高海寧憎人曬命 求愛不求財
沈卓盈（Jess）與高海寧（高Ling）老友鬼鬼，全因在無綫屬同一位經理人之外，還有大家都愛Shopping，友誼的展開，亦是從Shopping開始。談到有些人會覺得女星愛釣金龜，Jess與高Ling更口徑一致，覺得錢夠使就可以，要錢而出賣愛情，No Way！
沈：沈卓盈 高：高海寧 記：記者
一齊傻同癲……
沈：我覺得高Ling係一個好可愛、好Sweet嘅女仔，好鍾意見到你笑o架，你嘅開心係可以感染到其他人，好記得有一次，差唔多係聖誕節嘅時候，我話想去買鞋，你就即刻介紹地方畀我，我唔識去，你仲特登揸車陪我去掃貨，當時真係好感動同開心o架！
高：哈哈！我都記得，當日嘅結果係我買到，你買唔到嘛！嗰次之後，我哋多咗傾偈，大家更互相了解，我覺得我哋好相似，都係好直、好爽嘅人，好夾。我好驚嗰啲好有心計嘅女仔，所以同你一齊，可以一齊傻一齊癲，好開心。
沈：冇錯，同你一齊，可以放低防線，講自己想講嘅嘢！
高：再加上我哋喺TVB跟同一個經理人，所以見面時間會比較多，我有時將唔開心嘅嘢同你講，你好能夠安慰到我，你會毫不吝嗇咁將你嘅經驗話畀我知，有時我唔識處理事情想搵人分享，你又會好主動咁關心我，喺呢行真係好少見，我會好好珍惜。
高海寧不需要富家子弟，擇偶條件最重要是有心。 
沈卓盈深信嫁金龜婿不一定幸福，也要面對很多困難。 
身材出眾的高海寧，並不是只得一副空殼。
標籤釣金龜……
沈：講起我哋同一個經理人，你有一樣嘢，我都好欣賞，就係最近我哋有同事生日，你因為工作嚟唔到生日派對，都特別去整朱古力蛋糕，呢樣嘢真係好貼心！同埋你煮嘢好叻呀！
高：唔好咁講，最近我上TVB一個廚藝節目，我竟然由頭輸到落尾，就連最後玩包剪揼都輸！
記：有些人會將一啲女星尤其參加過選美嘅女仔，標籤為想釣金龜嘅女仔，你哋會點睇呢？
沈：我覺得係一種扭曲咗嘅諗法，嫁個有錢人就幸福，並唔一定，其實要承受好多嘢，好似有啲嘢要隻眼開隻眼閉，我自問就做唔到。
高：冇錯，我喜歡一個人，只會希望佢多啲陪喺我身邊，錢，夠使就得。
沈：認同！可能有啲人同我哋嘅價值觀唔同，但要我哋為錢出賣愛情，冇可能！
高：如果一開始，就同我講佢屋企有幾多架車、幾多層樓，係咁曬命，我一定會好反感，反而，佢好識關心我，只要我隨便講一句，佢都會好記喺心上，反而會令我好記得同感動。
二人有說不盡的話題，談話過程充滿笑聲。 
高海寧有內在美有外在美，還會整蛋糕氹朋友開心。（設計圖片） 
劉青雲十分愛錫老婆郭藹明，令高海寧十分羨慕。
也曾感動過……
沈：咁你有冇試過感動呀？
高：都有，我曾經有一個男性朋友，佢追咗我成年，佢唔會不停咁問你，可唔可以做佢女朋友，反而係會不停咁關心我，好似想約我去睇煙花，就會早一個月前約我，問我可唔可以預留嗰日畀佢；我生日佢又會整蛋糕、送一啲自製嘅小禮物畀我，好有心思，雖然最後我哋都冇一齊到，佢亦已經有女朋友，我會好祝福佢。
沈：點解冇喺一齊？
高：因為追咗成年，大家都成為咗好好嘅朋友，唔想再進一步。
沈：講起拍拖話題，其實高Ling你有乜嘢擇偶條件？
高：我好講感覺，希望搵到一個好似劉青雲嘅男人，唔需要好靚仔，但要係一個好男人，青雲入行咁多年，冇乜緋聞又超錫老婆，做戲又叻，絕對係理想丈夫。
沈：咁我對你好有信心，你有齊外在美同內在美，一定可以好快搵到好合你心水嘅另一半，到時記得請我飲呀！
.高海寧憎人晒命 求愛不求財
http://veryy8.blogspot.com/2013/01/blog-post_2291.html
