白韻琹爆胡漢清送支票o氹阿媽
資深大律師、全國政協胡漢清去年跟江希文閃婚，近日他被84歲的母親莊永楚大控訴不孝之罪，侵佔母親逾2,000萬元家產，前晚兩母子秘密在中環開圓桌飯局，有份出席飯局的胡母契女白韻琹昨日接受本報記者專訪，她透露兩母子飯局中冇偈傾，胡母不言不食氣氛尷尬，其後更聲稱頭暈不適早走，飯局不歡而散。白姐姐爆料指胡漢清為𠱁母親，即場開支票交給白姐姐轉送給胡老太。
胡漢清母親莊永楚從加拿大返港後，前日在契女白韻琹協助下，召開記者會力數兒子胡漢清霸佔家產，提出三點要求，包括歸還胡母用個人財產購入的上海大宅、歸還胡母交由胡漢清代管套現麥當勞道物業所得之1,150萬、胡漢清要讓胡母返回沙宣道大宅或租地方居住，而胡母前日接受本報專訪時，更聲淚俱下數臭兒子不孝，令她想過自殺：「點解生個咁嘅仔出嚟？」結果，胡母終於「逼宮」成功，被指不孝的胡漢清，前晚急約母親會面，希望三口六面講清楚平息事件。據知圓桌飯局設宴於中環的中國會，出席者有胡氏母子、胡母契女白韻琹、謝偉俊、張宇人、胡母兩位親戚及胡漢清的助手，有份出席飯局的白韻琹，昨日在銅鑼灣的寫字樓接受本報記者專訪，大爆飯局不歡而散。
■打扮跟前日一樣的白韻琹昨日接受本報記者專訪，透露為胡漢清和胡老太擔任中間人失敗，前晚飯局不歡而散。攝影：黃偉雄
■胡老太前日接受本報記者專訪，力數兒子不孝，曾想自殺。
■胡漢清昨日透過秘書表示，不會再發聲明。
資料圖片
白姐姐：白韻琹 記：記者
白姐姐：噚晚本來約咗喺蘇浙滬同鄉會，佢哋（胡漢清）打嚟話有記者，要轉地址，叫我哋向半山方向去，兜兜轉轉去咗一個私人地方，有張宇人、Alan（胡漢清）、Alan助理、謝偉俊、莊小姐（胡母）同兩個親戚。
「話𠵱家調動錢有困難」
記：飯局氣氛點？
白姐姐：因為我有公職要同人傾，離開咗個幾鐘，返嚟發覺佢兩母子唔傾偈，胡大狀好有心機𠱁媽咪，甜言蜜語，佢其實乜都應承，又嘗試解釋，話𠵱家調動錢有困難，又有好多開支，屋企又有問題，江希文又唔開心，佢好錫住老婆。
記：胡漢清對媽咪態度點？兩母子有冇傾偈？
白姐姐：佢（胡漢清）叫咗好多靚嘅意大利餐同酒，但媽咪完全唔肯食，扭計，又唔肯講嘢，又話頭暈唔舒服，早走咗，佢過去五、六個月冇見過仔，電話都冇傾過，反而我同大狀傾咗好多電話，變咗我喺中間傳訊，當時我打畀佢，佢同江希文喺美國度假。
記：有傳江希文大肚？
白姐姐：呢個唔係我去答嘅嘢，我冇見到。
「應承幫佢供加拿大間屋」
記：飯局氣氛係咪好尷尬？
白姐姐（苦笑）：係幾尷尬，又唔傾偈，我嘗試幫手𠱁佢媽咪，但佢媽咪唔易𠱁，𠱁佢食嘢都難，佢話未講清楚啲嘢，覺都瞓唔著，仲有乜興趣食嘢？其實佢都好陰功，講起就心酸，佢真係幾慘，又有支氣管炎，喺加拿大call白車都call咗三次，所以我唔可以袖手旁觀。
記：胡漢清話乜條件都肯應承，都𠱁唔到媽咪？
白姐姐（幫胡漢清講好話）：頭先有人同我講，話胡漢清親自承諾，應承幫佢（胡母）供加拿大間屋，畀埋首期（該是指尾期），大約五、六萬加幣，等佢媽咪安心啲，住得舒舒服服。另外，噚晚佢仲即時寫咗張支票畀我，叫我交畀佢媽咪，但抬頭寫我名。
記：點解寫你名，唔直接畀媽咪？
