾說得出的沒幾多套，直到去年他在《雷霆掃毒》中飾演毒後徐子珊的智障弟弟而惹人注目，但原來早在去年5月，他無聲無息與無綫結束了賓主關係，轉投王維基的香港電視。麥子樂坦言離開不容易，舊公司對他不薄，但為了將來，他寧願孤注一擲博一鋪！

撰文：何慧斯

■麥子樂由無綫跳槽到王維基的香港電視，他坦言舊公司對他不薄，但為了前途，他寧願博一鋪。

攝影：陳志嵐

■在《雷霆掃毒》中，麥子樂扮演徐子珊的智障弟弟，表現令人讚賞。劇照

現年32歲的麥子樂簽約王維基的香港電視後，第一個工作便是返內地拍微電影，接著又與黃日華合作新劇《開腦儆探》，他日前說：「好開心新公司真係畀機會我，但我冇諗咁多，淨係覺得有機會用到學過嘅嘢。你問我想唔想紅，我梗係想，做得呢行邊個唔想紅，但都要觀眾同導演鍾意，希望佢哋睇到我有盡力。」

當初從無綫跳槽到香港電視會有掙紮嗎？麥子樂說：「事前當然有掙紮過，舊公司對我不薄，我唔係最好嗰個，但亦唔係最差嗰個，每套劇都有啲戲畀我做，我算好彩，不過我已經30幾歲喇，想試嚇出去睇啲新嘢，再唔博唔知將來會點。」

「以為做戲好容易」

眼前的麥子樂似乎著緊每個機會，即使一個訪問，也不難感受到他的認真和緊張，原來他曾因年少氣盛而窒礙演藝發展，他有感而發說：「嗰陣細個唔識諗，可能我係孻仔，屋企人由細錫到大，讀書最叻嗰次係考第七，去到中五有人叫我不如試嚇唱歌，點知間公司突然轉咗，嗰陣真係失望到爆，結果我冇得唱咪停咗喺度，都冇諗過做嘢，冇錢咪攤大手板問屋企攞，後來先幫個朋友做幕後製作，點知仲衰，乜都唔識做，做咗一段時間叫我不如去試鏡。」

■佘詩曼是麥子樂的契姐，她曾引薦麥子樂拍《火舞黃沙》。微博圖片

其後雖然報讀無綫訓練班轉投電視圈，但麥子樂當時仍未察覺自己的問題，他說：「我初初入行以為做戲好容易，完全唔覺得有幾難，嗰陣唔好話係hea住做，不過都係冇心，好多人話小角色都係角色，但我未認同過，可能我永遠都企後面，個心點都有啲唔舒服，再加上訓練班係令人發明星夢嘅地方，因為全部人都好注重你，班上每個老師又好顧住你，行出嚟實習先知係兩個世界，實會經過唔開心同辛苦嘅階段，我有諗過放棄，問自己係咪真係鍾意做戲，啱啱入行係發明星夢，最想係紅，唔知做戲係乜，但越嚟越覺得就算知道又如何，又唔會突然畀個位你，呢啲咪挫折囉。」

■麥子樂與黃德斌稔熟，兩人最近也在《天梯》中合作。劇照

黃德斌鞭策咪沙塵

直到契姐佘詩曼的關係，引薦麥子樂拍戚其義監製的《火舞黃沙》，慢慢與黃德斌混熟，結果對方鞭醒了他，他笑說：「我幾鍾意俾佢鬧，我成日諗唔開心嘅事，但一同佢哋傾偈，俾佢哋鬧嚇同鞭策嚇就唔會有事，佢哋覺得咁小事都會唔開心，點跳出嚟呀？呢個係正能量嚟。」他還笑說：「Kenny（黃德斌）覺得我以為自己好勁，所以叫我唔好睇輕啲嘢，佢話如果好輕易咁一步攞到就企唔穩，仲成日問我想做偶像派定實力派，我梗係想人哋話呢個?仔真係得喎，但?家我想係偶像派，可能我對自己冇乜信心，如果人哋覺得我好，自自然然覺得自己啲嘢好，信心自然更加好。」

重提《雷霆掃毒》的演出，麥子樂說：「嗰陣我有做過搜集，唔可以做到好似阿旺，咪睇嚇啲小朋友點樣講嘢，有幾場戲真係好感動，睇番都有淚水，不過?家我唔鍾意，如果畀我再做會好過以前，覺得自己有啲位做少咗，唔應該咁做。」

人物誌：演智障弟獲讚

■初入行時，麥子樂以為演戲好容易，現在他沒那麼沙塵了。

■麥子樂（左）和黃日華合作拍香港電視新劇。

現年32歲的麥子樂02年從第18期無綫電視藝員訓練班畢業後，便加入無綫，參與演出過《火舞黃沙》、《鳳凰四重奏》和《巾幗梟雄》等劇，去年憑無綫劇《天梯》和在《雷霆掃毒》飾演徐子珊的智障弟弟而獲得觀眾讚賞，不過去年5月他已結束跟無綫的賓主關係，過檔王維基的香港電視。

.綠葉王：麥子樂跳槽 孤注一博
http://veryy8.blogspot.com/2013/01/blog-post_8855.html