單人訪
強人是我能飛天遁地 鍾麗緹
未婚懷孕、結婚、離婚、再結婚，再生女、再離婚，這等事情倘若發生在一個四十出頭的香港女子身上，她可能已經身心俱疲，甚至自我形象低落。
在香港生活，就連鴨兒都會洩氣。
同一遭遇發生在鍾麗緹身上，我們不會看見她洩氣，她只會用盡全力彈起。
「離婚後仲開心，因為嗌交好嘥時間！」
看，多麼言簡意賅。從不計較別人的眼光，所以從來沒有包袱。
拿得起放得低，向來是鍾麗緹的戀愛和做人態度。
合則來不合則去，性感女神也可以生足三個孩子。
作為單親媽媽，她確有飛天遁地的本領；但作為人家的太太，她就是太強。
「依家要盡量學溫柔啲，原來男人都係鍾意小鳥依人嘅！」
性感跟溫柔原來不一定掛鈎，後知後覺，總好過不知不覺。
媽媽，佢好靚仔呀
才早上十一時，鍾麗緹已和在北京的女兒通了三次電話。
「最早嗰個電話係七點，佢哋一瞓醒就打俾我。」
她笑得很甜。來香港兩天，密集式的宣傳由朝排到晚，但不論女兒甚麼時候打來，這個媽媽總無任歡迎。
「我好鍾意小朋友，見到佢哋就開心。上次嚟香港專登走去玩具反鬥城，買咗個 Star Wars面具，返到北京時就帶住嚇佢哋，叫佢哋估下我係邊個。」
鍾麗緹手舞足蹈即席示範如何發出怪叫嚇女兒，我們未來得及反應，她自己先笑得人仰馬翻。三個女兒分別是十五歲、四歲和三歲，來自兩個父親，現時都跟她生活。
「大女已經係 teenager，佢有自己世界，少少反叛啦，但都算幾乖。佢好 active，鍾意彈琴、結他同埋運動，又鍾意讀書，基本上唔使我擔心。佢陪我經歷咗兩次離婚，因此思想比較成熟，好明白 life係乜嘢一回事。第二個女最似我，貪靚呀，尤其鍾意靚仔。隔籬屋有個六歲嘅小朋友，佢成日話：『媽媽，佢好靚仔呀！』我朋友有個三十幾歲嘅司機，佢又話人哋靚仔……第三個女就成個男仔頭咁，想同佢睇卡通，佢就要睇賽車，仲唔俾我轉台！依家主要同佢哋講國語同英文，但已教緊法文同廣東話。廣東話佢哋學得好快，聽我同朋友講電話已學到幾句，只係講得唔正，『我掛住你』變咗『我瓜住你』……」
雖然兩段婚姻均是失敗收場，但看今天鍾麗緹談及女兒時由心底發出來的快樂，肯定無怨無悔。
「我十幾年前第一次結婚生女時個個都問：『你事業高峰喎，你好紅喎，做乜咁快結婚？』我 93年來香港，到 98年已拍咗二十部電影，已經好攰，加上我所有屋企人都在加拿大，一個人喺香港好 lonely，好想有個 family。我從來唔覺自己係咩性感偶像，亦無諗過生 BB會動搖自己喺 fans心目中嘅位置。即使知道，我亦會照做，我心諗，有咗家庭之後唔係更加有動力工作嗎？所以當時無考慮太多。」
錯在太強
任性加寂寞，造就了第一段婚姻。大女兒叫 Yasmine，鍾麗緹說因為女兒是混血兒，這個名字很有 exotic（異國情調）感覺。當年她拍拖幾個月便和外籍男友閃婚，兩年後因了解而分開。 03年她與來自台灣的音樂人嚴錚結婚， 08年開始更三年抱兩，但兩公婆還是於 11年離異。
「第二個女叫 Jaden，因老公叫 Jon，都是 J字頭。細女叫 Cayla，因為我叫 Christy， C字頭跟媽媽，就係咁簡單。離婚當然好可惜，但有啲事真係無得好講。應該係我太強喇，一直都係自己搵錢，自己照顧自己同三個女。我係一個可以 multi-task嘅女人，同一時間可以一邊開車、一邊化妝、一邊食嘢甚至教女。我喺屋企慣咗發號施令，有時對老公都係咁。男人通常鍾意小鳥依人嘅女仔，我唔夠溫柔。」
