2013年5月15日星期三

朱慧敏效安琪蓮娜切乳房

朱慧敏效安琪蓮娜切乳房

朱慧敏乳癌高危　效安琪蓮娜切乳房

37歲美國紅星安琪蓮娜祖莉（Angelina Jolie）因帶有「錯誤的基因」，昨日宣佈早前做切除乳房組織手術，以預防患乳癌和卵巢癌，她因擔心六名子女失去母親，故為家庭決定做這手術。媽媽、婆婆和阿姨都因乳癌過身的朱慧敏，屬高危一族，故她坦言曾認真考慮切除乳房。至於同樣曾切乳的抗癌鬥士溫裕紅及切去腫瘤的林淑敏，讚安琪蓮娜的決定果斷。

荷李活巨星畢彼特（Brad Pitt）的女友安琪蓮娜祖莉，昨日勇敢承認於今年2至4月期間，已接受了切除雙乳乳房組織手術，因她帶有「錯誤的基因」，安琪蓮娜為免六名子女痛失母親，決定接受手術解除危機，她昨日勇敢公開事件，震驚全球。

■美國紅星安琪蓮娜祖莉撰文驚爆已切除雙乳，以預防患上乳癌令子女失去母親，事件轟動全球。資料圖片

「冇嘢重要過生命」

前港姐朱慧敏的媽媽、婆婆和阿姨都因乳癌過身，故她屬高危一族，朱慧敏昨在電話中讚安琪蓮娜勇敢，坦言自己曾認真考慮接受切除乳房手術，她說：「佢好勇敢好堅強，好明智接受呢個手術，佢以小朋友同家庭為先，掙紮好耐又問過專業人士意見，佢做咗好好榜樣。其實自己都係有咁情況，媽媽同阿姨都係48歲唔喺度，婆婆63歲走，我24歲做測試知道帶有基因，搵過美國同香港醫生傾過，嗰時自己考慮切除乳房，醫生建議我生小朋友先，因為切咗唔可以餵人奶。」

■朱慧敏的媽咪、婆婆和阿姨都因乳癌離世，故她謂考慮生育後切除乳房。資料圖片

朱慧敏坦言想生四個小朋友，問會否驚患上乳癌？她灑脫說：「唔驚得咁多，命運注定，自己經歷過見證家人病情，有強嘅心理質素，避免食激素燕窩，又少食肉，做多啲運動，我好正面，唔恐懼亦唔抗拒。冇嘢重要過生命，醫生話可以做義乳，希望香港男士如果面對呢個情況，可以畀女性心靈支持。」

港、台有多名女藝人曾不幸患上乳癌，如蘇施黃、葉麗儀、陳美齡、薛芷倫、汪明荃、仙杜拉、蔡琴、林淑敏和溫裕紅等，她們靠堅強意志戰勝癌魔，前港姐林淑敏三年前患上乳癌，並接受右邊腫瘤切除手術，現已康服重投幕前演出。對於安琪蓮娜親證已切除雙乳，林淑敏昨日在電話中說：「我相信佢經醫生評估過先有呢個決定，生命係緊要過一對乳房，呢方面我覺得外國人較中國人果斷，對佢嚟講呢次手術係必須，冇人想有此決定。」

■抗癌勇士林淑敏覺得生命比乳房重要，讚安琪蓮娜決定果斷。資料圖片

溫裕紅：值得讚許

05年患上乳癌的無綫女藝人溫裕紅，當年為保命接受了切除左乳手術，她昨在電話說：「佢有錯誤基因，切咗乳房可以減低風險，佢呢個決定好勇敢好叻，好值得讚許。當時我切完乳房裝義乳，有埋假乳頭，好完善，手術到𠵱家冇後遺症，我覺得呢樣嘢唔係要對人交代，只要老公仲咁愛你就得。」裕紅認同中國人思想傳統，她說：「佢哋可能覺得做切除乳房手術會好自卑，但呢個器官唔同胃，冇咗都唔會好大影響。」

媽咪曾患乳癌和血癌的鄺美雲，昨到九龍灣出席佛教活動，對於安琪蓮娜切乳防患癌，她驚訝反問：「為咗預防？其實我媽咪都係咁，癌症有好多方面，後天心情影響同壓力形成，唔需要去到咁，可能會有啫，佢都咁大個唔使咁激動，自己細個都驚同擔心，但大大嚇冇呢個諗法，覺得天意，如果呢個世界唔需要你，咪投胎做另一個人。」

採訪、攝影：比華利、黃曉妍、林妃