八卦嘢(八卦野) [八卦o野][日日818] : 劉青雲掃老婆興

2013年4月4日星期四

劉青雲掃老婆興

同你吟一吟

劉青雲掃老婆興

唔滾唔知身體好！劉青雲健康狀況係點，八珍唔多了解，但可以肯定嘅，係佢唔滾！

同老婆郭藹明九八年結婚，十五年冇出軌行差踏錯，更加冇傳過佢同任何對手有緋聞，去邊都同老婆一齊，簡直可以送個貞節牌坊俾佢。

除咗唔搞搞震，平時唔係電影宣傳連訪問都唔做嘅劉青雲，見到行咇記者更加好似見鬼咁！上星期四（三月二十八日）下午四點半，劉青雲兩公婆同助手三人行，經過置地間 BV，老婆入去巡鋪，青雲無無聊聊戙响一邊周圍望，終於俾佢𥄫到《壹》仔。

知道有相機瞄住自己，青雲周身唔自在，走埋老婆身邊打報告，搞到本來睇緊飾物嘅郭藹明即刻打退堂鼓，急急腳鬆人。

好掃興啫！唔係《壹》仔，係劉青雲你呀！

郭藹明巡鋪，青雲唔啱睇，企埋一邊發吽。