大封面
原定十月娶熊黛林 城城為肥苟悔婚
七年「富黛戀」正式玩完。
周二（ 16日）晚上，熊黛林於微博嘆息「祝福自己，重新上路」，並上載一張於尾指戴上戒指的相片，暗示與郭富城分手。
本刊上周得悉郭富城與熊黛林戀情告急，二人瀕臨分手邊緣，導火線是小三苟芸慧（肥苟）。據知郭熊二人原定今年 10月步入教堂結婚，但郭最終敵不過七年之癢，情傾細自己 19年的苟芸慧，狠心向熊黛林攤牌。
天王嫂做唔成，熊黛林終日以淚洗面。上周六（ 13日），本刊拍得她搵密友哭訴近三小時，其間記者上前問她與郭富城的感情狀況時，她哽咽地說：「我哋冇見啦！」
由昔日焚城到今日的棄城，熊黛林得到了知名度，卻失去了七年青春。
熊黛林與郭富城相戀七年，一直男尊女卑，即使多年來未獲男友認定身份，但她毫不介意送上門。而且郭富城着重自我形象，私人生活也被歌手身份規範，因此熊黛林多番被傳媒問及感情生活時，她只能欲言又止，避免牽動男友神經。
擬定外地行禮
熊黛林做背後女人多年，終於換來郭富城的承諾。據知去年底，二人秘密約見相熟玄學家，一向對結婚感到恐懼的郭富城，席間竟然向該玄學家提出與女友夾八字兼擇吉日，令熊黛林喜出望外。
「阿 Lynn（熊之洋名）講親結婚，城城都會好忟憎，話兩個人一齊毋須要一紙婚書去證明，搞到阿 Lynn對結婚一事都心灰意冷。城城今次咁突然，阿 Lynn唔開心就假，仲忍唔住叫阿媽準備定嫁妝。」知情人士說。
據知二人已擇定今年 10月到外地教堂行禮，婚事唔會鋪張，只宴請幾位親友。不過人算不如天算，正當熊黛林疊埋心水做城嫂之際，竟然殺出個程咬金。去年 10月，郭富城與苟芸慧合作拍 MV，二人當場拍出愛火。有份製作該 MV的工作人員向本刊憶述：「苟姑娘嗲功好犀利，佢當時仲借頭借路叫城城教佢演戲，大家合作咗一個鐘就交換電話號碼，仲攬曬腰影合照，有冇下文唔使講到出口啦！」
只於 Whatsapp溝通
以為已經馴服男友的熊黛林，一直被蒙在鼓裏。直至上月初，男友撻着苟芸慧的報道一出，熊黛林隨即醋意大發。據知她原本想直踩郭富城屋企問個明白，但奈何遭對方拒絕。「阿 Lynn雖然手執城城屋企鎖匙，但冇城城准許，佢都唔可以貿貿然摸上去。佢唔想關係破裂，所以只好吞聲忍氣。」整個三月，熊黛林與郭富城連見面機會都冇，大家只限於 Whatsapp溝通，感情急轉直下。
另一邊廂，苟芸慧亦靜靜起革命。據知她一早摸清郭富城大男人脾性，因此她一直對郭富城採取以退為進的態度。苟芸慧密友說：「苟姑娘同城城相處時，只會關心城城嘅工作，其他嘢一律唔過問，佢又冇要求咩名份，令城城覺得呢個女仔好可貴。」
大勢已成，但熊黛林唔想斷纜，上月底更高調現身郭富城演唱會，宣示主權，並且等待時機要男友再確認婚事。不過男人話變就變，苦等了七年的熊黛林，最後得到答案竟然又是一個「拖」字，令她不得不放手。本月初，熊黛林連續幾日於微博呻爆，暗示得不到男友關心，宣告「富黛戀」玩完。
搵密友哭訴
愛情路上遍體鱗傷的熊黛林，分手後一直匿埋嘉亨灣新竇，終日以淚洗面。上周六（ 13日），她終肯踏出家門與密友到蘭桂坊一間上樓餐廳，食飯食足三小時，似向密友訴苦。直至晚上十時，她終於離開餐廳，雖然她戴住黑超，但記者仍隱約留意到她雙眼浮腫。記者上前問她近日有否見郭富城時，她哽咽地說：「我哋……冇見啦。」之後記者再問她現時有冇掛住郭富城時，她立即扁嘴，並急步上車避談，似是有話說不得。事後記者致電其經理人 Kim，她對熊黛林失戀一事欲言又止，只說：「真係唔好意思，唔方便講。」
熊黛林飽受情傷殘爆。相反郭富城卻春風滿面。周一（ 15日），郭富城現身灣仔，出席演唱會慶功宴。他發現記者時，更風騷地向鏡頭揮手，不過當記者問他是否已與熊黛林分手時，他立即黑面，一言不發，更立即戴上黑超，以免眼神洩露玄機。
苟：行得正企得正
「富黛戀」成為歷史，苟芸慧乃導火線。周二（ 16日），她出席活動時便煞有介事，唔敢提郭富城。
記：記者 苟：苟芸慧
記：最近有冇同城城聯絡呢？
苟：我唔講人哋啲嘢喇！一向都冇聯絡㗎啦！
記：咁即係唔係朋友？
苟：（開始尷尬）唔……唔講喇！
記：知唔知佢哋分咗手？
苟：傳聞嚟㗎咋？（帶着微笑）
記：怕唔怕俾人話係小三呀？
苟：做呢行避免唔到緋聞，但我行得正企得正，唔會擔心。
周三（ 17日），苟芸慧出席活動時，再三強調自己並非小三，「我冇做過，俾人咁寫好難受，我唔係大家口中嘅小三。（覺唔覺得佢哋七年情玩完好可惜？）我嚟香港都係三年幾，都唔知發生咩事。（係唔係有人處理得呢件事唔好呀？）我唔知你講乜嘢！（佢哋本來今年 10月結婚喎？）我唔識答。」
咁又係，苟芸慧家陣得蒙城寵，唔單止企得正，
拖足 7年
郭富城與熊黛林拍拖 7年，愈來愈浮面，不過感情唔多穩定，一時傳婚訊，轉頭鬧分手，大上大落，十足坐過山車。可惜拖足七年，二人最後分手收場。
天王嫂唔易做
要做天王背後女人，除了要招數多多，箍得住對方，仲要夠耐性。
為免影響男方事業，分分鐘等到老先入得門。
朱麗倩 死守 24年
85年，劉德華與朱麗倩拍拖，一直保密。至 09年朱父病逝，他被揭秘密赴大馬拜祭外父，才與女方十指緊扣返港。之後劉再被揭 08年結婚的證明文件，他即公開道歉：「讓信任我的家人、朋友、媒體朋友難堪，對不起。」這段維持 24年的關係才正式曝光。
羅美薇 相夫教子
85年，羅美薇拍攝電影《癡心的我》認識張學友，一撻即着，感情保持低調，拍拖 3年宣布分手。至 91年二人復合，自此女方淡出娛樂圈，二人感情轉趨穩定。 96年，羅索性退出娛樂圈，與學友結婚生女。
攝影：攝影組
- 原定 10月娶熊黛林 郭富城為肥苟悔婚
. 原定十月娶熊黛林 城城為肥苟悔婚
http://hittt.blogspot.com/2013/04/blog-post_9975.html
