假城嫂真搶錢 肥苟肉埋熊黛林

同你吟一吟

假城嫂真搶錢　肥苟肉埋熊黛林

趕苟失敗嘅熊黛林，卸下城嫂光環，誓言會一直戴住尾指分戒，直至搵到真正幸福先會除低。

至於舊愛城城，上個禮拜六（四月二十七日）出席慈善活動，終於唔獨沽一味護苟，肯為熊黛林講番句好聽說話：「希望 Lynn可以搵到一個更適合、更幸福嘅人，我祝福佢。」仲話唔相信前度當年為咗自己同富商悔婚，覺得報導係刻意中傷。

忽然開腔撐舊愛，但當日城城塊面，仲黑過副黑超。至於「假城嫂」苟芸慧得緋聞加持，即使渾身厚肉，照樣隔唔夠兩日就有搵錢 job上門，見報率仲多過舊城嫂。

上個禮拜四（二十五日）苟姑娘穀曬胸孖住古天樂一齊做開幕禮嘉賓，話曬係新聞人物，連見慣世面嘅古天樂，都忍唔住望兩眼苟姑娘。喂喂喂！小心啲台灣陳小姐們扭耳仔呀，望少眼啦！

另一日同身材 fit爆嘅低胸朱璿去灣仔出席活動，苟姑娘居然遲咗四十五分鐘，仲話自己只係第一次遲到，唔係因為做咗「假城嫂」而扮大牌喎！

已經重返工作崗位嘅熊黛林，上個禮拜五（二十六日）由上海工作返港，更透露只要見佢除低尾指隻分戒，大家就知佢終於搵到真愛。《蘋果日報》圖片

飛甩 Lynn，做回單身天王嘅郭富城，陰陰嘴笑話自己而家只會同工作拍拖，慢慢騎牛搵馬。乜唔係搵苟咩！

撰文︰八珍

mailto:nextb@nextmedia.com

. 假城嫂真搶錢　肥苟肉埋熊黛林
http://hot104.blogspot.com/2013/05/blog-post_4340.html. 假城嫂真搶錢　肥苟肉埋熊黛林
http://hittt.blogspot.com/2013/05/blog-post_227.html