搜尋此網誌

2013年5月1日星期三

歪尾龍骨 關節凸 阿 Sa:驚冇仔生




封面

歪尾龍骨 關節凸 阿 Sa:驚冇仔生

強國時興明星真人騷,鬥唱歌鬥跳舞已經唔夠喉,最新趨勢係鬥過界玩體操練跳水搵命搏。繼童星出身釋小龍 18歲助手溺斃、杜汶澤從平衡木上險跌斷腳後,今次輪到阿 Sa出事,有指阿 Sa練水跳歪尾龍骨,被迫退賽更後患無窮,有機會影響日後生育。

據知阿 Sa曾私下透露擔憂,驚傷患搞到「第時生唔到仔」,但好在經理人 Mani急尋國內骨科博士調理兼及時發現,現負傷的阿 Sa仍堅持比賽,呢啲咪叫體育精神囉!

黄聖依爆退出

合作完成雙人跳水的隊友黃聖依,突然衰多口宣布自己同阿 Sa齊齊因傷退出,原來事先未得阿 Sa同意。

比賽時兩人握手互相鼓勵,對於黄聖依於台上代阿 Sa宣布出賽,週一( 29日),黄聖依則透過內地公司負責人回覆:「實在沒必要為公益製造話題,大家看節目自然知道真假,所以我們不想回應。」

結束四年婚姻,阿 Sa半年後火速戀上同門師弟陳偉霆,拍拖至今兩年半。如今前夫獨女 Emma(鄭中基和餘思敏女兒)都就快兩歲,經常自爆恨做媽咪嘅 30歲阿 Sa依然未圓媽咪夢,卻突然傳出尾龍骨有舊患和因練水致關節凸出,對阿 Sa來說,絕對是晴天霹靂。

零細胞照跳

被黃聖依宣布退出比賽,阿 Sa都嚇一驚,在微博上表示驚多過喜。

前世界冠軍田亮為《中國星跳躍》擔任教練,對阿 Sa評語係「零運動細胞」,不過咁都帶傷堅持到底,阿 Sa好嘢!

忍痛 OK

阿 Sa忍痛作出「 OK」手勢示意無礙,其實傷及尾龍骨舊患。

痛到瞓低

第二集比賽,阿 Sa完成屈膝翻騰半周跳水動作後,腰部劇痛,即時要躺下檢查。

堅持到底

浙江衞視跳水節目《中國星跳躍》月初(4月 6日)首播,意外連連,繼練水時釋小龍助手彭佳璿溺斃後,第二集(13日)香港代表阿 Sa完成動作後傷及腰部,搞到要被擔架抬離現場。

治理休息一星期後,阿 Sa帶上腰封負傷上陣完成第三集賽事錄影,同場同樣帶傷選手黃聖依突然搶咪發言:「我的腰傷了,我要退選!其實阿 Sa都傷了,我們一齊退選!」失驚無神「被退選」,阿 Sa即時面露難色,不識回應。不過事後本刊向經理人 Mani求證,傷重退選實屬虛驚一場,阿 Sa將會繼續出賽。

出道 12年,阿 Sa因為表演跳舞及拍戲動作場面早已傷及腰骨,不過工作密麻麻、傷患又不至於影響生活,阿 Sa一直不理。

直至第二集《中國星跳躍》傷及舊患,才被經理人 Mani親自帶去國家級運動員禦用脊醫陳方燦求醫,一見之下才知尾龍骨變歪、第四及第五關節異常凸起,問題嚴重。

「阿 Sa睇完醫生,都有擔心話最驚第時冇得生!」知情人士透露。好在及時就醫,一直工作繁重的阿 Sa又碰巧要滯留北京拍戲, Mani索性安排阿 Sa醫治再配合物理治療復原,據悉一個月後會康復八成,應不會影響生育。

Sa:陀仔會辛苦啲

知道舊患有得醫、又近水樓台可以定時會見名醫後,阿 Sa決定繼續比賽,支持到底。

消息一出, fans擔心偶像健康大力反對,網民就諸多揣測話阿 Sa為二百萬人仔跳水費搵命搏。但阿 Sa一早澄清跳水為慈善,一毫子都唔會袋落袋。本刊亦發現,紅足 12年的阿 Sa密密賺, Sa媽就有密友 Keith Tsang做軍師密密炒,過往物業賺過 700萬後,去年再以 2,350萬入市購入跑馬地豪宅玫林別墅,計埋舊居慧莉苑同元朗華翠豪園,阿 Sa同阿媽名下淨係物業市值超過 6,000萬,絕對是圈中富婆。

