上週五（ 10日），年紀輕輕的 Fabienne面對鏡頭從容有禮，還交叉腳企定定有問必答，關家好家教！
真面目
少女心事 唔恨入行嘥曬 關禮傑 18歲索女純愛拖鬼仔
重頭劇《金枝慾孽貳》開播兩週，收視低處未算低，劇情被批難投入、主角演技浮誇……不過咁，踩還踩，都有驚喜位。比如愈戰愈勇的「男二」關禮傑，睇佢唔出年過半百，又係食過防腐劑咁款！
唔只關禮傑襟睇，關家兩位千金一樣省鏡，尤其大女關楓馨（ Fabienne），天生一個明星樣，索過好多 BB類物體！上週本刊更直擊 Fabienne拖住鬼仔男同學純情拍拖，這位於國際學校讀 Grade 12的關家大千金更親口否認入行傳聞，話讀書最緊要。嘥咗喎！
52歲關禮傑係無綫第 11期藝訓班學員，同班同學梁朝偉、周星馳、吳鎮宇、歐陽震華個個唔係影帝就視帝，一早跑出，關禮傑勝在 keep得好，低調默默做。 96年離巢， 03年重投無綫再獲重用，一年一部無綫劇保住人氣，仲要次次都係重頭劇重頭角色。
唔坐保時捷坐小巴
關禮傑係虔誠基督徒，一對女兒， 18歲楓馨和 11歲楓盈一樣讀基督教國際學校，同樣品學兼優。
上週四（ 9日）下午放學時間，本刊直擊關禮傑夫婦親自接女放學， 3點 3接過細女，一家三口在學校門外坐足半個鐘等埋大女。不過女大女世界， Fabienne放學即孖住鬼仔男友，將隨身物品放上爸爸部保時捷座駕後，自己跟男友搭巴士再轉小巴返回加州花園寓所。
「一切都係讀書為先」
有老豆靚車唔搭，山長水遠由九龍城花足一個半鐘轉車返元朗， Fabienne擺明要跟拍拖只有 5個月的男朋友仔遊車河爭取見面時間。 18歲愛情大過天，記者跟足全程，發現 Fabienne跟鬼仔男友最多都係拖手搭膊頭，半途男友單獨歸家， goodbye kiss都唔見有。咁純情唔怪得關禮傑放心讓女兒拍拖。
據知 Fabienne將於 8月到英國升讀大學，而她揀的科目是教育，暫時冇諗過做明星。上週五（ 10日），一樣係放學時間， Fabienne大方有禮接受本刊訪問， Fabienne話：「冇諗過入行……爹哋都冇咁樣安排過。一切都係讀書為先，大學畢業先再講！」
週一，關禮傑回應記者：「個男仔係意大利人，有食過飯。拍吓拖啫，我唔會管佢，兩個女好乖令我好放心。佢想入行我冇得管，不過讀教育係佢自己揀，我知做老師係佢理想！」影帝視帝虛名嚟嘅啫，一提起個女，關禮傑放心又自豪。有靚老婆，又有乖女，呢方面朝偉星爺就輸曬啦！
純情相簿
關禮傑一家四口都是虔誠基督徒，佢話雖然大女赴英升學，一樣唔擔心女兒學壞或者蝕底畀男仔，皆因囡囡仲虔誠過自己喎。其實睇番 Fabienne拍拖行徑同微博，確係黐家又純情，一家四口都完全唔使關禮傑擔心。
《金枝貳》背妻召妓 關禮傑：阿女會睇！
老豆關禮傑擔大旗嘅重頭劇《金枝慾孽貳》收視不濟，上周低見 18點，不過 Fabienne就同記者講繼續支持：「爹哋做戲我一直有睇，唔會理收視幾多，總之我覺得爹哋做得好好。」第三週劇情，將進入多角戀高潮位，好多重口味場面亦都會輪住出街，吸唔吸到觀眾好快就知。關禮傑話老婆同阿女一樣撐喎：「屋企人唔會理收視，總之有我嘅劇佢哋都會睇！」
. 少女心事 唔恨入行嘥曬 關禮傑 18歲索女純愛拖鬼仔
http://hot104.blogspot.com/2013/05/18_15.html. 少女心事 唔恨入行嘥曬 關禮傑 18歲索女純愛拖鬼仔
http://hittt.blogspot.com/2013/05/18_15.html
