上周四（ 2日），肥媽到荃灣街市為節目《食平 D》錄影，其間有街坊向肥媽投訴話買餸唔夠佢平，但肥媽繼續強撐：「我冇搵人哋笨㗎！」
娛聞樂
網民插報細數 肥媽怒吼：我冇搵笨
百物騰貴，買餐餸閒閒哋過百銀。有見及此，無綫食住個勢，搵識飲識食的肥媽，主持 24集《食平 D》帶觀眾尋遍全港街市，搵出平價食材。節目上周平均收視 20點，只比大製作《金枝慾孽貳》少一點收視，證明 100蚊買 5個湯依然大有市場。
雖然收視不俗，但肥媽於節目內所標榜的「慳錢價」實在低得出奇，大批網民更口徑一致插爆肥媽搵笨。上周四（ 2日），肥媽與拍檔陸浩明到荃灣拍攝，對於被指買餸報細數，她立即怒吼：「我冇搵人笨，係你哋唔識得買啫！」
上周四（ 2日）肥媽與拍檔陸浩明（ 6號），一早抵達荃灣楊屋道露天街市，拍攝第 19集《食平 D》外景。適逢上午屬師奶買餸高峰期，當肥媽在人頭湧湧的街市出現時，立即引來人潮圍觀。有街坊更索性上前問肥媽：「係咪真係買到咁平㗎，喺邊度可以買到？」肥媽聽後就立即總統上身一樣，面向群眾大聲嗌：「梗係可以買到咁平啦！」
記者親身求證
話雖如此，但記者發現肥媽於節目內，到街市買的食材價錢，一般均比市價為低，例如她有本事可以用 100蚊煮到五個湯、只需 80蚊就完成一個有湯有甜品的情侶晚餐，認真誇張。難怪節目出街僅一星期，大批網民就洗版式留言，指肥媽買餸的價錢報細數，又篤爆她所有配料冇計算在內，有呃觀眾之嫌。
記者為了求證肥媽究竟有否呃觀眾，決定跟足《食平 D》第二集的內容，嘗試是否能夠如肥媽一樣用 100蚊可以煲出五款湯。記者照住肥媽到北角春秧街市買五款湯的食材，但最終都是超過 100蚊。
網友圍插
肥媽自稱精打細算，但網友亦都一樣。大部分網友睇完《食平 D》後，紛紛到討論區留言，狠批肥媽煮餸時唔計配料，並踢爆因為肥媽拍攝節目，街市檔主刻意收平啲。看來主張以「慳錢價」煮餸的《食平 D》可以改名為《只有肥媽食
平 D》。
買平餸秘技
記者將測試結果以及網友劣評一一告知肥媽。當她聽到有網友力斥她「搵笨」時，立即怒吼：「我冇搵人笨㗎！睇吓你哋識唔識得買嘅啫！」之後她更即場教記者買平餸秘技，她說：「咁一定唔好去超市買啦，人哋超市有冷氣，又唔使日曬雨淋，而且有人管理，乾淨企理，淨係服務費都要收番啲㗎。但有啲街市特別平，而且去街市亦要睇時間，人哋啱啱開檔或者就嚟收檔都可以賣平啲。」
以她經驗所得，她指荃灣楊屋道街市、大埔墟街市及北角春秧街街市，所賣的食材價錢相對較平。每天早上九點前或傍晚七點後，就是買餸講價的最好時機。「好似我頭先去買菜，成 16蚊斤，我話冇理由㗎，尋日嚟問都 12蚊㗎喎。跟住事頭婆話要我遲幾個鐘再嚟就會平啲，肥媽繼續勞氣地說：「我 8歲開始就要照顧細佬妹，當時得五毫子都可以煮俾成家人食啦！」
《食平 D》監製張志明則為肥媽補鑊，他說：「網上面鬧肥媽嘅人一定唔識煮飯㗎喇！一開始原本都係 100蚊煲 3個湯，係我迫肥媽要煮 5個湯㗎啫！我相信有好多師奶真係冇肥媽買得咁平，但呢啲要講經驗，唔係教就得。」
肥媽再勞氣地說：「我不嬲都話可以買平餸！不過真係要識搵囉，人哋行名店，我就鍾意行街市，日曬雨淋又濕𣲷𣲷，係要犧牲㗎！」
據知節目將於本周拍完，本月底肥媽就計劃返澳門，與結婚 13年的葡籍丈夫 Rick再補擺喜酒，宴請澳門多位猛人，她說：「我好鬼忙，到時唔知得唔得閒結，不過我請得人哋飲，一定唔會食平嘢！」
肥媽買平 D
肥媽有頭有面，行出來個個都俾面，買餸甚至可以唔使俾錢，當然可以食平 D。周一（ 6日），本刊記者到肥媽於節目第二集「 100蚊煲五款湯」中介紹的北角春秧街街市，嘗試用她所買的價錢買同樣材料。節目中，肥媽以 78元就可買足煲湯材料，但記者卻要用 110元才可買到，而且分量比肥媽的更少。不過肥媽要 12蚊才買到的忌廉湯，記者只用 9蚊就搵到，肥媽似乎捐窿捐罅唔夠深入喎！
急凍雞翼
新鮮番茄
罐頭忌廉
肥媽吃得開
肥媽近年主力主持飲食節目。更出書教人煮好餸。一直冇電視台合約的她，多年來有線、亞視與無綫三台遊走，搵唔少錢。
. 網民插報細數 肥媽怒吼：我冇搵笨
http://hot104.blogspot.com/2013/05/blog-post_1450.html. 網民插報細數 肥媽怒吼：我冇搵笨
http://hittt.blogspot.com/2013/05/blog-post_5367.html