週一( 29日)本刊致電阿 Sa,她就好淡定:「冇擔心生唔到啦𠵱家!其實係因為我尾龍骨歪咗,醫生係話過將來『陀仔會辛苦啲』啫!同埋呢樣嘢(尾龍骨)係有少少遺傳,因為我媽咪陀我嗰陣佢條尾龍骨都係唔正……我𠵱家冇乜大礙,因為我有好好嘅治療師博士同我做物理治療,我 5月會成個月留在北京,拍戲同做物理治療! William都有擔心嘅,不過佢喺橫店拍緊戲, OK啦!唔使擔心!」

搏命跳水卻心為慈善, Twins善心有目共睹,週日( 28日)便獲頒中國慈善明星年度大獎,同場楊受成兒子楊政龍,亦有份代已連續第五年得獎的父領獎。《蘋果日報》圖片

《蘋果日報》圖片

骨科醫生:有機會完全康復

本港著名骨科醫生呂明欣週一接受訪問:「其實四、五節損傷好少影響生育,但係唔正視問題,都會引致腰椎不穩嚴重移位,甚至壓到神經線會導致坐骨神經痛。及早醫治同做物理治療,唔只復原八成,有機會完全康復!」

國家級治療師急救

為阿 Sa醫骨的陳方燦博士大有來頭,本是水球運動員出身,退役後擔任過教練、體育科研人員及隨隊醫務人員, 80年代赴美深造,是運動醫學博士、康復研究博士、美國及本港註冊物理治療師,又曾擔任美國紐約大學及香港理工大學副教授。陳博士多年來為國家級運動員負責體能康復顧問,連國家隊遊水名將孫揚等都搵陳博士幫手,阿 Sa未來在北京拍戲順道留醫,難怪有信心一個月後康復八成。

陳方燦博士

跳水加拍戲,阿 Sa將會滯留北京個多月,剛好向名醫求助徹底醫治舊患。

未來一月為阿 Sa療傷的陳方燦博士大有來頭,其工作網頁就有不少為國家級運動員醫治圖片,包括遊泳冠軍孫揚。

William繼續搵錢

阿 Sa跳水傷及舊患、近日又話發緊燒,身體抱恙頂硬上,男朋友陳偉霆就人在橫店趕拍內地劇《少年四大名捕》,只可以電話忍問叫女友萬事小心。

女朋友出道 12年,手揸 6,000多萬物業,不過入行 10年嘅男朋友仔就仲未係業主,仲等緊機會入市。記者早前在橫店片場所見, William每日朝六晚九拍足 15粒鐘,早午捱劇組飯盒,晚餐就食廿蚊雞港式茶餐廳碟頭飯,辛勤得嚟好慳家。其實 William都係得 27歲仔,如今密密搵,好快做到業主嘅!

William長駐橫店三個月拍攝電視劇,密密做望早日圓業主夢。

10年 10月相戀至今,阿 Sa同 William的姊弟戀已經維持兩年半,一樣愛得甜蜜。

30歲小富婆

阿 Sa接 Job接到手軟,冇心神亦冇經驗處理財政,多年收入就交畀 Sa媽投資處理。而 Sa媽買樓獨具慧眼,亦多得親密男友 Keith Tsang做軍師,陪睇樓陪交收再提出寶貴意見,多年來只賺不蝕,未計過往放售盈利,只計現時手揸物業,市值已經過 6,000萬,就快突破一億大關!

阿 Sa全數收入交給 Sa媽打理, Sa媽亦獨具慧眼有賺冇蝕,現時更同阿 Sa揸住過半億物業。

Sa媽與男友 Keith拍拖多年,女兒忙工作,平時睇樓、買樓處理財產,多數由 Keith陪伴左右。圖片

採訪、撰文:娛樂組

攝影:攝影組


. 歪尾龍骨 關節凸 阿 Sa:驚冇仔生
http://hot104.blogspot.com/2013/05/sa.html
. 歪尾龍骨 關節凸 阿 Sa:驚冇仔生
http://hittt.blogspot.com/2013/05/sa.html
Related Posts Plugin for WordPress, Blogger...