靠哥哥勁賺 陳淑芬：唔需要同你哋交代！

媽咪姐

靠哥哥勁賺　陳淑芬：唔需要同你哋交代！

呢兩個禮拜，哥哥張國榮好似又返咗嚟我哋身邊，電視報章雜誌都有佢嘅身影歌聲。咁，就十年嘞！媽咪姐同一班「哥迷」一樣，好掛住哥哥。講真吖！睇番今日，又有邊個有佢嗰種不羈嘅氣質、揮灑自如嘅歌藝同演技呢？難怪一連兩日（ 31/3-1/4）由哥哥前經理人陳淑芬喺紅館搞嘅張國榮紀念演唱會同紀念晚會都座無虛席，喺時代廣場嘅哥哥展覽會亦塞滿「哥迷」，出售嘅紀念品火速去貨，媽咪姐都係撲到兩隻杯咋！

不過，一班「哥迷」真金白銀俾錢買飛買精品悼念偶像之餘，都好關心呢啲收益其實去咗邊？事關哥哥生前經常呼籲朋友同歌迷將送俾佢嘅禮物折現，捐去兒童癌病基金同護苗基金呢類慈善機構，大家當然希望今次都能夠以偶像之名行善！而陳淑芬喺今年 2月 22日於各大報章報道中表示，今年會喺紅館搞兩場紀念晚會，喺時代廣場搞展覽兼賣紀念品，並推出 3千個限量版張國榮首辦公仔，佢仲話到明活動同售賣紀念品嘅收入，喺扣除開支後，將全數撥捐慈善用途。

媽咪姐喺周三（ 3日）再問過佢呀，呢位中過 3T同六合彩嘅經理人依家就咁答：「個 event搞得好完美，我無嘢回應。（最近有報道話你無交代活動收入會唔會捐去慈善機構喎？）唔需要同你哋交代！無嘢回應！」陳太，哥哥生前簽咗你做經理人啫，依家佢離開咗都十年嘞！人情還人情，數目始終要分明。相信天上嘅哥哥同「哥迷」一樣，只係希望風繼續吹，將善心延續落去。

拉唐唐上台

周一（ 1日）「新聞人物」陳淑芬拉住唐唐齊齊出席哥哥紀念晚會，仲向現場「哥迷」三鞠躬。見到唐唐呢日精神唔錯，逐步走出傷痛，媽咪姐就最安慰。

傳聞曾不滿陳淑芬唔尊重哥哥嘅梁朝偉，喺老婆劉嘉玲幫口下，周日（ 31日）破例現身紀念演唱會。佢喺台上話想同哥哥講：「不如我哋從頭嚟過！」簡直講中曬大家心聲。

阿仔陳家豪收錢

陳淑芬喺時代廣場為哥哥搞展覽兼賣紀念精品，佢個仔陳家豪連日親自看檔！但「哥迷」買完嘢想攞單，佢就話無，連手寫單都無得俾。

今次陳淑芬推出咗大量哥哥紀念精品，有 figure、 T恤、 Tote Bag、兩款記事簿、紙鶴襟針、畫像同埋高矮兩款咖啡杯，絕大部分火速賣曬，條數真係好襟計！

即使近日陰陰天又經常落雨，但唔少「哥迷」都特登去時代廣場睇展覽買精品，懷緬偶像。

十年前開始，每逢 4月，文華東方酒店外，就係一片花海。今年，更多「哥迷」專誠到嚟懷念偶像，十年未忘。

歌迷會搞 show行善

除咗陳淑芬，張國榮歌迷會 Red Mission亦搞咗一個紀念晚會同展覽，講明扣除開支後嘅門券收益會以哥哥之名捐去兒童癌病基金，仲會喺官網公布捐款數目，好有心。

Red Mission請咗曾為哥哥編舞嘅日本芭蕾舞家西島千博（左）同哥哥好友雷有暉喺晚會上表演。

Red Mission喺奧海城搞哥哥展覽會，展期至周日（ 7日）。喺場內消費滿$1,200可換紀念 USB卡一張，唔使另外俾錢，抵喎！

勁賺千萬計

《繼續寵愛．十年．演唱會》 2場

（第一場有天王巨星獻唱，佢哋每人只收一萬蚊車馬費，第二場就播巨星錄影片段）

約賺$300萬

各地轉播紀念演唱會版權費

（賣俾中國內地、台灣、日本多地電視台同網站轉播）

約賺$1,000萬

售賣紀念精品

（ 12吋人形 figure賣成$1,680，咖啡杯都賣$200）

約賺$600萬

合計約賺： 1,900萬

. 靠哥哥勁賺　陳淑芬：唔需要同你哋交代！
http://hittt.blogspot.com/2013/04/blog-post_8316.html