探熱針
勁賺 1500萬 周秀娜拋波去滾
2012年10月18日今年在香港近乎冇影的周秀娜，三分二時間北上搵食，一口氣拍了四部國產電影加兩部電視劇，連帶代言廣告商演活動密密執，吸金千五萬人仔。身處崑山孖住視帝鄭嘉穎拍新劇《葉問》的娜姐，收工無娛樂，有錢冇「地」使，於是加入淘寶熱潮，買下兒時最愛玩物滾軸溜冰鞋，夜媽媽到酒店旁球場倒奶試玩，久違了的四吋事業線，終可重見天日！
上網解悶
男友 Avis（陳偉成）人在香港，同鄭嘉穎拍《葉問》的娜姐，睇錢份上留在崑山開工。
「聽公司講，原本今年個 schedule一早已經排滿曬，《葉問》個導演好想我做珍妮個角色，個價都好吸引，所以要唧啲日子出嚟，飛來飛去辛苦啲。」周秀娜說。
開工地方比橫店落後得多，加上通告由朝到晚，演員飯聚聯誼更加無幾何，晚晚收工返酒店對住四面牆，上網成為娜姐唯一娛樂，更迷上淘寶，百多元人仔淘了一對滾軸溜冰鞋，抵！
本月初，劇組轉到上海車墩影城進行拍攝，難得四點收早，娜姐馬上飛車返崑山，上酒店房攞滾軸溜冰鞋到附近的籃球場試玩。
大方任睇
玩前先做拉筋熱身，熱褲加小背心，久違多時的四吋事業線重見天日。已經十多年無玩過，加上上重下輕，為怕跌傷影響拍劇進度，娜姐全程拖實助手「慢溜」，直至攞到平衡，才放手在球場繞圈。
娜姐自得其樂，一班原本在場內打籃球的後生仔睇到金睛火眼，冇有怕的娜姐更主動埋身，問人借波射籃，玩了大半小時，才捨得離開。
無偈傾
據了解，娜姐拍《葉問》六萬人仔一集，三十集加埋一百八十萬袋袋平安。唔似主角鄭嘉穎由朝打到晚，但她亦有苦自知。
「開工第一日已經拍露背 shot，唔辛苦但心理上都幾大壓力，最難受嘅係要落水，浸響個布滿蟲嘅水池六、七個鐘，我呢世人最驚最驚就係蟲，仲要扮無事， keep住做戲，好攞命。」
劇中周秀娜同視帝有感情戲，導演亦臨場加插親熱場面，但戲外兩人幾乎零交流。「鄭生幾乎日日打，有時間都攞嚟抖嚇回氣，頂多都係做對手戲嗰陣教嚇我走位！」
誤中要害
周秀娜留港時間少，男友 Avis冇王管，一而再傳出同模媽 Mia有 road，要趕絕男友身邊爛桃花，娜姐一有時間便撲返香港， mark實 Avis。
星期一（十月十五日），兩人拍拖行銅鑼灣， Avis落車閂車門，不慎被門邊擊中下體，表情痛苦，奇在娜姐居然無呵番男友，全程繑埋雙手「睇戲」。
轉場有錢途
近年，內地商機無限，就連「宅男女神」周秀娜今年亦放棄在香港出寫真，轉戰內地掘金，收入即時三級跳。
