新抱爆粗鬧老公奶奶 志偉家醜唱通街

皺眉回應

知道新抱在網上大爆家事，見慣世面的曾志偉亦無奈地皺眉說：「夫妻鬧交都好正常，佢要發洩都冇辦法。」

大封面

新抱爆粗鬧老公奶奶　志偉家醜唱通街

去年除夕夜， 60歲的曾志偉衰多手代出頭，涉嫌掌摑黃浩被警方拘捕，事件擾攘 5個多月仍未平息。外憂未平，內患緊隨而至，本刊收到消息，近日曾志偉孻仔曾國猷（ Mark）的妻子張可蕙（ Renee），在網上討論區不單大數奶奶（曾志偉老婆宋麗華）惡頂乞人憎，更恃着有女在手，當老爺志偉是人肉提款機。同時，她亦在 facebook與老公用粗口互罵駁火，內容粗鄙露骨。上周，本刊向甚少理家事的曾志偉求證，對於家醜外揚，他無奈地說：「佢（ Renee）要發洩我都冇辦法，仔大仔世界，希望佢哋兩公婆自己搞掂。」至於被新抱喪踩的奶奶宋麗華就嬲到出煙說：「呢啲係家事，我會返去屋企處理。」

縱橫演藝界 40年的曾志偉，一向甚少提及自己的家事，去年 9月，其孻仔曾國猷和老婆張可蕙，結婚連同女兒百日宴齊齊搞。一向要面的曾志偉，當日豪花百萬在金域假日酒店筵開 30席，同時送女家百萬鑽飾，出手闊綽。可是，表面雙囍臨門的志偉，近日卻家宅不和，最慘係家醜外揚。

本刊日前在志偉新抱張可蕙（ Renee）的個人 facebook中，發現她數度爆粗狂數老公曾國猷，更多次指嫁給他全因為其老竇是曾志偉，盡顯極品港女本色。

緊張睇留言

上周一（ 20日），本刊記者到電視城問曾志偉回應。其間記者遞上新抱的留言給他看，原本笑口噬噬的志偉，面色一沉。

表面融洽

曾國猷（ Mark）與張可蕙（ Renee）去年 9月奉女成婚，人前一家三口表現得相當幸福，但原來只是得個樣，兩公婆面和心不和。

幸福之家

去年 9月，曾國猷與太太 Renee擺酒，曾志偉與太太、兒子曾國祥及女兒曾寶儀齊齊出席婚宴。當晚雖然星光熠熠，但據知 Renee卻嫌老爺只肯在 Holiday Inn擺酒，唔夠排場。

《蘋果日報》圖片

爆粗嫌老公冇錢

本身在大圍屋邨出身的 Renee，早前更在 facebook大呻開製作公司的老公唔黐家。她說：「一日玩到天光先返，第二日到依家都未返，又講到幾掛住個女，大時大節都唔陪下個女同老婆，寧願自己喺房瞓覺，呢個是否正確的父親同老公的行為？」向曾國猷開火。

而曾國猷（ Mark）亦不客氣以兩段英文留言反罵對方：「你淨係識投訴同話我又 on×又樣衰……我有冇叫你做嘢……，你淨係識喺度投訴。我真係好攰，我成個星期都要返工，我冇曬能量！」

愈鬧愈有火的 Renee，隨即以粗口回應：「唔係淨係得你一個辛苦㗎曾生，唔好以為湊仔好過引（癮），你出去返工唔係大×曬㗎！成日搵做嘢嚟撻我，我知你好×忙，好×多嘢做，但唔係淨係得你一個忙，你試下湊一日仔呀……你最好搵到錢令到我一聲都冇得出就最好！」用詞十分粗鄙。

夫妻 facebook開火

曾國猷（ Mark）見到太太張可蕙（ Renee）在 facebook鬧他唔黐家，戇居兼樣衰。他隨即用英文留言反擊，指她唔識打理生意，只係識得嘈。

狂爆粗

嫌老公賺錢少

Renee亦寸他沒有湊過女，不知道她的苦處，更暗指老公搵唔到錢。

因志偉而嫁曾國猷

Renee坦言嫁給曾國猷，全睇在曾志偉份上，她更鬧老公是「死肥柴」。

貪有屋有工人

Renee做曾志偉媳婦，有銀線灣大宅住，又有工人用。

當志偉係提款機

原本兩公婆鬧交屬平常事，不過鬧得性起的 Renee，竟然連老爺志偉都辣埋。本刊收到幾段她與朋友在聊天室的對話，當中她直認當曾志偉是提款機：「成日要喺屋企受老公及奶奶氣，如果佢唔係姓曾有大屋住有賓賓用，我早就走×咗。」其間，她更不諱言已將曾志偉給她的一百萬花清：「勞×氣，叫佢（曾國猷）攞錢成日話無，無咪問佢老竇攞囉……（她的朋友問：『佢老竇之前唔係俾咗成百萬你哋咩？』）係又點，洗（使）曬啦，佢老竇係曾志偉，一百萬打個咳嗽就有。……反正我有個女，佢哋奈我唔可（何）。」其間有朋友曾提醒她家醜不可外傳，可是她一於少理。

靠女攞百萬

Renee向友人承認曾志偉曾給予 100萬他倆夫妻，又指曾國猷不肯攤大手板問志偉攞錢。

曬 Hermès

Renee經常在「親子王國」討論區曬命。早前她便曬在法國買、價值 15多萬的 Hermès Birkin袋。同時亦喜歡放自己女兒的近照。

Sales妹黐金糠

據知現年 33歲的 Renee，未婚前在化妝品店做售貨員，最愛在夜店獵富二代，過往曾數度因逼婚而遭男友拋棄。前年，她在夜場邂逅曾國猷，兩個月內便「一擊即中」以肚箍仔。雖然張可蕙多次在 facebook爆粗指老公冇錢，但據知曾國猷多年前開設一間製作公司，專幫廣告和 MV搞後期製作，一個月最少搵四、五萬。而立志釣金龜的 Renee，似乎仍未心足。

