大封面
駙馬夢碎 陳山聰紋身𦧲超雲
賭王三房大千金何超雲與 36歲藝員仔陳山聰拍拖兩年，屢傳婚訊。上月三太陳婉珍開行綠燈表示山聰「過咗我哋嗰關」，還明言賭王頻頻向超雲催婚。
正當大家以為要改口叫他做何陳山聰時，誰知上周二（ 2日）晚，超雲忽然在社交網站 instagram留言：「 Love=Money」，矛頭直指山聰貪錢。
據知兩人拍拖期間，陳山聰不斷𠱁女方科水搞生意，埋下分手伏線。加上他多次向外放風逼婚，令超雲唞不過氣，一怒之下嗌分手。臨門撻 Q的陳山聰，無計可施下，惟有在 instagram發功，放上寓意「拍拖 28個月」的紋身圖案，跪求女方回心轉意為止。
兩年前，陳山聰為攀附何超雲，拋棄糟糠楊渡萍。當時外間一致不睇好這段戀情，不過陳山聰充耳不聞，還向無綫請假停工，陪女友周遊列國享受上等人生活，度過兩年零四個月甜蜜日子。可是，上周二（ 2日）晚，何超雲單拖出席東華慈善晚會後，於淩晨時分，忽然在 instagram上載一個用髮夾屈出變了形的心形圖案，兼留下一句「 Love=Money」，暗示與山聰「講錢失感情」。
借紋身求復合
超雲率先發難，據知山聰看到留言後，隨即致電對方要求刪除留言，不過超雲一直未有接電話。女友借 instagram鬧爆軟飯王，更拒絕再溝通，陳山聰只好有樣學樣，不足兩小時後，於 instagram放上一張數字「 28」的紋身圖案，還留言「 AFL」（ all for love）向女友發出愛的呼喚。
據其身邊好友透露：「其實超雲嗌分手前，佢同山聰都冷戰咗成個月。山聰一直覺得超雲只係細路女鬧情緒，段感情應該有得掹，所以就諗咗呢條橋。佢哋拍拖到依家 28個月，早幾日佢就自己 design咗 28呢個數字圖案，仲打算紋上身度。佢將圖案放上 instagram，一嚟想睇超雲反應，二嚟亦想超雲勾起番呢 28個月同佢拍拖嘅甜蜜回憶。」
可是，紋身圖案一出，翌日（ 3日），超雲竟放上與愛犬小吉的合照，同時語帶雙關說：「小吉，我們要分開了。」藉此公開表示與陳山聰的感情告一段落。
𢱑水逼婚反目
「雲山戀」由熱戀至分手，歷時兩年多，據知二人熱戀初期，男方經常向超雲大講生意經，還提出合股搞時裝店大計。有指陳亦冧得賭王揼本百萬在東莞開製衣廠，並打算於女友在中環開設的二手時裝店「 Chew Closet」兼賣男裝。
錢財身外物，超雲從沒有埋怨照顧男友的起居飲食，但最令她不開心的是男方經常催婚。「去年歐遊，山聰向超雲求婚成功後，佢即刻同身邊好友吹噓會做何家女婿。其實超雲只係象徵式應承咗，點知山聰好心急，成日問佢幾時註冊，又催佢試婚紗揀酒店，搞到超雲開始懷疑佢嘅企圖。」知情人透露。
投靠好友
二月底超雲的生日宴上，女方煞有介事全程避開陳山聰。冇得坐主家席的陳山聰，全晚表現得悶悶不樂。一周後（ 3月 6日），本刊拍得他與好友郭政鴻到九龍城打邊爐。其間記者見他頭髮蓬鬆，雙目無神滿懷心事，與以往潮人打扮的他，相距甚遠。知情人透露：「山聰得番郭政鴻一個老死，嗰晚佢專登約對方出嚟，話自己近排有啲唔開心，仲話嚟緊會有啲轉變，跟住就開始講自己啲生意經。」當晚二人食飯期間，巧遇無綫高層樂易玲，心情麻麻的陳山聰，只與對方閒聊數句便離開。
