我主場：周麗淇怕嫁錯郎
扭開電視機，三色台剛剛播著一套劇集宣傳片，聽到有人大叫「我又失戀了」，然後畫面是一個周麗淇（Niki）的近鏡，她斬釘截鐵說：「唔嫁好過嫁錯！」
33歲的周麗淇樣靚身裁不正，未婚，自稱單身，嗜好是工作再工作，工作狂，應該是一個小富婆。生活態度，我行我素，做人做事憑感覺，追求高質素生活。感情方面，戀愛態度認真，對配偶有要求，拍拖憧憬結婚，然後生仔組織家庭，從種種跡象顯示，周麗淇被確認為「黃金剩女」。
周麗淇本人直認不諱，說：「段宣傳片吸引咗你？好多人都有問我呢個問題，嗰幾句對白其實都係我心聲！」
《女警愛作戰》，肯定是度身定做！
撰文：楊潔雯
■黃金剩女周麗淇對擇偶有要求，拍拖憧憬結婚。
攝影：仇志中
有一日周麗淇收到監製張乾文和編審關皓月來電，看到來電顯示，Niki心想：「嘩！應該有劇拍喎！」她立即接電話，兩三句開場白之後，監製單刀直入說：「個角色係一個叫呂霏俠，背景係一個衝鋒隊女警長，30歲，踏入中女行列，係嫁唔出，同埋佢係被標籤為剩女，個人好衝、好博，但係感情唔如意。」Niki一邊聽，腦入面不停打轉，監製正等待答覆的時候，Niki心入面長嘆一聲，然後窒一窒回答說：「哦！」
表證成立，剩女主題用女警包裝的新劇為Niki度身訂做，名字跟剩女掛鈎，Niki有少少尷尬，她試著為選角解畫，她說：「之後佢哋仲有講電視史上未拍過女警衝鋒隊，好早之前拍過《陀槍師姐》系列，不過嗰個係鐵馬，呢套劇好寫實，係全軍裝包裝，唔會避開敏感話題，佢哋講到明係講時事，同埋講到明係由女警出發，講佢哋乜嘢心態，聽落都幾型喎！佢哋仲話我呢個角色係要警隊同政府批准核實，用乜嘢演員去拍，如果有案底，形象唔好，都唔會考慮，怕影響警隊聲譽。呢套劇始終係代表香港，我見到好多因素好吸引，雖然話講乜嘢中女，不過都唔好理喇！」
黃金剩女Niki，緋聞不多，而且頗長情，數男朋友五隻手指夠用，算是圈中少數的忠貞烈女，對感情相當認真，談愛情的態度同樣認真，她說：「呢個圈冇秘密，都會聽過我係唔會試嚇呢個，又試嚇嗰個嘅人，我冇呢啲嘢，我骨子裏係一個保守嘅人，有啲嘢我好冇所謂，有啲嘢我知一定唔掂得，例如毒品，同埋感情，因為呢啲嘢好傷身，唔可以玩弄感情，hurt到人，hurt到自己，唔啱唔緊要，唔好玩囉！唔好輕視，輕佻對待一段感情，唔夾唔啱OK！唔可以預咗出嚟玩嚇先。感情係兩個人嘅事，牽涉第三者嘅話，唔可以咁自私話試嚇。」Niki講到咬牙切齒，似有弦外之音，此時此刻，腦海出現鄭嘉穎的名字。
■周麗淇與鄭嘉穎因合作拍劇，而傳出緋聞。《最美麗的第七天》劇照
■最近的戀情必數紗廠太子Eric，但周麗淇矢口否認。圖片
剩女有人追
剩女嫁不出，不代表冇人追，Niki最近的戀情，要數紗廠太子Eric，不過Niki矢口否認，還狂呻好難找到合適對象，她說：「我覺得搵另一半，某程度上係我分配時間有問題，我都幾多工作，亦都需要對方明白我嘅工作模式，過時過節唔可以一齊過，亦唔可以好早返屋企，時間唔穩定，有幾多人可以明白，其實真係唔多，信任程度有幾高？可能我成日唔同佢一齊，佢去咗邊呢？就係信任程度，我做呢行對方點睇我好重要，時間好重要，要拍拖都要時間磨合相處，唔通樣樣心照咩？同埋對方屋企人，正常家庭都唔希望咁樣，奇怪點解成日唔見，又唔出現，你哋係咪拍拖?？好多意見同問題，要對方明白唔係必然，搵另一半係一個問題。」
■劇集《女警愛作戰》中的剩女女警對感情的執著，是周麗淇的寫照。
劇照
■胞姊周汶錡（右）去年披嫁衣，周麗淇難免被家人追問感情事。
拍拖誓結婚
雖然問題天天都多，三十有三的Niki，仍然堅守心中的信念，感情要認真，拍拖要結婚，她說：「不嬲由細到大，都係覺得喺埋一齊嗰個人就係屋企人，嗰個人係一世，拍拖會諗有冇將來，第日呢個人點樣共度餘生，我想生小朋友，亦因為我想生小朋友，所以我會諗結婚。幸好我過往經歷，我認識嘅所有男性都唔係玩同試嚇，係認真，我亦分得好清楚邊啲可以玩，邊啲可以掂，所以行得埋嚟應該好明白，同埋大家放心，我唔係咁慘，有人約會嚇，喜歡嘅人我都有，但係我想睇定啲先！」Niki剩女除名指日可待！
服裝：MSGM（I.T）
髮型：Debby Kwan（Hair）
犯賤唔服輸
■身為工作狂的周麗淇，狂呻難尋合適對象。
周麗淇在工作上愛挑戰，而且有一顆好勝的心，她說：「好多人都話睇我唔出，我會鍾意打鼓，想學電單車，想去北極，想讀一個莎士比亞課程，因為我好鍾意試未接觸過嘅嘢，可以話我係鍾意挑戰。」
愛作戰的Niki，在言語間更流露一副不認輸的生活態度，她說：「有啲人見我瘦蜢蜢冇力咁樣，成日問我得唔得?？我唔想俾人標籤，著西裝都唔一定係斯文?！我可以好強，亦有弱一面，所有嘢唔係絕對，係要乜嘢都肯去試，所以我某程度上係唔怕辛苦，我唔鍾意懶，唔鍾意停，就好似之前咁，我拍完《好心作怪》停落嚟就大病，仲入埋醫院，公司都話我犯賤。所以要我停，去飲茶shopping，真係唔係我杯茶！」
.我主場：周麗淇怕嫁錯郎
http://veryy8.blogspot.com/2013/03/blog-post_5475.html
