我唔會再答佢啲嘢！（真實對白）
烚熟影相 攞住兩袋外賣的山聰，對住鏡頭擺出烚熟面口。記者趁機問他點睇超雲新戀情時，他煩躁地說：「我唔會再答佢啲嘢！」
滾熱辣
超雲曬新男友 𤓓爆山聰搵胞兄買醉
5月初何超雲從英國返港後，即在 facebook將感情狀況轉為單身，暗示與 36歲的陳山聰兩年情玩完。分手唔夠一個月，上周六（ 25日），超雲已帶着廿多歲新仔，高調往中環 IFC拍拖睇戲。兩日後更上載盆栽圖片，暗喻新戀情萌芽曬幸福，擺明落山聰面。
反觀失雲聰連日來卻蝸居九龍灣麗晶花園居屋，繼續晝伏夜出。據知失雲聰從英國箍煲返港後，還一直以為與超雲有得「𢺳」，即使美容中心 Regen以 80萬高價找他做代言人，他都 hold住唔敢接。
不過，隨着超雲新歡上場，山聰箍煲夢碎，心情跌落穀底。周一（ 27日），他惟有搵胞兄 Joseph買醉解悶。雖然山聰在鏡頭前強擠笑容，但提起超雲拖新仔，酸爆的他難掩怒火︰「我唔會再答佢（超雲）嘅嘢。」
4月尾，山聰赴英狂箍超雲，更被周刊拍下兩人「最後的晚餐」，未幾兩人前後腳返港，加上女方返港時一直冇認甩拖，令不少傳媒以為兩人假分手，就連男主角陳山聰亦以為這段情有得𢺳。
「超雲一直以來都冇同山聰正式講分手。喺英國期間，兩人仲玩埋煮飯仔，山聰向女友認曬低威，以為女友會回心轉意。佢哋拍拖期間，超雲稍有唔鍾意，都會玩失蹤，山聰以為今次女友只係發小姐脾氣，佢當時仲未意識到自己已被飛，仲諗緊等女友返港後點樣𠱁番佢，不過實情係超雲已經部署好撇佢。」知情者說。
英國試新戀情
據知山聰未去英國，超雲的幾位好友已暗飛倫敦陪她，更密密為她介紹新仔，不少還是富二代。年僅 24歲、有錢有青春的超雲，當然不愁冇巿場，飛來蜢陸續有來。「超雲班 friend知佢決定撇山聰，個個都介紹男仔俾佢，最近俾傳媒影到同佢睇戲嗰個靚仔，係超雲死黨 Vincent個 friend，都係 ABC，屋企有啲家底。超雲第一次見對方已經有 feel，交換電話之後好快就單獨約會。」
超雲攜新歡上場勁風騷，反觀被丟棄的陳山聰不堪人財兩雙，頻頻找好友及親人飲酒買醉，鬱悶難舒。繼早前找來好友郭政鴻訴苦後，周一（ 27日）晚，其胞兄 Joseph亦出動安慰失雲聰。
當晚 7時許，山聰由胞兄駕車到紅磡「一品雞煲火鍋」買外賣。其間他見傳媒影相，強擠笑容，但難掩殘爆面容。記者問他近況，他笑笑口死撐︰「幾好呀！」但當記者問到超雲新戀情時，他突然面色一沉說︰「我唔會再答佢啲嘢！」問到會否祝福超雲，山聰木口木面當聽唔到。
低胸會仔
上周六（ 25日）一身 casual打扮的超雲高調與新歡到 IFC睇《狂野時速 6》。記者發現她上衣單薄，更微露事業線。散場後，超雲與新歡分頭走，超雲被問到是否有新戀情時，風騷答：「嘩，邊有咁快呀？」換句話說，她不排除與「新歡」發展的可能啦！
特價隊啤買醉
買完外賣，山聰返回胞兄東湧寓所「水藍•天岸」稍作逗留。十多分鐘後，兩兄弟齊齊步行至附近的酒吧「 Zentro Garden」隊啤。不過，冇超雲照的山聰，今時唔同往日，連隊啤都揀特價時段。兩兄弟談心一小時左右便離去，埋單一百蚊有找，認真慳！兩兄弟意猶未盡，之後再返回 Joseph寓所，至深宵仍未見出來。看來山聰有大把「苦水」要向胞兄傾訴。
失 80萬廣告
超雲話咁快投入新戀情，但早前依然發緊「豪門夢」的山聰，卻一直蒙在鼓裏。據知山聰月初由英國返港後，韓國醫療集團 REGEN曾高薪找他出任代言人，但他卻為箍煲痛失 80萬廣告。
據知 REGEN好有誠意，初時出價 40萬搵山聰做半年代言人，還表示會掟百萬做密集式宣傳，令他曝光率大增。雙方初次商討是山聰從英國箍煲返港後第二天（ 5月 4日）。初時山聰都表示有興趣，只欠細節未傾。不過，自超雲 5月 8日從英返港，山聰態度突變，更向廣告商開出天價，聲言要 100萬才拍。
