搜尋此網誌

2013年5月31日星期五

嬲爆李思捷扮大牌 阮兆祥單飛開個唱




娛聞樂

嬲爆李思捷扮大牌 阮兆祥單飛開個唱

阮兆祥、王祖藍及李思捷自 08年合組「福祿壽」以來,深受歡迎,三人開完演唱會又拍電影,登台及廣告陸續有來,搵到盤滿缽滿。最近三人更一起拍惠康廣告,拍攝短短兩天已五百萬袋袋平安。不過,據知拍此廣告時,由於李思捷企硬拒扮女人,險些令廣告胎死腹中,令王祖藍及阮兆祥對李思捷終極反面。

祥仔(阮兆祥)更私下與祖藍協議,以後「福祿壽」只會登台及拍廣告搵快錢,其餘合作唔再預李思捷。而計劃在年尾開個唱的阮兆祥,聲言冇預李思捷,擺明唔妥李思捷。

黎耀祥主演的廣告,成功幫百佳吸水。惠康亦唔執輸,於是急急找福祿壽拍新一輯廣告。

李思捷一向自視甚高,近日他的《玩嘢王》收視不俗(平均 23點),更加令他氣燄逼人。據幕後人員爆料,他經常導演上身,向其他工作人員指手畫腳,甚有一哥風範!其實去年初「福祿壽」開演唱會時,已傳出阮兆祥及王祖藍與他不和。當時李思捷亦直認,但避重就輕︰「中間係有拗撬,但對事不對人。」

拒扮女人險失廣告

不過近日這三兄弟,再因為一個惠康廣告反面。據知惠康出手闊綽,給「福祿壽」五百萬簽半年合約,每人分到約 170萬(未計抽傭)。不過因為李思捷忽然拒扮女人,一度令廣告合約凍過水。「惠康見百佳搵咗黎耀祥拍廣告反應好,於是想趕製新廣告,搵嚟『福祿壽』扮女人搞笑。點知思捷企硬唔肯扮女人,搞到祥仔同祖藍差啲見財化水。最終惠康讓步,改咗條橋至傾得成。呢件事令祥仔同祖藍勁㷫!」知情者說。

一向以來,「福祿壽」以扮嘢搞笑作招徠,既然李思捷唔「給力」,剩低兩個吸金力自然大減。「祥仔同祖藍不滿思捷要求多多,麻煩難服侍,之前開個唱已拗撬不少,所以今年年尾開演唱會,祥仔同祖藍諗住拍住上,索性飛起思捷。不過因為祖藍係無綫藝員約,抽傭太多,自由身嘅祥仔計過數,最終決定單飛開騷,唱歌之餘再加棟篤笑,吸納埋『福祿壽』班 fans。」

扮黑玫瑰

在最新的惠康廣告中,王祖藍及阮兆祥都要扮女人,要扮黑玫瑰及筷子姊妹花造型,相反李思捷就得到優待,全部可以男裝出場。

扮姊妹花

祥仔寸爆唔合作

以前肯扮

去年初在《福祿壽演唱會》上,李思捷都有扮女人,但近日他認為自己升呢,再冇呢支歌仔唱。

本刊詢問拍緊古裝劇《食為奴》的王祖藍,他直認思捷拒扮女人︰「拍廣告時思捷話要留鬚,唔想扮女人。佢不嬲都係咁,咪我同祥仔扮囉!我哋扮靚過佢,無謂要啲觀眾睇佢扮睇到嘔啦!(三人係咪難再合作?)星期六( 1日)會喺肥姐紀念演唱會合作囉,之後祥仔有大 project,我自己又拍電影,思捷又要拍劇。(佢未有劇拍喎!)總之各有各忙啦。」

至於面面俱圓的阮兆祥,雖然冇數李思捷,但就直認「福祿壽」分開發展,合作無期。

祥仔:各自有自己發展

記:係咪三人好難再一齊工作?

阮:我哋各自有自己嘅 project做。

記:你年尾開演唱會?

阮:係呀!其實本身想開棟篤笑,後來變咗演唱會,而且出年係我入行 30周年,想為自己搞番啲嘢。

記:會唔會有一 part「福祿壽」?

阮:個唱冇預佢哋,我希望「福祿壽」係香港嘅 Smap,各自有自己嘅發展。

記:拍惠康廣告思捷唔肯扮女人?

阮:唔知喎!總之係客戶要求,我都配合。

至於李思捷,截稿前他仍未回覆本刊提問。

去年拍住胡杏兒主演《換樂無窮》,令李思捷自感升上男一;《玩嘢王》(右)又大熱,李思捷更加自我膨脹,唔肯再扮女人。

寸嘴不饒人

李思捷入行 14年,直至《福祿壽》系列及《玩嘢王》才彈起。在事業半紅不黑的日子,他的負面新聞仍源源不絕。雖然在 09年與「春卷」王寶寶拍拖,但李思捷先後被發現密會李思蓓及𡃁模 Naomi,近日更被發現帶陳雅倫連蒲兩晚及周街親熱,事後又死口唔認。回應時,李思捷曾多次發揮寸嘴本色。

抽水冇悔意

去年爆出他曾在夜店向岑潔儀抽水,他回應事件時,指自己斷片唔記得,又推說:「如果當時有,對方應即時鬧我。」試圖推卸責任,毫無悔意。

咒杏兒窒林峯

思捷去年宣傳《換樂無窮》時(圖),被問及何時娶「春卷」,他說:「杏兒同 Bosco(黃宗澤)分手嗰時!」對去年被指〈年少無知〉是《福祿壽探案》主題曲〈超低能〉的爭獎對手時,思捷暗窒林峯:「如果係夾硬贏獎,我寧願唔要!」



. 嬲爆李思捷扮大牌 阮兆祥單飛開個唱
http://hot104.blogspot.com/2013/05/blog-post_6253.html
. 嬲爆李思捷扮大牌 阮兆祥單飛開個唱
http://hittt.blogspot.com/2013/05/blog-post_3296.html
Related Posts Plugin for WordPress, Blogger...