男人信甚麼 羅仲謙
與羅仲謙的是次對談，建立在一個字上——信。
不是信心、不是信用，而是每件事，都各有一套說辭，你選擇信誰的那一套？
11年中，被前度女友傅穎指控虐打兼劈腿，羅仲謙說，虐打是娛樂新聞加過度修飾，劈腿更是一世人未試過，你信那個？
12年中，被捲入富商劉定成裸照相簿風波，劉公子話識，羅仲謙話唔識，然後法庭上揚出兩人合照，該信誰好？
三個月前，再爆一單與緋聞女友楊怡疑似車震事件，又應該相信楊怡伏於謙謙兩腿之間那張娛樂頭條大相、還是男女主角口中飲醉酒嘔吐中的解釋？
信眼睛還是信耳朵，你有你的選擇。
出道八年的羅仲謙說，兩年內接連捲入是非漩渦，次次你有你講、人有人信，體會到甚麼叫百詞莫辯，學會了男人應該要信自己。
月中，緋聞女友楊怡勇奪一年一度電視台最矚目的視後大獎，自己則連鼓勵新人的飛躍獎亦輸掉， 28歲的羅仲謙亦說，千萬別理所當然就相信女尊男卑必然沒有好結果：「做呢行會迫人長大，我唔覺得我後生過佢五年，睇法就遜色過人；我都好努力唔想原地踏步，但係當我認為時機成熟時，我照樣會求婚，地位懸殊唔會成為我哋嘅障礙。」
大波陳浩南
《古惑仔：江湖新秩序》電影海報一出，即被網友踩鴨味重：「我哋想拍得有漫畫感，咁原著個個都畫到咁大隻o架嘛！」
羅仲謙呢期曝光頻密，為的是宣傳本月八日首映的新戲《古惑仔：江湖新秩序》。從落實會演新一代陳浩南、到白色西裝電影海報出籠，羅仲謙一直是眾矢之的，網友一致插爆：新一代古惑仔，鴨味重、英雄氣概少，想挑戰經典？妄想！
「王晶講得啱，當年個個覺得華 DEE先係古惑仔，鄭伊健陳小春走出嚟拍第一集時都係俾人鬧，結果又係創造咗經典，o依家鬧嘅人係唔記得當年自己都鬧過之嘛。經典永遠都係經典，我都係睇古惑仔大，我哋唔係挑戰經典，淨係想大家畀啲機會我哋呢幾個後生仔啫！」
羅仲謙說，出道八年，自己仍然處於藝人的播種期。反觀緋聞女友楊怡，年長 5歲、出道 13年，已經處於收穫期，獲得當家花旦最高榮譽的視後大獎，這段女尊男卑的姊弟情自然備受矚目、羅仲謙當晚為女友感動落淚的舉動，自然是焦點所在：「其實古佬（古明華）同唯唯攞獎時我都有喊，又唔影我……個飛躍獎，開始我都覺得同唯唯有得揮，直至睇佢做《大太監》死嗰場，我就知自己輸硬，仲要輸到心服口服。
「每個演員背後付出幾多、有幾辛苦，我都知，楊怡同馬國明都成日俾我叫佢哋做農夫。我都有拍劇，都知一套劇一開三個月，日拍夜拍，已經拍到個人冇靈魂，我都要休息、要有足夠時間放低上一個角色，先至有團火去做下一個角色。佢哋兩個全年劇接劇駁住落，仲唔係默默耕耘嘅農夫咩？唔好話係一個遊戲，每個人都得來不易，都需要一個獎項去鼓勵。」
緋聞女友奪視後時抹眼淚：「梁烈唯同古明華攞我都有喊，不過攝影師冇影之嘛！」
去年 9月與楊怡驚爆疑似車震，事後兩人齊齊在電視城開記招解話：「點解釋都冇用，觀眾相信睇落點就係點。」
與傅穎同屬星皓經理人公司，結果拍拖又搞到反目成仇：「我哋冇再聯絡……雖然感情嘢難控制，但下次……同事拍拖免得就免。」圖片
好彩仲喺度
去年頒獎禮食白果，羅仲謙今年《戀愛季節》、《 On Call36小時》續集及重頭劇《衝上雲霄 II》輪住上，擺明力捧。
上次與羅仲謙訪問，是兩年多前，《尖子攻略》、《搜下留情》播完不久，羅仲謙剛剛在電視台起步。兩年後再見，羅仲謙一坐下來就感慨：「仲有得坐喺度做訪問，我覺得自己真係好好彩！」我問為甚麼，羅仲謙說，兩年以來經歷種種，一度以為自己玩完，在娛樂圈冇得留低：「未試過上頭條，唔知嗰件事威力有幾大；未痛過，唔知傷害有幾重。o依家一切過咗去，我覺得，痛，唔可怕，最可怕係唔記得痛，做人一定要記住教訓。」
