減產拒拍劇 林峯 hea住做

探熱針

減產拒拍劇　林峯 hea住做

自從林峯公開同千語 BB拍拖後，經常掛住瘟女，事業變得無心戀戰，近日在橫店為劇集《陸小鳳與花滿樓》開工，日日 hea住做，講電話多過睇劇本，甚至搵替身「頂包」入鏡唔願拍。

據知，林峯已向樂易玲表明，日後會逐步減產，無綫叫到都無面俾，目的只為同千語 BB爭取時間相處，並打算兩年內結婚。

禁女友探班

由於上海及江蘇一帶爆發 H7N9疫情，目前正身處橫店拍攝大陸劇《陸小鳳與花滿樓》的林峯，與病毒源頭區域相當接近，為加強防範，每日都做足預防工夫，在片場經常戴上口罩。

據知，暫時未有工開的吳千語，原本打算人肉速遞飛上橫店陪男友開工，但林峯怕女友有危險而阻止，寧願自己辛苦，問劇組度期攞假經常兩日一夜飛返香港同 BB（林峯對吳千語暱稱）短敍。

吳千語亦大方承認男友阻止她前往探班，「林峯怕我有事，叫我唔好探班，佢為咗工作要留喺橫店就無得揀，不過佢好為食，我成日提佢唔好亂食嘢，唔好食內臟，同埋會買定啲乾糧同即食麵，等佢帶上去。」十足廿四孝女友。

林峯之前幫 TVB拍過不少古裝片，騎馬絕對難佢唔倒。

拍騎馬戲份，林峯就出動「武裝」，當拍大頭 chok時，就親身上陣，其他場面就搵替身搞掂。

在片場林峯經常電話不離手，不是講電話，就是用微信同女友談情。

通告上列明林峯所演的陸小鳳有「文替」跟場。

替身上陣

見唔到 BB，林峯拍戲更加分心，每逢唔使埋位，大部分時間都會坐埋一邊，大爺般攤在尼籠椅上，同 BB傾電話、玩微信，間中才攞起劇本望兩眼，導致成日 NG，令劇組叫苦連天。

談情大曬，林峯更無理到要求劇組安排替身隨時候命，無論拍動作戲，抑或文戲，只要見唔到自己大頭 chok樣，全部交由替身上陣，自己就可以提早收工，工作態度 hea爆。

劇中林峯與女主角斕曦有不少對手戲，但千語 BB可以絕對放心，林峯對大陸女仔見過鬼都怕黑。

林峯自從同吳千語拍拖後，性情大變，一向是花花公子的他竟然甘願為一棵樹放棄整個森林。

兩年內結婚

其實林峯自從同千語 BB拍拖後，事業變得無心戀戰，甚至已向無綫高層樂易玲表明態度，拍埋《陸小鳳》之後要停工放假，日後工作更要求全面減產，無論拍劇、唱片、開演唱會，全部貴精不貴多，拒再密密做，怕無時間拍拖，所以無綫在下半年開拍的劇集，林峯全部榜上無名。

「阿峯今次對千語好認真，佢好想享受吓真正拍拖嘅過程，唔想再好似之前幾次咁玩玩吓，佢認定咗千語，想兩年內結婚，其實之前佢兩個去沖繩旅行，阿峯有同女友求過婚，佢哋仲買埋戒指戴喺無名指，不過嗰次阿峯似係試探性質多，相信之後會再認認真真同千語求多次婚。」林峯身邊人說。

食飯期間，林峯都係掛住同女友電話傳情。

橫店位於蘇杭一帶，為免染上 H7N9，林峯很多時候都帶上口罩。

被林峯禁止探班的吳千語，唯有等林峯放假返港先有機會見面。

林峯每逢出入公眾地方都相當鬼祟，用帽笠頭遮住個樣怕被人發現。

愛出面

以前林峯每次拍拖都死口唔認，好似同潘霜霜要爆出床照，先勉為其難認女友，但今次同千語 BB就唔同，愛得高調。

公開多謝

今年初林峯在勁歌頒獎禮中奪得「最受歡迎男歌星」，在台上他公開講多謝 BB，後來林峯承認是多謝女友吳千語。

認做家人

吳千語公開稱呼林峯做「阿文」（林峯真名林匯文），事後林峯表示只有家人才會這樣叫他，他默認女友地位已等同家人。

三度遊埠

今年二月林峯同吳千語先後到東京、沖繩及米蘭，最初吳千語否認有同林峯同房瞓，但被人取笑扮純情，之後她轉口風話絕不會意外懷孕。

撰文、攝影：娛樂組

mailto:nextb@nextmedia.com

. 減產拒拍劇　林峯 hea住做
http://hittt.blogspot.com/2013/04/hea.html