她婚後移居北京，單是拍廣告和出席宣傳活動已不愁工作，偶爾還拍電視劇，一直是家中經濟支柱。反觀丈夫的音樂事業一直停滯不前，兩年前離婚時鍾麗緹說過導火線是因為「我係鍾麗緹」，她無論名氣與性格都比丈夫強，長期女尊男卑。這個年頭兩次婚姻失敗不是甚麼羞家事，問題是，有沒有從中汲取教訓？
「有，我終於知道女人要適當嘅時候強，適當嘅時候弱。有時要扮下乜都唔識，等男人照顧你。」
兩性相處，向來是一籃子學問，四十三歲的鍾麗緹算是後知後覺，幸好她並不覺得遲。
「短暫嘅唔開心一定有，但我會好快 delete。我要湊住三個女，如果成日記住啲唔開心事會好嘥時間。離婚之後其實仲開心，因為少咗好多不必要嘅吵架。我依然期待愛情，我係一個好熱情、好浪漫嘅女人，永遠都唔會放棄去搵 love。上天見我咁 sweet，一定會再幫我安排一個好男人，再遇到的話我一定會再拍拖，甚至再結婚， why not？我仲咁後生，又咁靚……（大笑）」
我可以老和醜
在加拿大蒙特利爾土生土長， 93年離鄉別井獨自來到香港打拼，轉眼間二十年過去了，鍾麗緹自覺現在才是黃金時間開始。
「人生有經歷，做戲先好睇！以前我做嚟做去都係花瓶，因為無人覺得鍾麗緹識做戲。今年係我入行二十年，以往拍過好多大明星同大導演，但 so far未有一部滿意，我真係唔甘心只係做花瓶。」
鍾麗緹是九十年代性感女神，對手以周星馳居多，也拍過劉德華、梁家輝、梁朝偉。也不是她獨有的問題，女星處於那個年代，基本上不需要演技。
「我只以為自己係普通演員，但原來不論我做乜大家都會覺得我 sexy。有咁多男人鍾意係好開心，但亦好局限發展。之前好多人都話：『鍾麗緹，一定係行性感路線㗎啦！』可能大家唔信，我最想演一啲老、醜或精神有問題嘅角色。依家等緊機會，我覺得以我今時今日嘅經歷，一定可以感動到觀眾，只希望有導演記得我。」
她今次來港宣傳的電影《瘟泉》，懸疑加驚慄片，不用作性感演出的她非常戮力地宣傳。
「依家拍戲會揀擇啲，有發揮先拍，如果好似以前咁賣弄性感，咁就唔拍喇！」
既然自覺是黃金時間開始，自然要「 Keep靚副偈」。鍾麗緹無論樣貌和身材都依然是戰鬥格，不是得天獨厚，而是成功靠苦幹。
「一定要每日運動，多食抗氧化食物，如藍莓、綠茶同骨膠原食物。咖啡、茶、可樂從來唔飲，但會食黑朱古力。飯都會食，但會用黑米。」
優雅地老去
訪問尾聲，正在拍照的鍾麗緹收到女兒打來的第四個電話，她用流利的普通話交帶助手代為接聽。
「最初去到北京時，真係唔識講，依家已經完全 OK喇，連一啲地道用語都識！」
據鍾麗緹推介，她最常接觸「盤兒亮」和「條兒順」兩詞，前者意指臉盤漂亮，即讚人靚女，後者則用來稱讚女仔身材好。
這兩詞應該是她經常聽到的，不許人間見白頭的寄望，在她身上尤其高。
「你哋叫我做『性感女神』啫，但我唔係『神』嘛，我都會老，只要 old gracefully就得喇！」
偶爾一條半條魚尾紋，應該勝過現今充斥市場的木偶鼻與 V煞臉。
能夠優雅地老去，也許只有上一代女神才能做到。
下期預告：
阿叔今年四十歲
- 強人是我 能飛天遁地
. 強人是我能飛天遁地 鍾麗緹
http://hot104.blogspot.com/2013/05/blog-post_3831.html. 強人是我能飛天遁地 鍾麗緹
http://hittt.blogspot.com/2013/05/blog-post_4968.html
