富貴吉祥牙擦騷 陳百祥
忽然1周 第915期
有一種牙擦，叫得天獨厚。
「頭髮染足十幾年，從來無甩過，厚到仲要偷薄?呀！六十歲人無近視又無老花，係塊面脹咗少少，都仲係咁靚仔。我又無細路，肯定唔會有人叫我做阿叔阿伯，咁點解唔可以繼續做o靚仔？」
阿叻在形容自己。他這種態度，上一代形容為牙擦，現代則稱之為囂屎。遇上這類人，通常無事打三槌；但阿叻得天獨厚，四十年來我們樂意聽他自命不凡。為甚麼？因為開心，因為我們不夠膽。
黃飛鴻不能缺少奸人堅，娛樂圈也不可能一面倒只得正氣小生。阿叻從不謙虛，但他的吹噓娛人娛己，無傷大雅。最重要是，他吹得起，你吹咩？
戲拍過了，司儀也做過了，年前他開始與老友環遊世界，發覺機不可失，索性拍成旅遊節目，賣給無綫。一邊吃喝玩樂，一邊有錢收，哪有如此著數的事？
「就係有！所以我存在嘅責任就係回饋社會，將歡樂派俾大家。財爺派六千蚊都俾人鬧，我派歡樂，應該無人鬧喇啩！」
新正頭，當然祝願大家大富大貴，但若然未能富貴，至少也要吉祥；再唔係，開開心心牙牙擦擦都好。
最緊要老友發達
新節目名為《叻哥遊世界》，顧名思義由陳百祥擔大旗，廣邀老友與靚女玩盡五大洲。他的地位，猶如「男一號」。
「真係無心插柳。我全世界 70%地方都去過，只差南美洲。有次食飯同朋友吹水，打算約埋一齊去巴西，其中一個係以前《運財智叻星》監製，佢話不如帶埋部機去拍嘢，就咁開始咗。我喺巴西撩啲十幾歲嘅??仔踢波，我左右腳都得，美斯做到嘅動作我都做到，入咗人哋兩球?呀……」
六張有二的阿叻眼神烱烱，樣子精靈，有時明知他吹水唔抹嘴，但你就是愛看他吹噓。
「自從『登六』（過了六十歲）之後都有啲退休心態，想有人接班，但真係冇噃！ 93年拍《唐伯虎點秋香》，男主角叫周星馳，家陣都滿頭白髮啦！兩年前拍《唐伯虎點秋香 2》我又係做祝枝山，男主角叫黃曉明，佢好似我個仔咁，但望落去唔似噃，我哋又冇代溝。」
阿叻說話猶如機關槍，沒有半點老態，可以廿四小時全天候認叻。又或者這樣說，他性格愛認叻，所以長期保鮮。
「咁我真係叻喎，我唱歌至少好過譚詠麟！」
他說的可是鐵一般事實。六十年代尾他與譚詠麟同為 Loosers樂隊（溫拿前身）成員，兩人一起參加星島業餘歌唱比賽，阿叻得第二，譚詠麟初賽一開口已被人叮走。
「係黎小田 K.O.佢，所以譚詠麟從來冇同黎小田合作過，哈！哈！佢係我好朋友，我知佢淨係識唱歌，而我就乜都識，所以我之後冇再唱，讓俾佢唱囉……真正好朋友係可以踩嘅，敵人先要吹捧，唔捧高佢點跌落嚟？」
成王敗寇，贏了就是贏了，這件韻事阿叻足足說了四十年。他也真的離開了樂隊，跑去做製衣生意。
「羅文夠紅喇啩？喺利舞台唱一場，一張飛先賣廿蚊，幾時得嚟做李嘉誠？呀，嗰個年代李嘉誠仲未發，我應該講霍英東。我想發達，七十年代做生意先會發達，只要把握到機會就起飛，呢個只不過係每個香港人嘅夢。」
他做成衣加工廠，由六部衣車做起，三年後員工已增至三千人，資產近二千萬。七十年代的二千萬，是天文數字。
李純恩與應屆港姐岑杏賢，負責去非洲。
93年的唐伯虎是周星馳（上）， 10年換了黃曉明（下），唯獨阿叻飾演的祝枝山不變。原來，真是無人能及。