據其密友透露：「 Renee成日想釣金龜。佢知道阿 Mark（曾國猷）係曾志偉個仔先箍實佢唔放。拍拖唔夠一個月，已經執曬行李搬去阿 Mark喺銀線灣間別墅住，冇幾耐仲大埋肚。」

除了奶奶唔妥新抱到出面，而閱人無數的志偉，亦曾開聲提醒兒子要帶眼識人。密友續說：「 Renee大咗肚，阿 Mark帶佢見志偉傾婚事。志偉私底下同阿 Mark講：『睇定啲先，等個 BB出咗世，先擺酒都未遲！』」

鬧奶奶乞人憎

曾志偉 88年以二百多萬購入銀線灣彩濤別墅，現時別墅住有志偉老婆、曾國猷一家三口。有指婆媳關係極差，經常家嘈屋閉。

奶奶流連公園

鬧老公冇用，當志偉係提款機， Renee亦不放奶奶在眼內。早前她便在「親子王國」討論區，化名「 Renee719」狂數奶奶獨裁兼全世界最最最乞人憎動物。本刊連續數天在志偉銀線灣別墅等候，發現志偉老婆慣性駕着其白色 Benz座駕外出，然後到將軍澳寶林邨商場打躉。在商場快餐店食完晏後，她便逕自到附近公園，一坐便坐足三、四個鐘，其間愁眉深鎖，心事重重。記者上前訪問她，得知新抱將家醜唱通街，她即黑着面不停說：「呢啲係我嘅家事，我會返屋企處理。」

奶奶出煙

上周，本刊記者向曾太宋麗華表示，其新抱在討論區鬧她獨裁乞人憎，她氣沖沖說：「呢啲係家事，我會返去屋企處理。」

扯煙解悶

日前本刊發現宋麗華獨自一人到將軍澳寶林邨商場的大快活午膳。飯後她未有即時返家，寧願在公園扯煙攤唞周圍遊三粒鐘才回家，避見新抱。

兩段婚姻

曾志偉與首任妻子王美華結婚後，生下寶儀及詠儀兩名女兒， 3年後離婚。之後再娶宋麗華為妻，生了兩名兒子國祥及國猷。早年，他們一家六口為曾志偉母親賀壽。

志偉無奈

老婆㷫到出煙，上周一(20日)，曾志偉在電視城錄影《超級無敵獎門人終極篇》，記者向他表明來意。他看過新抱的網上留言後，皺着眉說：「每個人都有情緒，網上發洩我都冇辦法。我一向都對仔仔採取開放態度，佢兩公婆嘅事，佢哋自己搞掂啦，我唔會理！(你新抱當你提款機攞錢，你當初係咪唔想佢入門？)關我咩事？阿仔鍾意咪得囉！佢娶之嘛又唔係我娶！鍾唔鍾意都係佢嘅事，我冇意見！」記者再追問點睇新抱，他即以錄影為由轉身走入化妝間。

黃浩落口供

去年除夕，曾志偉在婚宴上涉掌摑黃浩被捕。事後黃浩多次到警署落口供。

志偉愁爆

涉掌摑黃浩後，警方火速搵曾志偉到警署。他三度到警署續保候查， 6月初，他要再到警署報到。

今年為曾志偉 60大壽，早前無綫為他大擺壽宴外，更揼本讓他拍《超級無敵獎門人終極篇》，上周先播出日本外景環節。鹹味全走，但遊戲卻被指抄外國節目《 Running Man》（右圖）。

六月初返警署報到

警察公共關係科回覆本刊

家事纏擾已夠煩，曾志偉去年 12月涉嫌掌摑黃浩一案仍未斷尾。據警察公共關係科回覆，六月初曾志偉便要第四度返中區警署報到。據知警方有機會檢控曾志偉普通襲擊罪，至於刑事恐嚇罪及妨礙司法公正罪，就會視乎取證多少才決定。對此，謝偉俊律師亦持相同意見。

曾志偉曾說過：「我一生人擺喺屋企同仔女身上嘅時間最少，可能有一日，我會覺得好後悔都唔定。」面對外憂內患，看來做人處世面面俱圓的他，是時候要兼顧自身和家庭了。

襲擊罪成機會高

曾志偉涉嫌掌摑黃浩事件至今已接近半年，有指他有可能被控普通襲擊、刑事恐嚇及妨礙司法公正三條罪。據謝偉俊律師指出，普通襲擊屬簡單罪行，取證較易，一般很快便會定案，警方調查接近半年，時間相對較長。「其實都有例外情況，好似牽涉嘅人較敏感，或者證人唔合作，都會拖慢調查進度。」他亦表示，如果調查仍未有任何進展，曾志偉可以提出取消擔保，同時迫對方表態告抑或不告。

謝偉俊律師亦指出，以上三條罪行當中，以普通襲擊罪較易成功控告。「其實你打人一巴，已經構成普通襲擊罪，至於另外兩條，罪行相對嚴重，而且取證亦要多啲元素。」他表示若普通襲擊罪一旦罪成，最高刑罰可判監一年及留案底。

. 新抱爆粗鬧老公奶奶　志偉家醜唱通街
http://hot104.blogspot.com/2013/05/blog-post_3590.html. 新抱爆粗鬧老公奶奶　志偉家醜唱通街
http://hittt.blogspot.com/2013/05/blog-post_9333.html