金像獎大熱贏曬 梁家輝風騷 VS鄭中基硬軚

媽咪姐

金像獎大熱贏曬　梁家輝風騷 VS鄭中基硬軚

上周六（ 13日），媽咪姐好難得坐定定喺電視機前，睇咗幾個鐘，為嘅咪係第 32屆香港電影金像獎頒獎禮囉！當晚頒發 21個獎項，結果由上年港產片票房冠軍《寒戰》成為大贏家，掃走最佳電影、導演、編劇、新演員及男主角等 9個大獎，平咗香港金像獎史上嘅最高紀錄。

喺「家輝之戰」，梁家輝就憑《寒戰》入面嘅型爆阿 Sir角色擊敗勁敵張家輝，成為最佳男主角！估唔到嘅係梁家輝已經第四次攞影帝，但當晚表現依然咁激動，甚至激過以前。喺慶功宴上，佢仲話就算攞咗影帝，再拍港產片都唔會加片酬㖭。贏咗最佳導演嘅梁樂民、陸劍青亦透露好快會原班人馬拍《寒戰 2》！咁媽咪姐想知下集會唔會加郭富城戲份，等佢唔使好似今次咁，只可以戥人開心，成晚扁曬嘴囉。

唔制呀！幾時到我呀！（設計對白）

頒獎禮尾聲，一班演員上曬台。企喺拍檔梁家輝隔籬嘅城城扁曬嘴，唔多高興。

Ronald將自己同梁家輝喺後台嘅靚仔合照擺上微博，仲話家輝係佢心目中「永遠嘅最佳男演員」㖭。

講開又講，另一個媽咪姐好 like嘅演員鄭中基（ Ronald）亦攞咗最佳男配角！仲由前度情人楊千嬅頒獎俾佢，兩個喺台上表現相當客氣，只作遠距離握手，連擁抱都欠奉！咁又係，大家都各有幸福家庭，而且又有老婆餘思敏監場。不過眼見以無賴形象深入民心嘅 Ronald，今次憑《低俗喜劇》暴龍哥一角為自己爭番啖氣，確係浪子回頭金不換！

行紅地氈嗰時， Ronald拖住老婆餘思敏，非常 happy！睇真啲，女方手袋同男方皮鞋係一 set㗎！真寃氣。

鄭中基同楊千嬅一段情糾纏多年，最終各走各路。今次喺台上重遇，千嬅笑得誇， Ronald面容緊，有啲尷尬囉。

其他影片

• 直擊金像獎

. 金像獎大熱贏曬　梁家輝風騷 VS鄭中基硬軚
http://hittt.blogspot.com/2013/04/vs.html