本週一，阿嬌盛裝出席英皇位於灣仔會展舉行的春茗晚宴。
探熱針
買咗先算 貪平百萬 阿嬌買面壁樓
近年留守內地拍劇賺人仔的鍾欣潼，去年中吼準荔枝角樓花盤「一號•西九龍」在政府雙辣招下劈價一成散貨，於是以 979萬買入一座一個低層三房 1158呎單位。
據了解，今年底交樓的新盤，擁有無敵大窗台兼且獨享望番自己層樓的面壁景觀，阿嬌慳百一萬換來無 view樓，得不償失！
換馬買樓花
愛買磚頭的鍾欣潼，○八年豪擲三千萬買入羅便臣道兩個單位，撞啱爆出淫照事件，停工斷糧，阿嬌焗住蝕賣其中一個單位給張學友的經理人陳淑芬。三年無入市，阿嬌早前將一○年買入的馬鞍山銀湖七座高層單位放售，賬面賺一百五十萬，見政府推出雙辣招抑壓樓價，位於荔枝角「四小龍」毗鄰的新盤「一號•西九龍」要劈價一成散貨，雖然無現樓睇，但考慮到一千萬唔使已經買到一千一百五十八呎三房單位，阿嬌決定換馬，撲槌買入樓花。
不過，根據樓盤的圖則顯示，該樓盤單位除了具備特大窗台外，面壁樓格局，部分窗戶景觀仲會望番自己單位，毫無靚景可言。
「呢個盤大部分都係三房以上大單位， target一班同區想換樓業主，不過訂價比起同區四小龍稍貴，所以去得好慢，後來發展商減價散貨，市區新樓唔使一萬蚊呎，個個就一窩蜂去買，所以好多業主都未知層樓無 view㗎！」一名地產經紀透露。
改名求姻緣
孭住唔少樓債又是家中經濟支柱的阿嬌，自從獲內地解禁後，一直無間斷不停拍，感情方面，高調承認與從事娛樂製作的韓籍 K先生（權寧一）拍拖，但男方早有正印，拍拖十個月，去年五月宣布玩完。
甩拖三個月後，原名叫鍾狄珊、兩歲改叫鍾嘉勵，入行後叫鍾欣桐的阿嬌，在微博宣布四度改名叫鍾欣潼，並留言：「你沒有看錯，我是改了名字啦！」經理人霍汶希指，阿嬌想有新改變同新開始，覺得潼字適合自己，希望新名令自己重新出發。
據麥玲玲師傅所指，新名有助強化姻緣，阿嬌於三十五至四十歲會有結婚運。已經三張三的阿嬌擺明恨嫁！
