杜汶澤發達唔預老婆

媽咪姐

杜汶澤發達唔預老婆

曾幾何時，杜汶澤衰爛賭，俾債主追數追到喺亞視貼大字報；又因得罪好友劉華，遭對方收番層樓，冇得用筍價 3萬租住加多利山。不過，人總有過去，學黎天王話齋：坎坷過後有艇搭！杜汶澤隻艇，原來早就撐咗上岸㖭。

媽咪姐收到風，今年初 40歲嘅阿澤撲槌用重金千四萬，買咗大埔康樂園 1,660呎洋房，似乎呢兩年賺唔少喎！難怪就算喺今屆金像獎頒獎禮失落「最佳男配角」同「最佳男主角」，阿澤都睇得好開，仲話五屆影帝梁朝偉讚佢做戲「開竅」，開心過攞獎咁話。

對於即將進駐千萬豪宅，佢就同媽咪姐講：「未咁快決定搬唔搬入去呀，事關我依家住緊嗰度（元朗翠巒）仲有成年租約，慢慢諗吓先啦！（呢兩年搵得好多啦，第一次買咁貴嘅豪宅？）託賴啦！不過投資嘅嘢一向都係老婆搞，我好少理。（但你層樓同公司都係自己名，冇老婆份噃！）自從我簽咗英皇之後，我嘅財政已經俾曬老婆管，我嘅錢已經係佢嘅錢，名呢家嘢，只係虛名啫。」

咁又唔係咁講呀，人哋 35歲嘅阿田同你捱生捱死，總要有啲揸拿好啲囉！

阿澤近年簽咗英皇電影，經常自導自演，有時仲做埋監製，上年 11月又開咗間「香港電影製作」公司，實行肥水不流別人田，搵埋搵埋，就買到呢間有前後花園嘅康樂園獨立屋，爽呀！

豪買康樂園

阿田無名

根據土地註冊處資料顯示，杜汶澤喺今年 1月 30日，用千四萬買入康樂園一獨立屋。但老婆阿田，係無名嘅！

阿澤兩公婆依家租住元朗嘅翠巒，環境都唔錯。但梗係唔夠住自己嘅豪宅咁疏肝啦！

死佬，你對得我住呀！（設計對白）

阿澤同老友彭浩翔合作嘅《低俗喜劇》叫好叫座，上周六晚（ 13日）

佢孖住老婆阿田去金像獎頒獎禮攞威。之不過，講到層樓，即刻有我無你。現實囉！

. 杜汶澤發達唔預老婆
http://hittt.blogspot.com/2013/04/blog-post_2310.html