先歎日本菜
探熱針
過夜斷正 打陳勳奇主意 李思捷先食雨書
現年四十歲的食家李思捷，去年被踢爆跟四十七歲熟女陳雅倫搞上後，兩個月前又被指對合作拍《牛頭唔搭馬嘴》的人妻萬綺雯食指大動，食女貪就手的他，自從正印春卷（王寶寶）忍無可忍提出分手後，更加食得就食。
近日李思捷又出動翻兜陳勳奇女兒雨書（前名陳開心），飲飽食醉後再雙雙返回何文田新居過夜。據了解，一直想向外闖做導演的他，更要求女友老豆出手搭路，搵投資者揼水開戲，又食又拎！
晚飯直落
無女不歡的李思捷，最近翻撻相識多年的雨書（陳勳奇女兒），本刊早前發現二人坐的士到山林道的飯堂「味一番」開餐兩粒鐘後，逢飲必「醉」，由兩名侍應扶住步出門口的李思捷，攬住雨書上的士返何文田新竇。
據知，李思捷近日搬離與母親同住的何文田舊居，改租住同區另一屋苑。一個人住，更加肆無忌憚；當晚雨書跟李思捷返家「消夜」，至深夜仍未離開。
「思捷近排食完飯都唔會再轉場去飲嘢，而家多數係叫朋友返屋企。佢同雨書識咗好多年，之前都會間唔中見面唱Ｋ，思捷次次借啲酒意又攬又錫，近呢個月仲喺朋友面前介紹雨書係女朋友。」李思捷身邊人說。
搭路融資
據了解，眼見女友的老豆陳勳奇在內地人脈廣路數多，加上對方近日以三百萬片酬搵馬國明拍他做監製的電影《緣來是遊戲》，近水樓台的李思捷於是不斷落嘴頭叫女友幫口，希望陳勳奇搭路介紹投資者。
「思捷想開嗰部《老夫子》，講咗幾年都未搵到投資者，佢試過敲英皇門，點知人哋話老闆（楊受成）淨係識王祖藍，搞到佢好冇癮。」
對於李思捷想老豆陳勳奇幫手開戲，雨書在電話中直認。「佢（李思捷）有才華，我爹哋又欣賞有才華嘅人，介紹冇問題。」
問到雨書在李思捷新居過夜，她就即時口窒：「你哋影到咩先？」之後以「有嘢做」為由，匆匆收線。
雜食王
憑《福祿壽》彈起，扮乜似乜的李思捷雖早已有個細自己十七年的女友春卷，但不論 47歲陳雅倫，抑或人妻萬綺雯，求就手乜都啱胃口；結果搞到正印抑鬱主動分手，李思捷樂得繼續雜食。