雖然與女友感情出現裂痕，但心急入贅何家的陳山聰，三月尾再重提婚事，雖然只是輕輕帶過，但已觸動超雲神經，引爆兩人分手導火線。「上次超雲已經同山聰講，想搞好盤生意先再諗結婚。點知山聰夠膽死再講，佢覺得山聰唔尊重佢，咪決定分手。嗰晚超雲仲叫佢漏夜執行李走，山聰嗰陣先知驚，又𦧲又𠱁，不過超雲聽唔入耳，仲叫工人幫佢搬行李。」知情人士透露。
有傳無工作無收入的陳山聰，無處容身。本刊日前收到消息，原來他現時寄居在郭政鴻的星河明居新竇。「嗰晚山聰俾超雲趕走，佢即刻搵郭政鴻幫手，仲搬咗過去住，因為郭政鴻要上佛山拍劇，老婆又會飛返家鄉探親，咪當有個人幫佢看屋。」
周三（ 10日），記者到佛山訪問郭政鴻，對於陳山聰向他訴苦，他乾笑幾聲才說：「我哋嗰日聚會傾吓偈啫！（我哋知佢去咗你屋企暫住？）佢自己有本事，使乜嚟我度住呀。（佢為咗超雲去紋身喎？）佢冇同我講會紋邊度，不過我知佢本身都有紋身。（點睇佢哋分手？）等佢哋自己講……總之佢哋開心就得！」
三太早知情
事實上，何超雲同陳山聰的感情原來一早存暗湧。拍拖至今，一直有傳三太何婉珍棒打鴛鴦，反對愛女與陳山聰拍拖。二月在東華的春節團拜上，她卻罕有「撐聰」。當被問到與賭王是否接受山聰做女婿，她帶有弦外之音說：「接受，不過過咗我哋嗰關冇用，個女嗰關唔知過咗未。」
知情者透露，「其實三太唔多鍾意個女同圈中人交往，不過佢知超雲好硬頸，點逼佢都唔會分手，咪由得個女囉！咁山聰初時陪住超雲周圍飛，又會買啲小玩意俾佢。三太見佢𠱁得個女開心，都隻眼開隻眼閉，淨係提佢要帶眼識人。年初，山聰係咁催超雲合股搞時裝店，又同佢講話想買架波子方便出入，佢哋仲因為咁喺屋企嘈咗幾次，三太都知道佢哋唔會玩得長。」
周一（ 8日）身為東華三院主席的三太，到東華醫院開會。面對大批傳媒追訪，最初她一度黑面，但當得悉記者是追問超雲和山聰的「分訊」時，三太即心情轉靚，更四萬咁口說：「唔知呀，我真係唔知呀！」洞悉先機的三太，當然笑得開懷。
人財兩失
「雲山戀」拍拖兩年以來愛得癡纏，為了廿四小時隨傳隨到陪超雲吃喝玩樂兼遊埠，陳山聰不惜棄糟糠，又以鮮花攻勢和小禮物𠱁女友，但始終未能成功入贅豪門。
12年 12月再催婚
慶祝拍拖兩周年，陳山聰向超雲送上由紅玫瑰砌成的心心及逾萬元 Chanel手袋，乘機再向女友逼婚。
13年 2月扔出宮
與超雲及三太慶祝完情人節後，同月 27日超雲 24歲生日，包場在銅鑼灣與家人及親友慶祝，但身為男友的陳山聰卻無份坐主家席，地位顯而易見。此後二人再未有一同公開露面。
攝影：攝影組
- 超雲山聰傳分訊 三太風騷嗌唔知
. 駙馬夢碎 陳山聰紋身𦧲超雲
http://hittt.blogspot.com/2013/04/blog-post_648.html
