《玩嘢王》玩出禍 阿 Bob爆粗：搞乜 X嘢!

媽咪姐

《玩嘢王》玩出禍　阿 Bob爆粗：搞乜 X嘢!

無綫近排啲劇集已經唔好睇，就連皇牌《金枝慾孽貳》都因為太多人物出場，搞到媽咪姐同班 C9 friend頭都大埋。反而由李思捷擔大旗嘅整人節目《玩嘢王》口碑唔錯喎，製作認真不特止，被整嘅嘉賓亦異常「交戲」。

好似第一集嘅林盛斌（ Bob），喺節目入面被安排做婚禮司儀。面對結婚蛋糕跌落地、舊愛搶新娘等突發事件，阿 Bob反應迅速，即時執生，果然係一個好司儀！不過婚禮背後，原來唔少火藥味，阿 Bob仲差啲同人吵大鑊。佢解釋：「每次入房都會檢討之前有無講錯嘢，有時忟起上嚟就會爆粗。最忟嘅，係本來上台賓客有一千蚊利是，但最後變咗廿蚊！所以我一入房就抦個伴郎：『搞乜 X嘢呀！』」

事後阿 Bob得知被李思捷整蠱，都有啲無奈㗎。不過學佢話齋：「玩我即係睇得起我！」無綫下一個力捧嘅，可能就係佢！

被玩逐格睇

作為婚宴司儀嘅阿 Bob好專業，除咗比預定時間早到，之後向所謂嘅婚禮統籌人詢問一對新人嘅背景，做足功課。

一對新人切餅仔，蛋糕突然倒下。醒目嘅 Bob即時以「落地開花，富貴榮華」打圓場。

抽獎時，大會預備咗一千蚊金牛俾賓客，點知拆開時變咗廿蚊。阿 Bob當堂 O嘴，幕後主謀李思捷則喺度喪笑。

得悉被整蠱後，阿 Bob面帶無奈。不過佢專業表現就獲得網友一致激讚。

. 《玩嘢王》玩出禍　阿 Bob爆粗：搞乜 X嘢!
http://hittt.blogspot.com/2013/04/bob-x.html