虐打女友事件，羅仲謙說：「最大教訓，係做藝人唔好咁高調，有啲嘢，真係應該收埋處理。感情雖然控制唔到，不過，同公司同事拍拖，下次都係免得就免。」上次被傅穎指控一腳踏兩船，近日又有報道指背著楊怡與前女友藕斷絲連，羅仲謙一概否認：「 No！絕對冇！一嚟我冇咁嘅能力、二嚟我深信呢個世界有報應，你對人唔專一，人哋都唔會認真對待我。」
疑似車震事件，羅仲謙說，學習到的是，隨時隨地做好被偷怕跟蹤的準備：「人哋講得啱，愛情同自由喺呢行係奢侈品。第一次出街開始有人認得、人哋行埋嚟讚我，我好享受o架……咦，做明星就係咁o架啦。慢慢，覺得出街似係馬騮咁俾人睇、俾人影；兩個人嘅事，要同全世界交代同解釋；最難，係承受各種各樣批評……呢啲就係公眾人物，收入可能比人多，付出自然更加多，好同壞都要承受。我以前好貪靚、日日都操，覺得自己係賣樣。o依家過咗追求完美身材嘅階段，覺得既然留喺度，最重要係有立足能力。演員總會一代又一代接住出道，靚仔同大隻嘅更加周圍都係，郭晉安同我講，娛樂圈呢個擂台好大，唔係單對單、打低人就剩番你一個企喺度o架！有實力就可以企落去，冇人可以淘汰你、取代你。」
視後都要愛
與楊怡的緋聞，從年初合作《 On Call36小時》開始傳出，被爆過同遊韓國、又被拍到過同車，連電視台頒獎禮都當正二人情侶檔處理，羅仲謙還是不願承認現時與視後蜜運中：「點解唔認？因為呢個階段冇嘢好認。我覺得男仔冇工作冇成績，最好乜都唔好講。冇事業基礎嘅男人，談戀愛係白談。我好細個爸爸媽媽就分開咗，佢哋太後生結婚生仔，心智未夠成熟，經濟能力又差，拗撬自然多。因為佢哋嘅關係，我特別渴求一個圓滿家庭，想有個人陪我行到最後，所以，建立好啲個事業基礎真係好重要。」
女尊男卑、老妻少夫，我懷疑隱瞞戀情都是女方主意，羅仲謙亦否認：「細過佢五年，我唔覺得我就幼稚啲單純啲，見解有咩遜色得過佢。呢行可以加速人成長，我唔係以前嘅我。女仔始終係女仔，無論咩年紀、咩身份，外形有幾強，我覺得女仔就應該係被錫被愛。愛情應該係互相扶持、互相體諒，唔會淨係得一邊強，點樣令到我嘅感情同將來嘅婚姻更穩固、我自己心裏有數，覺得 ready時我一定會去馬，對方有幾強，唔會成為我嘅障礙。」
成名的代價是改嫁母親及髮型師父親被偷拍、大埔祖屋被起底：「我都唔明點解話我踎村屋，村屋好好住o架！」
大埔圍村長大，羅仲謙說自己從小生活與頭腦都單純：「我唔食煙唔飲酒唔出街玩，做消防員搵萬二可以儲一萬。」
縮胸
40吋胸肌曾經男女通殺打響招牌：「已經過 咗追求大隻身材嘅階段，o依家工作太攰，冇得操。」《忽然 1周》圖片
在大埔圍村長大，一大家族住一棟村屋，少娛樂少朋友少出城，最遠是搭巴士去青衣做救生員， 20歲才學會上網有第一部電腦……以前，入行即被封為「大波謙」的羅仲謙最闊的，的確是胸肌，不是眼界，不過簡簡單單，樂在其中。
這兩年跌跌撞撞，他說自己胸變小了、人長大了：「人哋話我成熟咗，我覺得係呢行迫我長大，做嘢太辛苦，值得開心嘅嘢又太少，見到以前班同齡朋友比我單純得多，其實我好羨慕，係佢哋嘅福氣。」
當然，我知道，羅仲謙緬懷的是逝去的單純，而不是縮水的胸肌。
撰文：朱小博
攝影：範仲良
形象： Bryan@the Flaming
服裝： izzue
.男人信甚麼 羅仲謙
http://veryy8.blogspot.com/2013/01/blog-post_3792.html
