精靈耆兵 謝雪心 譚炳文 劉松仁

媽咪姐

精靈耆兵

家有一老，如有一寶！依家嘅老人家再唔係由朝坐到晚、日哦夜哦㗎啦。好多都鍾意出去行吓街，仲成日同朋友家人食飯，生活不知幾充實。

謝雪心家庭樂

謝雪心出名保養得宜，但唔講唔知，今年踏入花甲之年，啱啱 60歲。近排佢雖然趕緊拍《巾幗梟雄之諜血長天》，但一唔使拍劇，就陪屋企人。

早前心姐就同老公陳啟亨拍拖行街街。當日佢同老公，先去寵物用品店買嘢，之後約埋乖女伽穎食拉麵，同行仲有伽穎嘅男朋友。佢哋一家四口一邊食一邊閒話家常，不知幾溫馨！媽咪姐仲聽到個男仔叫心姐做「媽咪」㖭。咦，唔通心姐已經升呢做咗外母？咁幾時抱孫？

謝雪心同老公先到寵物用品店 shopping，兩夫婦有商有量，好 sweet。

兩人之後會合女兒伽穎（紅黑衫）及其男友食拉麵。

同樣係藝人嘅伽穎近年都冇乜幕前演出，作為阿媽嘅心姐都會帶阿女出嚟同傳媒見吓面，增加曝光率。

譚炳文機警睇樓

李香琴身體唔多好，暫別幕前喺屋企休養，但佢嘅好拍檔譚炳文就唔同。早幾日媽咪姐喺跑馬地撞見佢，只見佢健步如飛，由街頭行到街尾都冇喘過氣，而且一眼就發現媽咪姐，相當機警。佢後來經過地產舖，仲望咗陣賣樓廣告。以 78歲嚟講，真係好有朝氣。

炳哥不單止身體硬朗，仲好醒目見到媽咪姐。佢之後經過地產舖睇樓盤廣告（小圖），莫非想入市買樓？

劉松仁有女陪試衫

63歲劉松仁一向形象花弗，明明有個空姐老婆，但身邊女伴總係次次唔同。早兩日媽咪姐行 ifc，見到松哥又有新女伴。兩人有講有笑，女友人除咗同松哥揀衫，仲不斷俾意見。咁又係，藝人要時刻 keep住靚仔形象，呢一點，松哥絕對做得足。

63歲嘅劉松仁着起套西裝型到不得了，身邊女友人亦由頭掃落腳，俾咗唔少意見。

松哥試衫，女友人幫忙摺衫、整理行裝，對松哥照顧有加。

松哥冇斬獲，於是跟女友人殺去第二度再睇過，其間仲笑得好開心。喂，小心惹人誤會噃。

. 精靈耆兵 謝雪心 譚炳文 劉松仁
http://hittt.blogspot.com/2013/04/blog-post_9585.html