宅男夢碎
有樣有身材的 JJ，出道以來一直是宅男女神，但自從去年與「力王」樊少皇拍拖後，即收起性感等嫁人，女神幻滅，宅男夢碎。
娛樂喧
與樊少皇冷戰 JJ賤價翻簽阿叻
JJ賈曉晨自去年搭上比她大十年、兼有兒有女的樊少皇，要愛情棄麵包，更與老闆阿叻陳百祥鬧翻，今年 4月不再與公司續約。
做了 5個月自由人，以為坐定粒六等做「樊婦人」的 JJ，密謀靠男友科水開製作公司，卻因男友臨時縮皮令 JJ大失預算。本刊收到消息，近日 JJ與男友陷入冷戰，更主動向阿叻求饒，並低於市價以 200萬簽約兩年，約法三章以後乖乖只談工作不談感情，終令阿叻回心轉意。日前 JJ成功再上「獎門人」，「高潮眼」再現。
微博爆冷戰
JJ不滿男友打本開製作公司時臨時縮皮，二人現時正處於冷戰中。月中（ 15日），她便在微博留言，暗指遭人呃，網友紛紛向她詢問是否分手。記者亦發現， JJ最近一次上載男友相片已是七月初，二人關係似乎仍未修好。
03年出道的 JJ（賈曉晨），一入行已是阿叻旗下 Snazz的藝人，雙方更簽下十年長命約。昔日「事業線」強的她，肯搏肯露，堪稱「宅男女神」，更是各大小活動的常客，吸金能力不俗。可是，自從去年她與「力王」樊少皇相戀後，事業線與事業心同樣走下坡，更不理被指是「小三」，明知公司反對，依然選擇專心拍拖，最終得失阿叻，令二人鬧翻。今年 4月，她不惜放棄續約，麵包與愛情， 30歲的 JJ選擇了後者。
開公司撻 Q
JJ離開阿叻公司，一直盛傳有不少公司向她招手，包括王維基的 HKTV，卻只聞樓梯響。做了 5個月自由人，只拍過由男友樊少皇有份投資的一部內地劇《兄弟們上》。心慌慌的她，近日更因男友大開空頭支票，令她大失預算，二人因此面臨分手危機。
據知，樊少皇早前曾承諾 JJ打本給她開製作公司，讓他在內地拍劇搞製作也可肥水不流別人田，但樊至今仍未兌現承諾。
知情人透露：「力王當初叫 JJ離開 Snazz，誓神劈願話真金白銀科 400萬俾女友搞公司，因為佢話自己大男人，唔鍾意女人出去做嘢，最好晚晚煮飯等佢食。橫掂自己喺大陸拍劇都有搞開製作，既然係咁不如叫女友搞，唔使益外人。 JJ見佢講到實牙實齒，先大膽同叻哥反面離開。但呢幾個月，力王只係分幾次合共俾咗 100萬出嚟，話自己要先投資部大陸劇《兄弟們上》，壓死曬啲 cash喎。 JJ好嬲，講真 100萬點搞到製作公司呀，擺明 hea佢啦。」
主動道歉
公司開唔成，難怪上周日（ 15日） JJ在微博透露「有人」為了目的說上違背良心的假話，矛頭似乎暗指男友樊少皇。男友靠唔住， JJ惟有扮死狗食回頭草。 JJ一身邊人透露：「當初 JJ嬲叻哥唔俾拍拖，一怒之下咪唔續約，諗住自己有條件，出到去實唔會餓死。點知呢幾個月竟然冇乜人搵佢做嘢。其實咁多年 JJ事業都順風順水，基本上一出道就紅，冇諗過甩咗叻哥之後竟然要坐冷板櫈。早排佢死死地氣打俾叻哥耍冧，其實叻哥好易𠱁，佢要威之嘛，你俾面佢，有下台階，一切都易話為。再講，叻哥唔係蠢，都知全公司只得 JJ一個搵到錢，蔚雨芯同楊焉（ Carol）都仲未上到位，俾 JJ返嚟係遲早嘅事。」
戀情要沉底
據知， JJ除了主動求饒，更肯以超抵價 200萬簽兩年，以 JJ過往一個商場騷起標價收 8萬來說，續約價的確平到笑。為免她再掛住拍拖無心戀戰，阿叻講到明要她低調拍拖、不准揀工作及不能遲到早退。冇籌碼在手的 JJ局住應承，阿叻見她有心悔改，雖然合約年尾才生效，但早前已「放監」，安排她上好友曾志偉的「獎門人」節目，重拾曝光率。日前本刊分別致電 JJ和阿叻，但至截稿前仍未有回覆。
. 與樊少皇冷戰 JJ賤價翻簽阿叻
http://hittt.blogspot.com/2013/09/jj.html. 與樊少皇冷戰 JJ賤價翻簽阿叻
http://hittt.blogspot.com/2013/09/jj.html
