劉華要求 2,500萬片酬，仲要擁有最終剪片權，吳宇森一口拒絕，即時換人。（《蘋果日報》圖片）
探熱針
扮巨星 劉華大頭症 吳宇森㷫爆換人
保護性強的劉德華，為包密妻女，不惜每月花費數十萬，出動十名保鏢，租安全屋封出入。事業上，劉華自我防衞策略一樣嚴謹。去年他答應接拍吳宇森新片《生死戀》，執古天樂二攤都冇所謂，但電影拖至今年六月開拍，臨埋門簽約，劉華附加要求要有最終剪片權，吳宇森誓不讓步，一怒之下，臨時換角，由在內地大收五億的《北京遇上西雅圖》男主角吳秀波頂上，片酬 300萬人仔搞掂，抵曬！
男主角換曬
去年切除頸部腫瘤的吳宇森，病後休養多時，今年終於復工，早前與日本男星福山雅治拍完日本啤酒廣告後，下月將開拍籌備超過兩年，原名《 1949》、後易名《太平輪》，最終因版權問題再改為《生死戀》的電影，影片最初定好由韓國女星宋慧喬飾演的千金小姐夥拍張震做男女主角，膽拖古天樂和章子怡為副，不過電影籌備多時，加上吳宇森要養病，原本預曬期去年三月底開工的演員，亂曬陣腳。「套戲個個星都紅，要就啱期開工已經好難，仲要一拖再拖，古仔嚟緊要拍七部戲，五、六月撞曬四部，爆曬廠，根本無可能再唧到期出嚟，佢同張震都要辭演！」影片一名幕後人員透露。
最終男主角改由金城武替張震，古天樂就由天王級的劉華取代。首肯接拍的劉華，去年叫價千三萬人仔，唔夠一年，已加價到二千五百萬人仔，還講明只可以騰出一個月期。
慳番二千二
劉華在內地人氣同票房不差，同章子怡配對亦見得人，即使加價超過一倍，電影公司計過條數，貴都照用！不過，臨埋門簽約，劉華又提出要求有最後剪片權，令一直作出讓步的吳宇森極度不滿，決定換角。
「俾唔夠期仲要大幅加價，導演都唔介意去配合，但係話要最終剪片權，就未免踩到上頭，又唔見佢（劉華）夠膽同杜琪峯要求最終剪片權！」一名幕後人員說。
開戲在即，吳宇森臨時臨急大頭痕，眼見近日在內地大收五億的《北京遇上西雅圖》、同湯唯做對手的男主角吳秀波片酬三百萬人仔有交易，寧買當頭起，吳宇森嗱嗱臨，即用！
有前科
荷李活的巨星級演員，周不時都會在電影合約訂明要求最終剪片權，原來劉華早在《新少林寺》已經如此，由於合約是英皇所簽，導演陳木勝亦唯有逆來順受；有指劉華得寸進尺，經常在現場提出改動，經此一役，陳木勝曾私下對身邊人稱，不會再和劉華合作。
. 扮巨星 劉華大頭症 吳宇森㷫爆換人
http://hot104.blogspot.com/2013/05/blog-post_1966.html. 扮巨星 劉華大頭症 吳宇森㷫爆換人
http://hittt.blogspot.com/2013/05/blog-post_9203.html
