面對面
王之盛宴 盛品儒
2013年01月23日姑勿論節目好不好看、收視到底有沒有和無綫四六開，最起碼，過去年多，亞視得到的關注，攀至十年以來的最高峰：
報錯江澤民死訊、違規容許投資者王征操控、三番四次被調查鬧進立法會、在政總門口搞直播騷反發牌、狀告王維基竊取機密、藝員再培訓變調成炒人陷阱……；更離奇還有，連亞視台柱都冇乜幾何上嘅娛樂版頭條，上週三（ 16日），亦是執行董事盛品儒做主角，整版報道曾經與呂晶晶、陳霽平傳緋聞的他，再和人妻亞姐當街耍花槍。
經營 55年的亞視一直被批宣傳水皮，我敢說，打從王征入股、盛品儒上台，這一對堂兄弟，不只充當大水喉與執行董事；還兼當了亞視史上最成功的兩位宣傳搞手。
33歲就坐上電視台執行董事，關不關堂兄、父親、表姐夫買起亞視事？你話呢？
到底是不是王征一手在幕後操縱的傀儡？連在立法會議事大廳裏都一概否認，又怎麼會對著小雜誌小記者和盤托出？
盛品儒願意說的是，回顧上台三年，對自己的表現都幾自豪：「啲人成日話我富二代，唔靠屋企坐唔到呢個位……無論你富幾代接管家族生意，我相信當公司面臨公關危機處理，唔係人人可以企到出嚟，我好自豪我做到。」
簡單來說，呢餐「王」之盛宴，就算請你食，你受得起咩？
盛世五代
並不常聽到有人姓盛，而姓盛的，其實大有來頭。
清代光緒年間，有個政治家盛宣懷，上海、江西兩處都建有盛公祠；盛宣懷的四子盛恩頤生意包括銀行、鐵路、紗廠、貿易，是中國近代首富；盛恩頤的孫子盛毓鳳是老店 園老闆、亦有房地產生意，而盛毓鳳的獨子，正是盛品儒。中國首富第五代後人，即係富五代啦？
「我唔係富五代，有句老話，富不過三代，家產去到我爸爸嗰代已經耗得七七八八，再加上文革折騰，我兩歲嚟香港時，父母其實由零開始。」
一身度身訂做的西裝和白恤衫，腳上踏著 LV皮鞋，盛品儒身後跟著亞視公關、衣領有秘書小姐專人整理、坐下訪問不久有員工拿著紙樣進來請示，盛品儒回話：「再放大啲就可以拍板攞去印，唔該你預一百張畀我！」然後轉回頭向我補充：「我覺得寄 e card畀人唔夠尊重，呢啲係新年嘅賀咭，會連埋花籃寄畀啲客……」很明顯，盛家的由零開始進展神速又順利，三十年間，家族裏個個生意都做到億億聲， 2010年堂兄王征入股亞視，父親和表姐夫亦都進了亞視董事局，盛品儒提到王征，事無大小都一字不漏響全朵「亞視嘅主要投資者——王征先生」，盡可能和堂兄保持專業距離。我不明白為甚麼堂兄不同姓，盛品儒解釋：「佢都姓盛，不過早年父母離異，跟咗母親姓王啫。」
3年前，才 33歲，就成為亞視執行董事，盛品儒說自己的年齡有點尷尬：「做管理階層，我係有啲後生，選亞洲先生，我又太老喎……做電視台管理階層，年輕有年輕好，年輕會有激情、會有夢想。我嘅夢想就係搞好亞視……好似我哋主要投資者王征先生咁講，目標係讓亞視可以喺亞洲各個地方落地，成為亞洲 CNN。」
天生我財
盛品儒說，收購亞視是盛家的家族集體收購，執行董事的職位雖然是王征和父親安排，不過自己和所有打工仔一樣，從頭開始、由低做起：「我兩歲嚟香港，高中去加拿大升學，大學讀工商管理， 98年返香港，第一份工係做花旗銀行行政部，月薪九千，父母管教我好嚴，供我食住但唔會畀多餘錢我，我同普通人家、同普通打工仔一樣，個個月掹掹緊，都知道咩叫唔夠錢使。」