白姐姐：呢個問胡大狀，唔係問我，或者因為佢見媽咪少少硬頸，而且係我同佢講，上次媽咪坐飛機嚟見個仔，又要有護士陪，坐頭等使咗30萬買機票，我同佢講坐飛機嚟使唔少錢，今次要用飛行里數換，你都知佢狀況啦，嚟兩次搵唔到你，你仲話佢玩失蹤，點都要意思意思，咁佢就即刻開支票。
記：張支票係還錢畀媽咪？
白姐姐（避答）：噚日幫佢開招待會，我都親自打電話通知胡大狀，佢冇對我表示不滿，亦好客氣冇責問我，佢話𠵱家喺法庭幫人調停，唔行得開，佢會搵個人嚟。佢冇責怪我，噚晚我一出聲佢就肯畀支票，我話你知唔知媽咪返嚟，機票都使三十萬，佢就話：「真係太大使！」你知你媽一直係咁，佢著啲衫全部LV、CHANEL，唔貴都唔買。
■江希文去年12月在微博上載跟家人合照，被老公胡漢清緊擁著流露幸福笑容。微博圖片
枱上放十萬元支票
記（追問）：支票唔係還錢？
白姐姐：唔係，整啲陷阱我踩（指記者），總之佢好順攤即刻寫支票，抬頭寫我名，我話你鍾意點就點，總之你攞到嚟我會同你處理。
記：支票唔直接交畀媽咪，胡母有冇唔開心？
白姐姐：冇喎，佢都冇曬反應，扭計要走，好似佢（胡漢清）畀支票我時，佢媽咪走咗。
記：銀碼係你提出？還是胡漢清自己寫？
白姐姐：我其實順便提出，話佢一啲都冇表示，佢就即刻攞支票出嚟，寫咗我名。
記：銀碼有冇七位數？
白姐姐：唔講，唔該唔好逼我講，佢肯擺出誠意態度，我當然要幫佢解釋，起碼呢兩樣佢有表示誠意，除咗支票，五、六萬加紙都幾十萬，起碼係一個開始，我離開咗兩個鐘，返嚟同佢講幾句就寫支票，覺得佢好有誠意。
記：胡母提出嘅三點要求，胡漢清有冇承諾做？
白姐姐：我唔係佢哋代言人。
記：母子會唔會有機會和好？
白姐姐（露出笑容）：有，佢哋唔係殺父仇人，我都覺得係小事或誤會，做一場大龍鳳好番，好似粵語片啲戲歡歡樂樂在一起。
記：通知咗老太支票好消息？
白姐姐：未，佢瞓緊覺，唔通為少少錢嘈醒佢，可能我想自己使咗去，見到錢開眼，哈哈！
記者見到白姐姐的寫字枱上有一張支票，抬頭是白姐姐的英名文，銀碼十萬，問是否就是胡漢清交給她的支票？白姐姐即緊張地收起支票，放入銀包內，並說：「多餘啦，唔關你事，乜嘢支票都唔畀你睇，唔話你知等你心思思，咪咁八卦人哋啲家事。」
■白姐姐爆料指胡漢清寫了張支票給她轉交給胡母，剛巧書枱上有張十萬元支票。
秘書：胡大狀冇嘢補充
記：胡母今日心情點？有冇好番啲？
白姐姐：我哋有通電話，好似𠱁細路哥咁，佢有一樣好開心，好多朋友四面八方打嚟安慰佢、關心佢，又請佢食飯，又叫佢打麻雀、打golf、跳舞，但佢話冇心情。
記：覺得胡漢清孝唔孝順？
白姐姐：唔批評佢，唔好畀西瓜皮我踩。
記：事件解決未？
白姐姐：未，佢（胡母）要求三樣嘢都未做到，或者一陣打畀佢（胡漢清），睇完今日《蘋果》，唔敢咁早打畀佢。
記者昨日致電胡漢清秘書Belle了解紛爭進度，Belle沒有確認雙方是否曾會面，只表示胡漢清不會再發聲明：「胡大狀暫時冇嘢想補充同評論，亦都冇進一步指示會出聲明。」
採訪：葉雪
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/
下一則:超蓮酒店夜會克羣
.白韻琹爆胡漢清送支票o氹阿媽
http://veryy8.blogspot.com/2013/03/o.html
