女友劈炮 結婚變分手 楊明食詐胡

三十二歲的楊明同女友 Joanna拍拖三年，以為感情穩定可組織家庭，殊不知一場婚宴籌備，就令關係決裂。

探熱針

女友劈炮　結婚變分手　楊明食詐胡

初出道曾與陳敏之拍過拖，亦一度得到公司力捧的楊明，先後於○五年（醉駕）及○七年（刑毀）犯官非，兩次都係飲大出事，事業從此打沉。年過三十終於定性，去年他宣布與拍拖三年的圈外女友 Joanna結婚，不過，原定今個月舉行的婚宴已不了了之。原來搞婚禮期間，一對準新人一言不合吵大鑊，搞到婚都結唔成。

其他影片

六月聞到味

本來計劃好十月在尖沙咀美麗華酒店擺酒的楊明（前稱揚明），去年底已同女友飛馬來西亞影婚紗相，又使了幾十萬，執靚紅磡寓所做愛巢，為成家立室做好準備。

今年六月，楊明出席《情越海岸線》宣傳活動時，被問到婚事進程，才改口說要延期。據了解，當其時他才私下通知一班戥穿石，包括徐榮、趙永洪、陳智燊，指在籌備婚禮期間與女友吵了多次大鑊，結果喜事變傷心事，要分手結束三年情。

影埋婚紗相

結唔成婚，但婚紗公司的網頁仍放上去年底楊明同女友遠赴馬來西亞取景的婚紗簽名相。當時二人甜蜜溫馨，沒料半年後就散。

有指楊明原定十月在美麗華酒店設婚宴，如今唯有撻訂。

無期飛美註冊

其實楊明早已計劃好今年初與女友 Joanna飛到美國註冊行禮，並於去年底向無綫入紙申請放假兩星期，但礙於《情越海岸線》、《初五啟市錄》、《師父明白了》劇接劇，始終去唔成。

「 Joanna嘅屋企人喺曬美國，所以佢好想喺嗰邊註冊行禮，之後返香港補擺酒。點知楊明行唔開，註冊嘅事一拖再拖， Joanna心入面早已有條刺，加埋籌備婚禮多濕碎事，佢兩個又成日各持己見，搞到嘈曬交！ Joanna向來都係火爆，吵多幾吵佢一句話：『唔結啦！』，仲走咗返美國，兩個冷戰咗一排，再坐低見面唔係傾婚禮，而係講分手。」知情者說。

塞翁失馬焉知非福。結婚食詐胡，但事業卻現曙光，有傳珍姐欽點力捧楊明，在《情越》當第二男主角。

徐榮、陳智燊及趙永洪，原是其婚禮戥穿石。徐榮說：「收到通知都有啲意外，但唔敢問佢發生咩事！做兄弟送上安慰就夠，好在佢有工開，心情容易收拾番。」

父母買定龍鳳鈪

結婚變分手，酒席訂金泡湯，人財兩失的楊明承認與女友於今年五月分手，婚事已告吹。

楊：詳情唔想交代！不過導火線係去美國註冊嘅期一拖再拖。佢係圈外人，唔明呢行運作，所以佢以為我搵藉口唔簽紙。

壹：點解六月嗰陣記者問你又唔一早講？

楊：嗰時啱啱分手，心情都未收拾，咁始終係一件瘀事！班兄弟追問我係咪十月，我都只係一句：『唔使啦，慳番啦！』拖咗幾個月，阿媽見我無提過女友已經聞到味，再追問我先敢同父母交代。佢哋好失望，龍鳳鈪都買定，好在未印請帖。

壹：結唔成婚，跟前度仲係朋友？

楊：唔……好少聯絡！兩個行到呢一步，唔知仲可以講啲咩！始終三年感情就咁無咗，係有唔開心，但早啲發現唔夾，都好過結咗婚先發現。

未婚先分

因為搞結婚男女雙方意見不合導致分手的事聽得多，但發生在藝人身上卻少之又少，除了楊明外，去年還有組合農夫的 C君。

原本打鑼打鼓訂好酒席準備做老襯的 C君，竟然遭女友 Gloria悔婚，還要將走佬責任歸咎於 C君患有先天性地中海貧血，恐防遺傳給下一代而反口唔嫁，點知冇耐 Gloria被揭同 C君老死撻着， C君俾人一刀插入心，難怪他會情緒崩潰。

. 女友劈炮　結婚變分手　楊明食詐胡
http://hittt.blogspot.com/2013/10/blog-post_10.html. 女友劈炮　結婚變分手　楊明食詐胡
http://hittt.blogspot.com/2013/10/blog-post_10.html