搜尋此網誌

2013年3月8日星期五

《神槍狙擊2013》周海媚藐爆新丁楊愛瑾




《神槍狙擊2013》周海媚藐爆新丁楊愛瑾

不忿新劇做「阿二」 落閘開工搵人發洩 周海媚藐爆 新丁Miki

有內地劇後之稱的周海媚(海味)有情有義,被無綫急召回巢打仗的她自動減價接拍新劇《神槍狙擊2013》,誰知埋位無耐即傳被「後輩」徐子珊使橫手搶戲份,失驚無神被燉做「阿二」的海味上星期在深水埗拍外景時,竟直接把怒火全卸落電視新丁Miki身上,見簡單撚貓戲拍足兩粒鐘即火滾藐爆,反觀早已被貓咪玩謝的Miki淋到濕曬兼踎到腳痺都唔敢出聲,硬食。

採訪:彭燕燕、畢紹基

講足成年的電視大戰即將開波,無綫發茅急call離巢多年的小生花旦回歸打仗,早已轉戰內地賺人仔的周海媚(海味)亦一call即到,孖老戲骨張兆輝合演《神槍狙擊2013》鬥戲,還自爆這次回巢打仗不惜退掉數部內地劇,損失逾百萬元人仔收入,又豪花兩萬在將軍澳月租酒店式住宅,方便開工,聽落真係好有誠意。

唔夠徐子珊鬥

之但係世事好難講,你對人好時,人家未必對你好,海味誓估不到無綫為捧徐子珊,大幅削減其戲份,慘被燉做「阿二」的海味嬲到震,「唔嬲就假,都埋曬位,唔通依家先話唔玩咩,你估玩呀?」知情者透露,報道出街後,海味每見記者都落閘唔識笑,咁又係,就算真係被人燉都等劇集出街先爆嘛。

Miki慘變出氣袋

上星期,46歲童顏海味孖輝哥陪劇中細妹、28歲的楊愛瑾(Miki)到深水埗公園拍外景,飾演「貓癡」的Miki見貓瘋狂,追住街貓餵食,好衰唔衰,整天下著毛毛雨,貓咪耍脾氣唔合作,一個簡單餵食鏡頭拍足兩粒鐘,坐埋邊等的海味睇到火滾,中段休息見Miki埋身閒聊即彈起身走開,仲傾偈?快手快腳拍完收工好過啦。

無端端變做出氣袋的Miki驚驚青青繼續埋位,踎到腳痺都唔敢出聲,有苦自己知,15分鐘後折返的海味見有記者在場,即吩咐男助手阻擋鏡頭並說:「唔好意思,海味唔想上鏡,影夠好收機。」其實唔想上鏡為何會拍劇?真係要問問海味先知。



Miki拍一場餵貓戲拍足兩粒鐘,坐埋邊等的海味睇到火滾。



貓貓唔聽話掛住打交,Miki一臉無奈,在旁等候的海味唔耐煩,黑面走到導演前施壓。



海味發現有記者在場,即時叫男助手阻鏡。

小芙蓉好得

40有6的周海媚保養得宜,當年在《大鬧廣昌隆》演小芙蓉成功坐正做花旦,09年回巢拍《蔡鍔與小鳳仙》也大收旺場,早已轉戰內地掘金的海味在內地拍劇例收14萬人仔一集,今次割價至5萬元一集接《神》劇,埋單只收125萬港幣,明益無綫。



.《神槍狙擊2013》周海媚藐爆新丁楊愛瑾
http://veryy8.blogspot.com/2013/03/2013.html
Related Posts Plugin for WordPress, Blogger...