與阿倫、狄易達和鍾麗緹到北京滑雪，絕對係寓工作於娛樂。
「譚詠麟仲唱緊千八蚊一場，我買架 280s Benz都七萬七。我走落酒吧同佢講：『仲唱？你睇下我，啲錢使極都使唔切……』 70至 75年我有過一段假光輝，之後咪又係破產。」
生意做過了頭，結果要問老友借三萬元作為清盤費。
「阿倫媽媽同我講：『阿祥，我哋住開廉租屋，好難得儲夠首期買南豐新村，你係還至好呀！』我兩個星期後還曬啦！冇乜打擊，老土講句，失敗乃成功之母，有起有跌先係正常。所以最緊要望身邊朋友發達，千祈唔好望人仆街。」
做石堅
他得到一家中東銀行支持，去了巴林散貨，四年後回來。 79年加入《歡樂今宵》，從新起步，又是一條好漢。
「《歡樂今宵》個個都係勁人，我入到去，茄喱啡都無得做啦！我記得細個時睇黃飛鴻梗有奸人堅，我做石堅咪得囉！那年代興謙虛，我就專做認屎認屁嗰個，返工兩個禮拜已收到觀眾投訴信：『叫條友落番嚟啦，乞人憎！』愈多人鬧，我愈快上位。好吖，最怕冇人識，我覺得平凡都係罪過！」
他性格本身牙擦擦，當時《歡樂今宵》監製吳雨便把它發揚光大。他英文名本叫 Natalis，角色巧合地叫阿叻，沒有更順理成章的事。八十年代他有份演的《花心大少》、《精裝追女仔》和《最佳損友》系列至今回看仍趣味十足，他只能再次說自己幸運。
「鍾楚紅、張曼玉、高麗虹、邱淑貞，全香港最靚嘅女仔都要做我女朋友，個個著泳衣，收咗工都仲要一齊食飯飲酒，你話同 playboy生活有乜分別？所以間唔中都要食件吳君如，咁咪要喊囉！」
勤力+知識=贏錢
拍戲其實是副業，阿叻的正職，從來是賭馬。他不諱言自己爛賭，七十年代未曾贏過， 80年他拜師學藝，決心鑽研。
「帶一百蚊入馬場，如果能夠帶番一百蚊出嚟，已經贏咗 17%，因為馬會會抽稅。我學賭馬只係想打和，因為打和其實已經等如贏。我知道群眾多數錯，只要搵到竅門同群眾對立，就有機會贏。點解世界上有貧富懸殊？就係因為有錢人諗通咗啲嘢。」
中三 T的機會率是四千八百萬分之一，阿叻兩個月中了六次，政經報章都去訪問他。
「每隻馬每跑一步都係 0.66秒，只視乎係 0.661定 0.669， 1200米賽事通常跑 45至 47步，其實全部都係計數。同我一齊賭嗰班醫生律師，係好醒呀，但個個要返工嘛，我日日用十八個鐘做功課，勤力加知識已經贏咗七成，剩低嗰三成，咪係運氣囉！兩個月跑十六場馬，我只贏得六場三 T，少?啦……」
他天生記性好，麻雀啤牌全部記得，已經沒有人跟他玩那些，只好賭馬。別怪他只顧認叻，因為他實在有料到。他有澳洲、新西蘭、美國和澳門的練馬師牌，對馬的認識已不下於獸醫。他每朝五時起牀看晨操，一年 365日風雨不改。
「唔係五點，係四點九！就算三點瞓都係四點九起身，跑馬係嗜好，一定有動力。你哋個個見我贏錢淨係以為我好運，其實因為我投入，世界上邊有不勞而獲嘅事？」
他贏多輸少，身家年年增。不過歷年來全部投資也不是一帆風順， 09年便被內地商人騙了四千萬，個個都說他老貓燒鬚。
「我唔係輸，人哋係個局，我中咗個局。原來國內唔可以多過五十人集資，我唔知。依家做嘅任何投資都係『面嗰浸』，預咗就算蝕曬都唔會影響生活。係蝕咗幾千萬，但唔使破產吖，轉個頭咪問馬會攞番囉。我做人向來好夠膽，當年滙豐 33蚊我成日叫人買，你哋個個驚之嘛！原來鄭海泉先得四十萬股，我一日追到佢喇！」