走進社會頭幾年出外闖，盛品儒說：「個個屋企都係咁，頭幾年唔會叫仔女返屋企幫手，出去闖嚇，睇嚇出邊嘅世界係點先！」在外的幾年，盛品儒說，吃過苦亦有領悟：「去台灣，為咗保住啲客，一落機就陪啲客飲，晏晝三點已經飲醉；去孟加拉，一出飛機就俾啲蚊同烏蠅同人包圍，所有人都又黑又汙糟，圍住我攞錢。佢哋冇著衫，但係瘦到完全分唔出男女……我想話，香港啲年輕人成日呻辛苦，搵得唔多買唔起樓，其實香港人已經好幸福，如果喺嗰啲地方出世，就真係一啲機會都冇……永遠冇機會翻身。」
「老實講，中國社會好講關係，成功需苦幹，但係齋苦幹，又唔係一定成功喎。成日有人話我，有今時今日都係靠父母、靠關係，我好希望年青人試嚇換個角度睇關係呢兩個字。你話我啲關係靠父母，我父母都唔係一出世就有關係！關係同人脈，都可以培養同累積出嚟。個個都話要進修，進修唔係淨係讀書，其實玩嚇、做嚇公益慈善，擴闊自己世界都係進修嘅一種。喺每個地方遇到唔同嘅人，就係唔同嘅點，工作需要時，我就可以將呢一點一點連成線，形成屬於自己嘅人脈。」
盛品儒說，很難假設，如果不是姓盛，自己是不是能年少得志，不過亞視這個爛攤子的執行董事，亦不是願意做就能做得來的：「做觀眾同做管理層係兩回事，實質管理，其實呢間公司係差啲執行力，完全可以做得好啲。做弱台難咩？做 TVB咪一樣難。蘋果咁好賣，都有 Samsung同 LG威脅，壓力去到邊都有。過去三年，亞視遇上咁多大事，發生咁多危機，我好自豪，自己可以代表公司企出嚟，處理應變，邊做邊學邊檢討囉。」
寧死不屈
盛品儒說，搞好亞視首先要重振軍心、整頓紀律，因此才搞個藝員訓練班，強制要求合約藝員參加。好衰唔衰，有的藝員曠課即炒，亞姐王家敏上堂時間約執行董事飯局，就有得免役。靚女有特殊待遇，即刻與執行董事的風流倜侃形象掛鈎。「據我所知，公司對每個藝員同事都要求嚴格，一概公平對待。有私人理由缺席絕對可以溝通請假，被炒嗰啲係因為無交代啫。佢哋喺公司係我員工，放工就係朋友，我同男同事都會去飲兩杯，第時避忌啲囉！」
王家敏、人妻黎虹讌以外，外貌勝過不少無名亞視藝員的盛品儒，亦與亞姐呂晶晶，陳霽平傳過緋聞，比盛品儒年長六年的陳霽平去年七月被拍到與盛品儒親熱約會，承認拍拖四個月，盛品儒則不同意女方說法：「睇戲、食飯係有，拍拖真係冇，第時發展我唔知，但係我𠵱家都冇咁嘅時間，點發展啫。不過，有樣嘢可以肯定，就算發展，我都唔會同公司同事，絕對唔會！死都唔會！就算有 feel，我都 㩒得住，一定 㩒得住……雖然未試過對公司同事動心，但我相信我嘅意志力可以戰勝一切。我去到呢個位，一定要做到，絕對唔可以影響公司管理層同自己嘅專業形象！」
兩年之計
上週三與亞姐黎虹讌上娛樂版頭條，盛品儒說，在場其實還有黎虹讌的兒子：「佢全家都喺度，又唔講……阿 E（黎虹讌）個仔成 20歲啦，我好羨慕呢啲。呢樣嘢我輸曬畀啲朋友，人哋結曬婚生曬仔，我就連女朋友都冇。兩年啦，我決定最遲兩年後結婚。」
單身寡佬一名，如何「決定」兩年後結婚？盛品儒話，做大事的男人，有計劃有目標，就一定執行到喎。
.[FACE]王之盛宴 盛品儒
http://veryy8.blogspot.com/2013/01/face-face_6923.html
