當街按摩
眾人飲飽食醉後，離開食肆期間，沈卓盈忽然向男友詐嬌，指自己膊頭痠痛，男友即緊張地為她按摩。
娛聞樂
直擊男友全家賀壽 沈卓盈年尾做億萬闊太
《情越海岸線》中，沈卓盈飾演的富家女 Amy刁蠻任性乞人憎，處處食住未婚夫鄧健泓。現實中，她卻小鳥依人冧爆男友，更連未來老爺奶奶都𠱁得掂。
早前本刊拍得 29歲的她，偕拍拖僅 8個月的楊秀惠前男友、金融闊少麥偉汶一家，在灣仔星街嘆貴價日本菜。席間與男友糖黐豆的沈卓盈，不忘做友誼小姐，不停逗男友雙親傾偈，十分識做。其間，記者更聽到眾人談論年尾婚事。
未夠一年，進取卓盈已光速融入麥家，抵佢榮升億萬闊太。
直不愁沒有男友的沈卓盈，去年跟飛機師男友 Simon分手後，隨即在好姊妹徐淑敏介紹下，認識當時正跟楊秀惠拍拖的金融闊少麥偉汶（ Ray），二人一撻即着，楊秀惠慘被狠飛。雖然與男友拍拖至今僅 8個月，但沈卓盈早已進駐男友與家人同住的跑馬地禮頓山億萬豪宅同居試婚。早前兩人更到日本九州浸溫泉預支蜜月，打得火熱。
行奶奶政策
月初，本刊發現沈卓盈偕男友一家，到灣仔星街「六角」嘆貴價日本菜。他們一行五人棄坐 VIP廂房，反而選坐壽司吧枱。眾人甫坐下，主理壽司吧枱的師傅已主動向麥偉汶遞上清酒，男方更開了一支自備帶來的四千元法國紅酒與師傅對飲，明顯是熟客仔。
飲酒期間，麥亦很照顧女友，不停替沈卓盈發辦 order貴夾唔飽的刺身。沈卓盈亦十分識做，多次主動撩身旁男友父母傾偈。記者聽到她不時對未來奶奶和老爺噓寒問暖，問：「冷氣凍唔凍？」又關心二人食唔飽：「你哋差唔多食完喇喎，不如叫阿 Ray再幫你 order其他？」對於未來新抱殷勤表現，兩老似乎頗受落，禮尚往來反問沈卓盈：「你咁瘦，食多啲先啱！」到切蛋糕為壽星女賀壽時，兩老更帶頭唱生日歌，可見二人已視沈卓盈為半邊女。
男友父母曾反對
雖然沈卓盈與男友雙親現時相處融洽，不過本刊收到消息，在她與男友拍拖初期，男方父母曾反對。據知情人士透露：「阿 Ray爸爸做測量師，份人好踏實。個仔之前同楊秀惠拍拖，佢已經有微言，因為屋企好傳統，覺得做呢行女仔太高調同金錢至上。而事實楊秀惠之前同阿 Ray拍拖都好高調，兩老對佢印象唔好。但送走咗佢又即刻嚟一個沈卓盈。佢哋曾經同阿 Ray傾過，但見個仔一意孤行，拍拖一個月就帶 Jessic（沈之洋名）返屋企住，兩個老人家都冇曬符！不過 Jessic好識做，知老人家唔鍾意高調，佢同阿 Ray開始拍拖嗰陣都冇同啲 friend講住。佢喺男友屋企住嗰陣，除咗自動自覺打理家頭細務，又成日煮西餐𠱁未來奶奶。過咗兩老嗰關，阿 Ray上個月已經同 Jessic求咗婚㖭！」
成功𠱁掂未來老爺奶奶，沈卓盈近日出席活動，都主動風騷提及男友，除了出口術指視對方為結婚對象之外，又大讚男友廚藝精湛比自己了得，「佢每次下廚我都全部食曬。」為嫁入麥家鋪路。
豪擺 50圍
在當晚飯局期間，記者亦親耳聽見眾人談及二人擺酒事宜，麥父喜歡君悅酒店，更豪氣說擺 50圍應該冇問題。可是阿仔則主張四季酒店，更指四季有熟人介紹，可以 book到年尾檔期擺酒，單是地點已出現分歧。而麥母則充當和事老，指地點可以再商量。眾人商議期間，沈卓盈一直乖巧地坐在一邊細心聆聽，沒有發聲。當麥父問她有何意見時，沈亦只細聲地說：「我冇所謂， Uncle你哋決定得啦！」啱嘅！極速箝實筍盤，沈卓盈願望達成，就算喺麥當勞擺酒都𦧲飯應啦！記者致電沈卓盈，但她的電話長期飛落留言信箱。
猛料老爺
沈卓盈男友 Ray Mak麥偉汶，是任職金融業的 fund佬，年約 35歲，其父麥鏡開更加猛料，是本地著名測量師。單是麥家位於禮頓山的 4千呎高層雙連單位， 02年以 4,938萬購入，現市值約 1.4億，升近 3倍。
麥鏡開亦是愛馬之人，廿年前已是馬主，其中愛駒「開心人」曾贏過遮打盃，近年再添兩匹馬「開心」及「歡心」，可見沈卓盈男友絕對是闊少一名。
- 冧掂未來老爺 沈卓盈嫁硬闊少
. 直擊男友全家賀壽 沈卓盈年尾做億萬闊太
http://hot104.blogspot.com/2013/05/blog-post_611.html. 直擊男友全家賀壽 沈卓盈年尾做億萬闊太
http://hittt.blogspot.com/2013/05/blog-post_9923.html
