秘撻半年 吳浩康做鍾舒漫煮飯公 吳浩康,鍾舒漫,M1,

探熱針

秘撻半年　吳浩康做鍾舒漫煮飯公

曾經藏毒，又傳過靠前度莊思敏供養蒲性難改的吳浩康，半年前竟撻著虔誠教徒鍾舒漫。極端組合作用，吳浩康被感化到戒酒戒蒲，修心養性。

不過，有指英皇施壓，不准戀情見光。壓力下拍拖，二人唯有匿埋屋企，轉性吳浩康更為女友由蒲精變煮飯公，玩深閏。

其他影片

打動聖女

同門的吳浩康與鍾舒漫，早在撻著前已經好啱嘴型，非常老死。半年前，二人由知己變情人，但英皇上下，對這個壞男配聖女的組合均表驚訝，甚不睇好。

物極必反！地下情發展半年，感情愈見穩定，甚至有指吳浩康已見過鍾舒漫家長，並順利過關。

二人能夠撻得著，據悉是從大半年前開始，吳浩康忽然反常，由過去晚九朝五的夜蒲生活回復正軌，戒埋酒兼朝朝跑步健身。眼見老友原來仲有得救，虔誠教友鍾舒漫始讓吳浩康「埋身」。

前年被莊思敏狠飛後，吳浩康搭上蒲精 model Hazel（唐紫睿），壞男配醉娃，累鬥累！今年初跟 Hazel玩完，吳浩康決心洗底，擺脫頹廢。

「阿 Deep戒毒後就變咗酗酒，晚晚都去劈，直至同 Hazel散咗，個人好似忽然醒咗咁，佢話三十歲人唔想再頹落去，要過番啲健康生活。其實咁多年嚟 Sherman（鍾舒漫）都有鼓勵同支持佢，阿 Deep好需要人認同， Sherman就正正俾到佢，所以見 Sherman同 Steven散咗半年，佢就發力追。

「班 fd都有問 Sherman點解揀阿 Deep，佢話喺佢眼中，阿 Deep絕對唔係外面嘅人睇得咁壞，加上佢肯改，又搏命做嘢，話對阿 Deep有信心！雖然大家都話係向難度挑戰，但佢哋拍拖後，阿 Deep都有打俾 Steven交代，咁都係一種成熟嘅表現。」知情者說。

上女友鍾舒漫屋企前，吳浩康喺藍田超市買定餸。行去菜檔為女友晚餐細心挑選食材的他，由蒲精變住家男。

買完菜同海鮮，佢揀埋豬骨煲靚湯，睇嚟佢唔止冧掂鍾舒漫，仲行外母政策。

買到一袋二袋，吳浩康便由藍田搭的士過海去女友鍾舒漫搬入不久的深灣新屋雅圖閣煮飯。

聽話禁慾

近朱者赤！女友是虔誠教徒，吳浩康漸被同化，轉性做深閨男，甚至甘願為女友守十誡，禁慾「守齋」，變曬！

「佢成日陪 Sherman匿埋屋企玩煮飯仔，煲碟，唔出去玩！令 Sherman最開心係本來信日蓮教嘅阿 Deep，偶然都會陪女友返教會。 Sherman話大家已約法三章，講明婚前唔要有性行為，佢話阿 Deep好尊重佢，拍拖咁耐都冇犯戒。為咗增加女友信心，阿 Deep而家好搏命，乜戲都接，又幫內地電視劇做配樂，嚟緊仲同朋友開班教唱歌。」

去年

今日

有乖女友鞭策，吳浩康朝朝跑步做運動操 fit。日前他放上一張 fit爆相，與去年頹廢時的暴肥相作強烈對比。

𡁻完鬆

阿 Sa與陳偉霆可以公然拍拖，但同屬英皇的吳浩康與鍾舒漫，卻不獲公司接納，被落令不准公開戀情。二人拍拖半年，一直只匿埋屋企見，絕少一齊出街。

上週六（十一月十六日）早上十一點，吳浩康離開屋企到麗港城的超市買餸，其間，他不時回頭望，十分警覺。在超市買魚買蝦，還有菜同豬骨，買到一袋二袋，之後搭的士去到鍾舒漫位於深灣屋企，室內拍拖玩煮

飯仔。

嚴守十戒禁慾的阿 Deep，當晚果然「𡁻完鬆」，陪女友一家人食完飯，無留低過夜，獨自返歸。

跟 Steven拖拉多時的鍾舒漫，有指終在今年初斬攬。然而雙方再見亦是朋友，早前她為前度執導的微電影演出。

得悉吳浩康跟乖乖女鍾舒漫拍拖，莊思敏說：「如果係嘅話恭喜佢，搵到個好女仔，都希望佢開心，珍惜對方，生性做人。」

前度寄語：希望佢生性！

近年推出福音碟的鍾舒漫，是虔誠基督徒，有傳她曾帶男友吳浩康返教會聽道，希望感染對方信教。

. 秘撻半年　吳浩康做鍾舒漫煮飯公 吳浩康,鍾舒漫,M1,
http://hittt.blogspot.com/2013/11/m1_1425.html. 秘撻半年　吳浩康做鍾舒漫煮飯公 吳浩康,鍾舒漫,M1,
http://hittt.blogspot.com/2013/11/m1_1425.html