大練鋼 學偶像張家輝 陳柏宇 14日穀 6嚿腹肌

真面目

大練鋼　學偶像張家輝　陳柏宇 14日穀 6嚿腹肌

張家輝自《激戰》爆肌後，一眾男星杜汶澤、關楚耀、張繼聰等都跟風操 fit做大隻佬。

今年 30歲的陳柏宇 Jason，出道 6年一直瘦蜢蜢，可以話係孱仔一名，但最近宣布 11月舉行演唱會，開騷點都要露少少，仲學足偶像張家輝狂操 body穀肌，一星期做 5日 gym狂舉啞鈴，最重要係戒油、少肉、食菜，總之就冇啖好食，兩星期穀出 6腹肌，真係唔簡單㗎！

學我，有眼光喎！

出道 6年， 30歲的陳柏宇將於下月 29日舉行首個個人演唱會《陳柏宇 Tales演唱會 2013》，難得開處男個唱，上週六開記招時， Jason表明今次玩音樂外，仲有新形象。上週三， Jason將一身肌肉加 6嚿腹肌的猛男相掟上微博，大家即刻嘩嘩聲！

「想似家輝咁勁」

初出道嘅 Jason只有一百一十幾磅，超級瘦奀茄。《蘋果日報》圖片

以前瘦蜢蜢，突然變身大隻猛男的 Jason，上週六向本刊透露，原來是受張家輝影響，他說：「其實我以前一直都有做 gym，但只係強身健體嗰隻，不過最近因為見到偶像張家輝咁大隻，自己都好想好似佢咁勁，加上想喺演唱會露吓肌肉型嘅陳柏宇畀觀眾睇，所以就下決心操 fit自己。」

唔好睇 Jason𠵱家咁大隻，以為需要很長時間穀肌，原來他只花了兩星期便操出猛男線條，「由兩星期前開始，我就加碼做 gym，𠵱家一星期操 4至 5日，每次 3至 4個鐘，不過做 gym只令肌肉結實，而操出線條就必要同餐單配合。我先將汽水、奶茶、咖啡戒曬，仲戒埋油，每日只食烚菜，雖然可以食肉，但食前要先起皮，而且煮肉時只可落一茶匙油，呢個健身計劃我實行咗兩星期就見效。」

船 P穀行

平時唱情歌鬼咁柔情嘅陳柏宇，出道以來形象一直斯斯文文，但最近轉型做猛男，經兩星期狂操後，唔只手瓜起𦟌，最煞食係 6嚿朱古力腹肌，加埋背後個紋身，成個 wild曬。

2/10微博曬料

難得練得一身猛男身形， Jason上週三即將穀肌相掟上微博曬成果。

女友包辦冇味餐

陳柏宇今次健身計劃極速見效，除偶像張家輝為最大推動力外，背後最大功勞係拍拖 2年的𡃁模女友 Leanne符曉薇。原來 Jason的冇味餐，全由 Leanne一手包辦：「𠵱家日日食嘅清淡餐單，都係靠女朋友幫我煮，但因佢唔慣食啲咁淡嘅餸菜，所以煮完畀我食之後，佢自己再出街食。」

女友 Leanne靚女又細心，問到 Jason幾時拉埋天窗，佢就避重就輕答：「其實儲緊錢結婚，仲想一結婚就生仔，但我想要買到一間一千萬嘅樓，夠錢養小朋友先結婚，起碼等 5至 6年。」你等得，但唔知已經 27歲嘅 Leanne等唔等得喎！

將於 11月 29日於九展開首個個人騷嘅陳柏宇，上週六就專程開記招穀宣傳，不過記招裏面， Jason就冇剝衫曬猛男身材，但就帶埋女友 Leanne（小圖）到場曬幸福。

30歲嘅 Jason同細佢 3年嘅 Leanne，前年拍《喜愛夜蒲》時雖然冇對手戲，但亦被 Jason𥄫中之後仲拍埋拖，現時更一齊住， Jason仲話儲緊錢同 Leanne結婚。《蘋果日報》圖片

兩年後， Jason𠵱家有份拍《喜愛夜蒲 3》，但今次對手改由 35D是非港姐許奕妮接手，據稱 2人一樣上演激烈床戲。

前年， Jason拍《喜愛夜蒲》時，唔只赤裸上身，仲同 32C對手 Jeana何佩瑜有床戲，超激。

向目標進發

以前跑開步做開 gym嘅陳柏宇，一直都穀唔起肌，但自從見偶像張家輝咁大隻，於是的起心肝以張家輝為目標，不過 Jason就解釋：「張家輝只為拍戲而練到咁大隻，但我最大目的係為健康，唔同㗎！」

無味餐單

《忽然 1周》圖片

．每餐食一碟烚菜

．食肉一定要去皮

．煮肉只可用一茶匙油

．戒汽水、奶茶、咖啡

．每餐少油少鹽

肌界紅人

自從張家輝搞到全城嘩嘩聲之後，一眾男星都的起心肝做「肌」佬，當中以杜汶澤最大分別，網民仲大讚佢𠵱家靚仔過謝霆鋒添！

張繼聰　巨胸

杜汶澤　收腩

關楚耀　筋肉

. 大練鋼　學偶像張家輝　陳柏宇 14日穀 6嚿腹肌
http://hittt.blogspot.com/2013/10/14-6.html. 大練鋼　學偶像張家輝　陳柏宇 14日穀 6嚿腹肌
http://hittt.blogspot.com/2013/10/14-6.html