滾熱辣
湊女起拗撬 張家輝下令關詠荷收山
周六（ 13日）舉行的金像獎頒獎典禮，張家輝隨時憑《大追捕》再度封帝。以往頒獎禮，太太關詠荷定必陪足老公全程，不過今年張家輝就要單拖等賽果，事關太太現時正身在佛山為無綫新劇《情逆三世緣》埋尾。
關詠荷北上開工成個月，湊七歲女兒張童的重任，便由張家輝代勞，可惜張近日又顧住拍戲𢱑銀，搞到要另聘保母照顧愛女。據知二人曾為湊女一事發生拗撬，情緒大起大落的張家輝，更衝動叫太太收山，命令她全面退出娛圈。
張家輝 09年憑《証人》成為七料影帝後，事業順風順水，片酬由 100萬躍升至 300萬一部，並且長拍長有。正財得意，張家輝投資運亦不俗， 07年他以 2,300萬購入貝沙灣中層單位，前年則以約 3,500萬成功放售，獲利 1,200萬。現時他們以 11萬月租跑馬地逸廬。賺到盤滿缽滿，張家輝孭起頭家綽綽有餘。近年他更三番四次對外放風，暗示關詠荷專心湊女做師奶。
兩公婆各自各
佛山外景成導火線
今年 48歲的關詠荷為遷就老公，自 2010年拍罷無綫劇《五味人生》後便停工。奈何關經常劇癮大發，加上近年無綫又正值花旦荒，於是無綫去年底就向她招手，遊說她接拍 30集新劇《情逆三世緣》，與老拍檔歐陽震華鬥戲。關詠荷接拍前，原來發生過一場小風波，知情人士說：「 Esther（關之洋名）嗰陣俾曬劇本家輝睇，拗咗好耐，家輝都唔肯放老婆出去。直至歐陽震華同樂易玲三番四次打俾家輝，又應承每日會好早放荷姐返屋企湊女，家輝先軟化應承。」歐陽震華曾說：「我打俾家輝，叫佢俾老婆出嚟拍戲，同我拍好吖，唔會傳緋聞。」
可惜歐陽震華今年 2月因急性肺炎入院，令《情》劇的佛山外景要延遲至本周才開波，搞到張家輝和關詠荷於分配湊女時間上大失預算。知情人士說：「佢哋一早 plan好曬， Esther拍劇嗰陣，家輝就唔接戲住，等 Esther完咗佛山外景，家輝先開工。依家佢哋齊齊開工，根本冇人湊女。」
情緒爆煲失控
據知曾經患過抑鬱症而引發情緒病的張家輝，得悉愛女乏人照料將近一個月，情緒一度激動起來。他更二話不說命令關詠荷收山，除禁拍電視劇外，就連一些拍廣告的輕鬆工作，也一律唔俾太太接。為令老公怒氣全消，關詠荷無奈作出承諾，拍罷《情》劇後便全面退出娛圈。
辛苦錢
張家輝於娛樂圈已經捱近 30年，近年演技才得到各方肯定，片約一部接一部。不過他部部戲幾乎搵命搏，搵親都係辛苦錢。
今年 7歲的張童，現時就讀黃竹坑德瑞國際學校小二，每年學費高達 14萬。由於張家輝為培養女兒成為資優兒童，除學校課程，還要女兒參與德文、公文數、體操等一系列課外活動。由於張家輝和關詠荷現時各有各忙，故他們以兩萬多月薪另聘保母，負責𥄫實愛女的功課和安排課外活動時間。
張家輝：個女需要阿媽
周一（ 8日），張家輝現身新戲《同謀》首映，對於太太要到佛山拍戲，搞到冇人照顧愛女時，他說：「係請咗個人照顧囡囡，咁我自己都成日唔喺香港啦！（你下令太太收山喎？）最好佢以後唔好再做嘢，因為我需要一個老婆，個女亦好需要一個媽媽。」
另一邊廂，本刊記者於周三（ 10日）亦就此事到佛山問過關詠荷。提到老公下令收山時，她避重就輕說：「我依家咪放緊假囉！拍到廿幾號啫。唔想講啲嘢去規範自己，我從來冇講過自己會退出，不過我一向都專心湊女㗎啦，劇本啱先拍啫！」
老公態度咁強硬，關詠荷惟有配合，做女人為頭家，有時係要犧牲下！
影帝前瞻
今年影帝戰況激烈，皆因五位提名人當中，已有四位屬影帝級人馬，可謂爭崩頭。
攝影：攝影組
. 湊女起拗撬 張家輝下令關詠荷收山
http://hittt.blogspot.com/2013/04/blog-post_9575.html
