本宮都無能為力！（設計對白）
探熱針
3招救《金枝》 鄧萃雯拒做媒罷宣傳
恃住有慣性收視，在電視業界打橫行的 TVB，「收視神話」終於幻滅，在毫無對手情況下，兩套由視帝視後擔正的重頭劇《神探高倫布》及《金枝慾孽貳》，齊齊仆直，收視跌到徘徊二十點邊緣，《金枝貳》更試過低見十九點。
收視跌得如此慘烈， TVB諗盡辦法救亡，翻炒舊橋利用不和是非造新聞、密集式曝光穀宣傳、無限劇透引觀眾，希望刺激收視可以起死回生。不過身為女主角，靈魂人物如妃鄧萃雯就一於少理，拒絕再為《金枝貳》宣傳，話之佢死。
創收視新低
近年 TVB的收視差極都保持到廿五點（每點收視觀眾人數為六萬四千二）死線，但動用了金牌監製及視帝、視後主演的兩套重頭劇《神探高倫布》及《金枝慾孽貳》，竟然收視瘋狂插水，跌到平均只有廿二點（《神》劇）及廿一點（《金》劇），《金枝貳》更試過穿二十點關口，在上週三（五月一日）九時四十五分至十時的一節，陳豪獨腳戲唱崑曲及如妃鄧萃雯欣賞兩位不知名演員唱崑曲一幕，收視更跌至十九點。
《金枝貳》收視死因，除了節奏慢、角色太多太複雜，對白長而難明，加上除了陳豪、鄧萃雯、伍詠薇及蔡少芬有演技外，其餘做宮女、嬤嬤的配角如苟芸慧、葉翠翠等，講對白似背書，又欠缺面部表情，令整套劇扣曬分。
雪上加霜，欠缺第一集的佘詩曼、張可頤及黎姿三位經典人物，觀眾最入心入肺的爾虞我詐橋段、心狠手辣及後宮爭寵劇情，今集通通欠奉，變成謠言散播橋段，全部都係得把口齋噏，無任何令人睇得肉緊的場面，沉悶非常。
穀底一幕
上星期三（ 1/5）有一個時段只有十九點收視，就係陳豪獨腳戲唱崑曲，同如妃睇崑曲，似乎觀眾唔多欣賞崑曲。
三招救亡
為了向觀眾及廣告商有所交代， TVB曾諗計救亡，企圖穀得一點得一點。
第一招：狂穀！採用密集式宣傳計劃，每星期起碼有一個大型公開活動，安排不同演員做報紙雜誌、電台訪問，增加曝光。第二招：視透！監製戚其義原意是保持劇集神秘，嚴禁演員透露劇情，但觀眾一致意見睇極唔明，唯有臨時臨急搵演員在播出前講解每集重點，並讓傳媒刊登未來一星期劇情及畫面，希望劇透可引起觀眾興趣。
第三招：是非！○三年出街的《金枝》，戲內一班妃嬪爭寵大爆，除了戲外四位女主角不和是非，同樣引人入勝，所以 TVB照辦煮碗，將伍詠薇及鄧萃雯擺上枱，刻意製造公司偏重伍詠薇，無叫鄧萃雯出席宣傳活動，營造不和傳聞。
可惜鄧萃雯一於少理，拋下一句：「吓！關我乜事？」跟住更拒絕出席往後《金枝貳》所有宣傳，省得與伍詠薇同場造新聞炒作，連原本應承好做的專訪，也臨時全部取消，拒為《金枝貳》急救。
俾面出兩次
連甩三次底
喪刪重口味
《金枝貳》死得慘烈，而前一檔有視帝黎耀祥及金牌監製李添勝一對收視拍檔聯手的《神探高倫布》，同樣仆直，收視一星期低過一星期，上週收視平均只有廿二點，但由於已去到結局週，無藥可救。
同樣的組合，正拍攝新劇《巾幗梟雄三》，為免重蹈覆轍，李添勝要將劇本大量改動，在《神探》得到最多劣評的馬賽娃娃，原本在《巾三》是第二女主角，戲分僅次於胡杏兒，如今因為表現差及欠缺觀眾緣，要大量刪減其戲份，以免再佗衰家。
「套劇（《巾幗三》）已經拍咗接近三分二，但添哥見到《神探》死得咁緊要，於是將最後十集戲大改特改，變番做啲穩陣嘢，同埋原本套戲有好多強姦重口味場面，胡杏兒同陳自謠都有被姦，可能都要再修改，馬賽嗰場被姦戲就直頭冇咗；至於黎耀祥嗰場童年被雞姦戲，就仲諗緊要唔要。」一幕後工作人員說。
原本《巾幗三》大有機會成為今年台慶劇，但因為黃金組合收視被打破，無綫變陣，勢在難免。
大傷元氣
有慣性收視保護，即使無綫劇集質素參差，依然毫無知覺，過去被對手偷襲成功，也可以快速收拾殘局；今次破格黃金時段兩線劇集齊仆直，收視低至 20點邊緣，大傷元氣。
99年《反黑先鋒》
亞視播外購台灣劇集《還珠格格》，平均收視創開台新高 27點，打低無綫由黎耀祥、陳浩民、邵美琪等主演的警匪劇《反黑先鋒》，劇集結局也僅得 21點平均收視。
99年《非常保鑣》
林保怡、馬浚偉、陳妙瑛主演的《非常保鑣》硬撼亞視的《環珠格格 II》，同樣敗陣，平均收視只有 20點。
12年《天與地》
有陳豪、佘詩曼、林保怡等孭飛，劇情涉及食人情節、六四等破格話題，嚇走一班師奶觀眾，卻贏盡口碑，平均收視得 23點。
. 3招救《金枝》 鄧萃雯拒做媒罷宣傳
http://hot104.blogspot.com/2013/05/3_9.html. 3招救《金枝》 鄧萃雯拒做媒罷宣傳
http://hittt.blogspot.com/2013/05/3_9.html
