搜尋此網誌

2013年1月26日星期六

陳國邦遊戲人間

陳國邦遊戲人間


陳國邦遊戲人間

陳國邦,曾幾何時只是別人眼中好戲連場的綠葉。他兜踎過,寄居麵包店與鼠同眠;他辛苦過,讀書時狂打四份工賺學費。這個殘忍的社會大學,磨練出今天懂吃虧的陳國邦,有時先苦後甜更令人懂得珍惜,最起碼有人記得他維肖維妙地演繹過一個太監,做演員的滿足感莫過於此。

娛樂圈的競爭恍如一場龜兔賽跑,跑得快不代表成功,反而默默耕耘可能後來居上。陳國邦自1989年入行至今,一直低調地安守本分,終在去年憑劇集《大太監》中的彭三順一角備受認同,還被網友密密開Post盛讚,縱然失落最佳男配角獎,但得到觀眾的垂青足以勝過一切。

與鼠同眠賺學費

陳國邦是位農夫,對於事業苦心經營,用心灌溉,從來也只懂付出,不懂埋怨,他這種能屈能伸的性格早在讀書時期已訓練出來。其實他考上演藝學院後,礙於家庭環境欠佳,惟有狂打四份散工幫補。英雄莫問出處,即使做別人認為低下的工作,他也沒所謂:「淩晨4點起身整蛋撻,跟住返學,然後再去Canteen洗碗,夜晚就做藝術中心帶位,每星期兩日喺超級市場落貨。試過喺麵包舖同啲老鼠一齊瞓,因為當時住屯門,為咗慳時間返學,所以喺麵包舖瞓埋。當時仲後生,捱唔死嘅!」

當年最窮時,陳國邦試過揸住二十蚊捱一個星期,他現時說起來卻不以為然:「我唔覺得有咩辛酸,做帶位可以免費睇戲、喺Canteen洗碗又可以喺廚房自出自入,鍾意食乜都得,完全唔辛苦!最重要係可以供自己讀書,絕對係一件開心事!」

粗口問候見真情

一樣米養百樣人,打工期間見盡社會各階層的嘴臉,反令人生更有深刻的了解及體會,即使說話中夾雜粗言穢語,也讓陳國邦感受到箇中的那份情:「我去做帶位會接觸好多彬彬有禮嘅人,喺超市又見到著波鞋唔著襪、紋曬身句句有粗口嘅人。我記得有次去超市落貨,阿頭派我搬米,當時我好瘦,有個大隻佬立即爆粗:『X你老母!派個仔去搬米,你去執零食,呢啲等我嚟!』雖然每句都係粗口,不過佢對我嘅關懷同當我做帶位時,有位紳士同我講聲唔該,個感情係一致!」

陳國邦經歷了鐵人歲月後,面對成敗得失也理應遊刃有餘,不過人畢竟是人,有七情六欲,看到自己久久未有出頭天,難免會心灰意冷:「曾經我有諗過放棄,大概六、七年前,我同鍾景輝先生(King Sir)喺化妝間講:『我唔想再做戲,都冇職升!』」當時,陳國邦恍如走到人生中的十字路口,進退兩難,就在這個低潮時期,智者King Sir為他送上一碗心靈雞湯,令他重拾理想:「King Sir同我講咗好多做人、做戲嘅體會,佢提醒咗我點解當年考演藝學院,點解當初咁鍾意做戲,當我面對呢啲問題嘅時候,就明白自己做戲唔係為攞獎!」

柔情化解臭脾氣

理想找到,而愛人亦同樣找到了!眾裏尋她千百度,回想最初,陳國邦就是因為羅敏莊(MiMi)的一句:「我鍾意咗你,我係嚟照顧你!」而深受感動,繼而拍拖、結婚生女。你可說他不解溫柔,至今從未送花給妻子,不過細水長流的感情,也許才恒久。

陳國邦直言以前脾氣臭,一觸即發繼而不可收拾,但MiMi總是溫柔地對他說:「BB,下次你發脾氣畀個Signal我,等我有個心理準備先得o架,係咪?」這句簡單的「係咪?」,國邦BB自此有「氣」不輕彈,收服一個鐵漢原來如此簡單!

這兩口子的愛從來不流於表面,陳國邦的滿腔柔情在與MiMi相處時充分展現:「我哋比較著重相處,成日一齊食飯同錫錫,好多人覺得我哋好Sweet,成日黐埋一齊!最近有報道話MiMi做過我小三,當時我只係有女友,不過佢都有男友,大家面臨同另一半分手,唔通每一次完結感情都交接得咁靚咩?反而MiMi好樂觀,話佢係我阿四先啱喎!」

後記:背後賢妻

訪問當天,陳國邦呷啖茶,吃吃麵,慢條斯理的說,在旁的MiMi縱使聽過那些年的往事千百遍,仍然一臉滿足地細聽。當老公稍息吃麵時,MiMi忙不迭補充:「我一早就知佢非池中物,哈哈!」回到未嫁時,她說當年初遇他,就是默坐一旁看他做戲,驚覺這個他如此出色,暗暗歡喜。吃過一兩次飯後,MiMi毅然提出同居要求,為的是想多見他一面:「係我逼佢,一來我好鍾意佢,二來係因為我咁做可以減低佢好多唔方便,休息多啲,幫到佢做戲更好!」不禁讓人想起老掉牙的一句:「成功男人背後,總會有位默默支持的女人。」

雖非當紅小生,但演乜似乜的陳國邦,早已是劇迷心中的最佳綠葉。

陳國邦遊戲人間

陳國邦演活太監彭三順由奸變忠的小人物心態,孭陳茵媺一幕更令人印象深刻。

陳國邦遊戲人間

MiMi為陳國邦誕下囡囡陳禛,攜手踏向人生新階段。

陳國邦遊戲人間

得King Sir提點後,陳國邦醒覺演戲非為攞獎,最佳男配角獎不敵古明華仍泰然自若。

陳國邦遊戲人間

古明華(右)

陳國邦遊戲人間

陳國邦遊戲人間

梁烈唯奉茶拜師

陳國邦的粉絲不獨羅敏莊,還有梁烈唯!唯唯形容陳國邦為良師益友,皆因對方不時施教袋錢落佢袋:「我成日都請教佢,佢亦毫不吝嗇去教!我知佢鍾意飲凍奶茶,有時經過Canteen都會買番杯請佢飲,自己袋人咁多嘢,都要請人飲嚇嘢!」談到陳國邦的演技,唯唯坦言自愧不如:「睇完佢拍劇集《絕代商驕》,我覺得佢好勁!佢平時好內向,成日都坐埋一邊睇書,不過佢喺套劇要做一個極活躍、極擦鞋、極滑頭嘅人,同佢性格相反,呢啲咪係演員囉!睇到佢演完之後,我覺得自己要收皮!」

梁烈唯奉茶拜師

唯唯對國邦的演技甘拜下風,坦言自己要收皮!



.陳國邦遊戲人間
http://veryy8.blogspot.com/2013/01/blog-post_26.html
Related Posts Plugin for WordPress, Blogger...