「其實山聰當時心大心細，佢以為同超雲仲有得𢺳，怕女友唔鍾意佢拍廣告，於是特登開個天價，諗住拖住廣告商先，再靜觀其變。後來廣告商肯加碼至 80萬，但佢連覆都唔覆。拖拖吓，人哋見佢遲遲未覆，咪不了了之。最近他主動翻𢱑話 80萬都 OK，但廣告商已另覓人選。」知情人說。
就此事向 REGEN負責人馮小姐求證，她表示︰「係有搵過山聰做代言人，皆因覺得佢潮人形象啱。（係咪 80萬搵佢拍？）廣告費係商業秘密，不便透露，但佢都值呢個價，我哋好有誠意同佢合作！（最後因為山聰出天價傾唔掂？）每個人心目中都有個價，呢個係原因之一，但我亦唔排除將來大家有合作。」
操弗再戰娛圈
昔日，超雲與山聰相戀，不但要求男友與多年髮妻 Pony離婚，為了將山聰升呢，更要他與圈中人斬纜及謝絕一切藝人工作。而山聰為求入豪門，不惜得罪圈中好友及監製，全職侍候女友。現在，他不但返唔到娘家無綫拍劇，更為箍煲連 80萬廣告都冇埋，見財化水，犧牲認真大。
痛定思痛，山聰豪門夢醒，惟有積極另謀後路。近日他頻頻健身，務求以最短的時間操弗身材，更聯絡好友關楚耀，打算開闢時裝品牌。儘管「四失」，路還是要繼續行，山聰硬住頭皮聯絡以往的圈中好友，希望有轉機重返娛樂圈。冇得做賭王女婿，惟有繼續返回現實世界捱騾仔！
整容一站式
開價 80萬搵陳山聰接拍美容廣告的 REGEN，中文是「韓國麗珍醫療集團」，由醫學面部護理到隆胸削骨等整容療程，統統有齊，是一站式美容整形服務。 REGEN 04年於韓國成立，去年 6月才正式登陸香港，於旺角和尖沙嘴設有專門店。
三太：超雲人生經驗未夠
三太早前接受王賢誌（ Vinci） Now102觀星台的《 Vinci Code》訪問，三太指超雲為表支持母親，曾主動提出有意出任東華總理一職。三太在節目中說：「大女（超雲）為支持我做主席，提出做總理嘅要求，不過我覺得唔適合，因為佢嘅人生經驗唔夠，起碼到三十歲先啦！我成日叫佢哋學習放低，佢哋唔開心係因為介意別人嘅睇法，而且我要佢哋學習原諒別人，要寬恕別人，自己才有得着。我都明白要去到某個年紀，佢哋先會感受我講緊乜！」
孖公仔
向來衣着大膽的何超雲，每次拍拖愛以情侶裝見人，為求襯到絕，她決心改變自己形象，務求打扮與另一半愈見相近。難怪她與新歡睇戲時，又突然轉 casual look啦！
浮誇扮潮
她與陳山聰拍拖時，力改對方形象，令他衣着品味大改變，出街化妝之餘，更着透視裝配大件飾物，愈變愈妖。以往重視形象的陳，身材更變得脹蔔蔔，肥成個碼。而超雲為了配合山聰妖冶形象，就染了一頭金毛，更經常以全黑 look形象示人。
青春日系
超雲是何家掌上明珠，所以她必以歐美貴婦打扮出入 ball場。 10年，她與主修時裝設計的皮草太子爺王大業拍拖時，衣着卻 180度轉變，玩青春少女形象。曾指最憎㗎妹打扮的她，為了襯男友，索性轉玩日系 look，淡妝加熱褲。
何家女多戀事
賭王何鴻燊兒女戀事一向惹人關注，三、四房兒女的私生活多姿多采，戀事浪接浪。除超雲外，三房的超蓮和四房的超盈，近日又有新聞。
超蓮 力撐男友
三房何超蓮與緋聞男友吳克羣打得火熱，早前男方在微博留言：「閉上眼睛忍着呼吸！」暗指自己於台灣金曲獎入圍名單榜上無名，超蓮即時出面力撐指：「這麼好的專輯都沒有入圍！台灣金曲獎太不公平了！」二人戀情愈來愈浮面。
超盈 再撻愛兒
10年，有傳四房何超盈搭上愛作男性打扮、林建嶽細女林愛兒。早前她發生迷遊銅鑼灣事件，愛兒未有力撐之餘，更與其他女伴夜蒲，一度有指二人決裂。不過上周超盈被拍得與愛兒及其母謝玲玲等，一家同遊澳門，二人同性關係再度升級。
. 超雲曬新男友 𤓓爆山聰搵胞兄買醉
http://hot104.blogspot.com/2013/05/blog-post_9559.html. 超雲曬新男友 𤓓爆山聰搵胞兄買醉
http://hittt.blogspot.com/2013/05/blog-post_140.html
