約滿轉投杜琪峰 謝天華暗寸無綫俾唔起錢

娛聞樂

約滿轉投杜琪峰　謝天華暗寸無綫俾唔起錢

今年 7月約滿無綫的謝天華，早前表示決定離巢北上搵人仔，同時亦有傳他向無綫索價 5萬一集轉簽部頭約。謝天華回應本刊時冷笑：「人哋（無綫）俾到先得㗎！」而坊間更爆出曾志偉新開的經理人公司，有意拉攏謝天華，可惜「 Laughing Gor」其實心有所屬，據知他有意約滿無綫後轉投杜琪峰有份投資的「北京海潤」，啱曬佢搵人仔目標。

杜琪峰執導的電影獲獎無數，今年 5月他帶着新片《盲探》大隊往康城，進行全球首映，散場時全場觀眾起立鼓掌唔願走。

《路透社》圖片

年前「魔童」王維基以銀彈攻勢挖走張可頤和林文龍，一姐佘詩曼與林保怡約滿無綫亦轉往北上發展，令無綫一線花旦小生買少見少。在無綫多年的謝天華，雖然前年憑「 Laughing Gor」一角成功上位，劇集拍完續集再開拍電影，但他始終未能憑該角色一嚐視帝滋味，據知此事令謝天華深深不忿。知情者透露：「捱咗咁多年終於出頭，天華都想攞番個視帝，點知一年又一年，都係冇佢份！既然無綫唔識做，天華留低都冇意思。」

無緣攞視帝

09年謝天華在《學警狙擊》雖然只飾演男配角，但劇中的梁笑棠（ Laughing Gor）卻最得民心，更在無綫台慶頒獎禮奪「最佳男配色」。到 11年 Laughing Gor升呢做男主角拍《潛行狙擊》，可惜到年尾頒獎禮，進入最後五強便止步。去年拍住陳法拉的《法網狙擊》收視和口碑都唔錯，但連視帝提名都冇。

謝天華於電話回應本刊時仍耿耿於懷：「當時係有唔開心㗎！ Laughing Gor呢個角色咁多人鍾意，攞唔到視帝都算係一個遺憾，竟然喺自己嘅電視台攞唔到獎，反而返內地就攞咗幾個獎。世事係唔完美，但咁先發現原來自己喺內地有市場喎！」無綫厚此薄彼到如斯田地，亦難怪謝天華想脫離「親生仔」行列。

掀 Laughing Gor熱

Laughing Gor由《學警狙擊》開始走紅，再搬到大銀幕《 Laughing Gor之變節》，之後揾來影帝吳鎮宇客串《 Laughing Gor之潛罪犯》，票房仲過千萬㖭！

視帝無佢份

一心以為《潛行狙擊》 Laughing Gor一角可以一嚐視帝滋味的謝天華，最後卻輸俾鄭家穎的《怒火街頭》，失望到極。

寸無綫手緊

據知無綫現時為了挽留當家花旦小生，願意作出妥協，包括大幅度加薪。有傳謝天華亦趁機開條件，向無綫索價 5萬蚊一集，一年只拍一劇，轉以部頭約形式合作，其餘時間方便他北上搵人仔。

為此謝天華說：「同無綫合作咗咁多年，唔會想斷六親囉。我哋只係轉合作形式啫，唔會斷絕關係嘅。 5萬蚊一集？講之嘛！人哋（指無綫）俾到先得㗎！ TVB出手唔會太高。我真係無要求任何嘢，反而係佢哋（無綫）開咗個好好嘅條件俾我就真。」

眼見很多舊同事北上撈得風生水起，買樓換車 job接 job， 7月才約滿無綫的謝天華，亦成為搶手貨。先傳王維基有意找他加盟香港電視，後有曾志偉撬謝天華過檔到其自組的經理人公司。近日本刊收到消息，謝天華曾與「北京海潤」傾簽約事宜，並初步達成口頭協議。難怪被問到一切過檔傳聞，謝天華坦言只對「北京海潤」有興趣，「原來我咁搶手㗎！不過都只係傳啫，唔係事實嚟嘅。我知志偉非常之有實力，我同佢係有一個良好嘅關係。北上發展當然係有經理人會好辦事啦！我都物色緊，如果杜 Sir搵我拍戲，當然係最想啦！」事後記者亦致電杜 Sir，但他正身在康城參加影展，未能就此事作出回應。

《神槍狙擊 2013》將會是謝天華身為無綫親生仔的最後之作，而劇中他的「子彈會轉彎」的秘技，涉嫌抄襲西片《 Wanted》。

謝天華和曾志偉關係要好，《獎門人》今年再添食，遠飛日本取景亦有佢份，第一集錄影又做嘉賓，難怪外傳佢會跟志偉搵食。

拍劇登台狂收人仔

香港藝人鍾意返國內登台拍劇，貪其搵錢快，仲要收人仔。登台唱幾首歌，十萬八萬袋袋平安；而拍劇則以每集計，以謝天華的知名度最少收十萬一集，拍套 20集的劇便輕鬆有 2百萬入袋，的確係好過在無綫日捱夜捱。

國內頻攞獎

雖然與視帝無緣，但 Laughing Gor在國內十分吃香，《潛行狙擊》一劇已為謝天華在內地成功奪得 5個獎項，更與陳法拉同奪「熒幕情侶」之獎項。

有傳謝天華早前於廣州登台，上台 45分鐘，唱了 3首歌，包括〈聽海〉、〈愛的初體驗〉和〈友情歲月〉， 25萬人仔便袋袋平安。

年前謝天華與鄭嘉穎合演的內地古裝劇《英雄》共 38集， 4月已在台灣進行首播，可見他在內地和台灣都人氣爆燈。

北京海潤來頭勁

杜琪峰與國內夥伴合作投資的「北京海潤演藝經紀文化發展有限公司」，是國內一間實力非常雄厚的經理人公司，旗下國內知名藝人有劉燁及孫儷等，香港藝人亦有鄧麗欣、謝君豪、滕麗名、魏駿傑及去年新簽的洪天明等。北京海潤背後更有「海潤影視集團」撐腰，它是中國內地主要的影視製作公司，每年平均生產 600套劇集，再加上杜 Sir做生招牌，令很多香港當紅藝人都想轉投旗下。

洪天明去年簽約北京海潤後，劇集一套接一套，他已拍了 5套劇集，當中不乏武打場面，拳拳到肉，每集穩袋 10萬人仔。

鄧麗欣 10年開始進軍內地，同年以女主角身份與男友方力申合演《風雨桃花鎮》，幾年來都是演一些乖乖女角色，平均都有 8萬人仔一集。

. 約滿轉投杜琪峰　謝天華暗寸無綫俾唔起錢
http://hot104.blogspot.com/2013/05/blog-post_479.html. 約滿轉投杜琪峰　謝天華暗寸無綫俾唔起錢
http://hittt.blogspot.com/2013/05/blog-post_1368.html