《精裝追女仔》，永遠的經典。原來女主角之一還有蔣麗萍，即立法會「元秋」蔣麗芸妹妹，噢，真是天淵之別。
95年遊戲節目《運財智叻星》平均收視 37點，最高 43點，紀錄至今無人能破。阿叻更憑〈我至叻〉一歌於紅館連開七場演唱會，風頭一時無兩。圖片
做了十幾年港姐司儀，阿叻又要認叻：「因為我真係做得好！」《蘋果日報》圖片
阿叻拉頭馬，易過食生菜。《蘋果日報》圖片
仙女下凡
阿叻身家的實際數字，他說不太清楚，因為全在老婆黃杏秀那裏。兩人識於微時，他當年破產流落中東時，正值黃杏秀大紅，她對他不離不棄。阿叻從中東回來，兩人立刻結婚。他說她是仙女，下凡來照顧他。
「佢有眼光呀，知道我係筍嘢，梗係等啦！我所有錢都喺佢度，我只係賺錢機器。」
筍盤當然避不開緋聞，當年就傳過鍾麗緹與張慧儀。
「我老婆一啲都唔嬲，佢開心o架，老公有人鍾意喎，冇咪好冇面？傳啫，同我合作過嘅女仔都嚟過我屋企食飯，佢都識。」
呢句太官腔，我唔信。
與張慧儀的緋聞當年鬧哄哄，女方後來搭上拉丁舞王，之後移居北京，這才告一段落。
Star East集資上市，股價最低七毫，最高三蚊。姑勿論後期成績，眾位創辦股東早已賺凸。圖片
「其實人生所有事都係有數得計，我計數咁叻，梗係計過，知道唔值，所以唔會犯錯。」
呢句啱聽啲，無理由為了野花放棄仙女。兩人結婚三十四年，阿叻緋聞孰真孰假都好，秀姑多年來夫唱婦隨，恩愛三十年如一日。
「兩公婆有共同嗜好好重要，以前佢唔賭馬，依家刨馬耐過我！我哋又鍾意打 golf同旅行，去邊都一齊。佢係我『梳化服』（梳頭、化妝和服裝），唔收我錢，但擸曬我所有嘢，哈！哈！」
阿叻的笑聲很多，說話從來無包袱，嘻嘻哈哈又過一天。
「我其實講嘢唔經大腦，所以好易得罪人。但又有乜所謂呢？我乜都唔求，只求開心，當然也有唔開心嘅時候，但唔需要同人講，人哋冇責任分擔你嘅憂愁。我偶像唔係咩嶽飛、關雲長，係『食客三千』嘅孟嘗君！酒肉朋友一定要有，最緊要大家開心。我覺得上天派我落嚟係派歡樂俾大家。」
至叻
這天，「仙女」黃杏秀也來了，她為阿叻化妝、整頭，還替他準備好服裝。她不願上鏡，但傾談幾句倒是十分樂意的。
「夫妻相處之道，忍佢囉！大家唔同環境長大，習慣一定唔同，如果有拗撬，一定要忍咗先，第二日落咗啖氣之後先再慢慢傾。兩公婆有共同興趣真係好緊要，如果我唔識賭馬，會同佢少咗好多話題同見面嘅機會。我見過有啲太太陪老公入馬場，但入到去織冷衫，咁就唔好啦。佢啲緋聞，基本上我唔信，因為佢去拍嘢我都同佢一齊，啲女仔我都識，靚女當然係人都鍾意睇嘅。作為老公，我俾佢 90分，佢好錫我，只係有時粗心大意，重要日子唔記得囉……」
秀姑聲線溫柔，一面說，眼睛未離開過丈夫。娶得嬌妻如此，這才至叻。
79年兩人擺酒結婚，照片近年才曝光。
三十多年後，兩人依舊恩愛。《蘋果日報》圖片
撰文：林蕾
攝影：袁家樂
協力：李梓軒
錄像：湯文峯
.富貴吉祥牙擦騷 陳百祥
http://veryy8.blogspot.com/2013/02/blog-post_5649.html
