八卦嘢(八卦野) [八卦o野][日日818] : 拔尖二代　四太三仔猷君　寇鴻萍細女做牛津人

2013年5月2日星期四

拔尖二代　四太三仔猷君　寇鴻萍細女做牛津人

探熱針

拔尖二代　四太三仔猷君　寇鴻萍細女做牛津人

名人後代，好食懶飛唔少，但出色的一樣有！譚詠麟十七歲兒子譚曉風，於英國考獲 GCSE（英國中學會考）十二 A成績，拔尖報讀頂級學府牛津大學外，暑假過後，賭王何鴻燊四房三子何猷君，亦手揸美國麻省理工及牛津入學券，他更遵從老豆意見，做家族第一個牛津人。此外，跟陳冠希及周傑倫傳過緋聞的寇鴻萍細女唐貝欣，同樣獲牛津錄取碩士課程，玩得又讀得。

英美二揀一

月前長女何超盈迷盪銅鑼灣事件，令四太無曬「飛士」兼煩爆，幸有三子猷君氹番阿媽，向來學業成績超標的他，在英國名校 Winchester College畢業後，先後獲麻省理工、牛津兩大學府取錄。

「猷君讀書向來唔錯，只係有段時間懶散咗，但早排都可以代表學校參加 Mclaurens數學比賽，雖然仲未決定揀麻省理工定牛津，但賭王話家族入面冇人讀過牛津，提議佢揀去英國。」知情者說。

猷君十一歲時，參加「世界數學測試精英邀請賽」獲獎，當日賭王都抽空去恭賀個仔。

歐遊一個月

何猷君心大心細未有最後定案，反而寇鴻萍細女唐貝欣今年在倫敦政經大學畢業後，鐵定到牛津修讀當代中國研究（ Msc Contemporary Chinese Studies）碩士課程。

坐定粒六入牛津做碩士，不過寇鴻萍聲稱女兒年初開始一直留在英國刨書，十分緊張。「 Fiona（唐貝欣）想以一級榮譽畢業，因為一級榮譽係由大學一年級計到四年級，所以佢除咗舊年聖誕節返過嚟，其他假期都留番喺英國讀書。出面嘅人以為佢淨係鍾意玩，其實呢個女好勤力，就算我叫佢出街，都未必睬我。考試之後，我會同佢去歐洲玩一個月，慶祝兼等佢放鬆吓。」寇鴻萍說。

希望以一級榮譽畢業，唐貝欣今年放假冇返香港，在英時更會自己煮飯，爭取時間刨書。

過去幾年暑假，寇鴻萍都會帶放假返香港的唐貝欣出席活動，貪靚的 Fiona更會悉心打扮。

周美鳳大女　吳光正師妹

公關周美鳳長女 Florence在香港漢基國際學校畢業後，考入美國名牌大學哥倫比亞大學，與九龍倉集團主席吳光正是校友，她表示當屆入讀大學，只得四個香港學生被取錄。

「大學第一、二年佢讀 visual art同 fine art，到最後兩年決定讀 art history，美國讀書就有呢方面嘅好處，學生可以慢慢搵方向，舊年暑假，佢去咗蘇富比做工，今年畢業後會去北京讀普通話，一邊做啲關於藝術嘅工作。」周美鳳說。

女兒大學畢業，自言開公關公司，日日辛苦返工的周美鳳終於可放下一個大包袱。

她去年飛美國睇 Florence在學校表演，「估唔到佢跳舞咁勁。」

周美鳳同女兒 Florence，似兩姊妹多過母女。

張堅庭大仔　做李安師弟

《表姐》系列導演張堅庭的十七歲長子張高銘，今年考入專門培育電影人才的美國名校東岸 NYU（紐約大學）攻讀電影系，早前更為母親楊諾思打骰的英皇珠寶小試牛刀，拍了一個微電影廣告。「我啲仔女跟我一樣鍾意睇書，大仔從細就鍾意睇小說，睇好多唔同國家嘅電影，對佢寫作方面好有幫助，敍事能力強，視野亦比較闊。 NYU好難考，但佢好聰明，以一篇講佢同菲傭之間嘅主僕情誼，作為投考論文，因為內容全部係實況點滴，加上呢類關係外國人社會較少見，所以引起校方嘅興趣。我啲小朋友讀國際學校，讀書比較輕鬆，我亦唔要求佢哋學業成績超卓，只要合格，更加唔需要補習穀成績。我認為教養下一代，最好嘅策略係多啲親子時間。」張堅庭說。